Ki Mannyer Nou Devret Vwar Dimoun Anmezir Ki Zour Zeova I Aprose?

“Nou Senyer pa tarde pour akonpli son promes, . . . me i pran pasyans avek zot, i pa oule ki personn i ganny detri, me ki tou dimoun i arive repanti.”—2 PYER 3:9.

1, 2. (a) Ki mannyer Zeova i vwar dimoun ozordi? (b) Ki kestyon nou kapab demann nou lekor?

BANN serviter Zeova in ganny en travay pour fer ‘tou pep vin disip Zezi.’ (Matye 28:19) Anmezir ki nou pe akonpli sa latas e pe esper “gran zour Zeova,” nou bezwen vwar dimoun parey li i vwar. (Tsefanya 1:14) Me konman Zeova i vwar dimoun? Zapot Pyer i dir: “Nou Senyer pa tarde pour akonpli son promes parey serten i mazinen, me i pran pasyans avek zot, i pa oule ki personn i ganny detri, me ki tou dimoun i arive repanti.” (2 Pyer 3:9) Bondye i vwar imen konman bann dimoun ki kapab repantir. I “oule ki tou dimoun i ganny sove e ganny konnesans laverite.” (1 Timote 2:4) Pa Zeova i kontan letan “en dimoun mesan i aret swiv son semen e i reste vivan”!—Ezekyel 33:11.

² Eski nou personnelman nou annan menm pwennvi avek Zeova lo dimoun? Parey li, eski nou vwar dimoun tou ras ek nasyonalite kapab vin en “mouton dan son lerb”? (Psonm 100:3; Akt 10:34, 35) Annou egzamin de legzanp ki montre lenportans annan menm pwennvi avek Zeova. Dan tou le de ka, destriksyon ti tre pros, e Zeova ti fer son bann serviter konn sa davans. Sa de legzanp i enportan sirtou la ki nou pe esper gran zour Zeova.

Abraam ti annan menm Pwennvi avek Zeova

3. Konman Zeova ti vwar bann zabitan Sodonm ek Gomor?

³ Premye legzanp i konsernan Abraam ek lavil Sodonm ek Gomor ki ti ranpli avek mesanste. Kan Zeova ti tann “konplent konsernan Sodonm ek Gomor,” i pa ti detrir sa de lavil ek zot zabitan toudswit. Premyerman i ti enspekte sa de lavil. (Zenez 18:20, 21) I ti anvoy de lanz Sodonm e zot ti reste kot Lot, en zonm drwat. Sa zour swar ki sa de lanz ti arive, “bann zonm sa lavil . . . depi bann pti garson ziska bann vye bonnonm ti form en geng e antour lakaz.” Zot ti oule annan relasyon seksyel avek sa de lanz. Sa ti klerman montre ki bann zabitan sa lavil ti pe viv en lavi vreman degradan e ki sa lavil ti merit ganny detrir. Pourtan, sa de lanz ti dir avek Lot: “Eski ou annan ankor dimoun la? Ou bann zann, garson, fiy, ek tou sa ki pour ou dan sa lavil, fer zot sorti!” Zeova ti donn loportinite serten zabitan sa lavil pour sove. Me finalman, zis Lot ek son de fiy ki ti sov sa destriksyon.—Zenez 19:4, 5, 12, 16, 23-26.

4, 5. Akoz Abraam ti sipliy Zeova pour bann zabitan Sodonm? Eski pwennvi Abraam ti an armoni avek pour Zeova?

⁴ Aprezan, annou retourn dan sa letan ler Zeova ti devwal son lentansyon pour enspekte lavil Sodonm ek Gomor. Se la ki Abraam ti sipliye: “Meton i annan senkant dimoun ki drwat dan sa lavil. Eski ou pou detrir zot e pa pardonn sa lavil akoz sa senkant dimoun drwat ki pe viv ladan? Non, mon pa krwar ki ou pou fer sa, ki ou pou detrir bann zonm ki drwat ansanm avek sa ki mesan, ki ou pou tret sa ki drwat parey sa ki mesan! Mon pa krwar ki ou pou fer sa. Eski sa Ziz lo later antye pa pou fer sa ki zis?” Abraam ti servi sa lekspresyon “mon pa krwar ki ou pou fer sa” de fwa. Dapre son prop leksperyans, Abraam ti konnen ki Zeova pa ti pou detrir bann dimoun drwat ansanm avek sa ki mesan. Kan Zeova ti dir ki i pa ti pou detrir sa lavil si i annan “senkant dimoun ki drwat dan sa lavil,” Abraam ti kontinyen redwir sa kantite ziska ki i ariv dis.—Zenez 18:22-33.

⁵ Eski Zeova ti pou’n ekout siplikasyon Abraam si i pa ti an armoni avek son prop pwennvi? Non. Vi ki Abraam ti “zanmi Bondye,” i paret ki i ti konn pwennvi Bondye e i ti annan menm pwennvi avek li. (Zak 2:23) Kan Zeova ti tourn son latansyon ver Sodonm ek Gomor, i ti pare pour pran an konsiderasyon sa ki Abraam ti pe demande. Akoz? Parski nou Papa dan lesyel “pa oule ki personn i ganny detri, me ki tou dimoun i arive repanti.”

Fason ki Yona ti vwar Dimoun ti totalman diferan

6. Ki mannyer bann zabitan Niniv ti reazir ler zot ti tann sa ki Yona ti anonse?

⁶ Aprezan annou vwar sa dezyenm legzanp. Sa i legzanp Yona. Safwasi se lavil Niniv ki ti pe al ganny detrir. Profet Yona ti ganny demande pour anonse ki mesanste sa lavil ‘ti’n ariv ziska kot Zeova.’ (Yona 1:2) Ansanm avek bann landrwa ki ti bord avek li, Niniv ti en gran lavil “avek en distans marse ki pran trwa zour.” Kan Yona ti finalman obeir Zeova e antre dan lavil Niniv, i ti kontinyen anonse: “Ankor dan karant zour, Niniv pou ganny konkerir.” Ler bann dimoun Niniv ti tann sa, zot “ti konmans annan lafwa dan Bondye. Zot tou, . . . zot ti konmans zennen e abiy zot dan lenz latwal sak.” Menm lerwa Niniv ti repantir.—Yona 3:1-6.

7. Ki mannyer Zeova ti vwar bann zabitan Niniv ki ti’n repantir?

⁷ Zot reaksyon ti konpletman diferan avek zabitan Sodonm! Ki mannyer Zeova ti vwar bann zabitan Niniv ki ti repantir? Yona 3:10 i dir: “Sa vre Bondye ti regrete akoz i ti’n dir i pou anmenn maler lo zot e i pa ti fer sa maler ariv lo zot.” Zeova ti “regrete” dan le sans ki i ti sanz son lide konsernan bann zabitan Niniv akoz zot ti sanz zot lavi. Standar Bondye pa ti sanze, me i ti sanz son lide letan i ti vwar bann zabitan Niniv repantir.—Malaki 3:6.

8. Akoz Yona ti fer son figir long?

⁸ Kan Yona ti realize ki Niniv pa ti pou ganny detrir, eski i ti vwar keksoz parey Zeova? Non, parski nou lir dan Labib: “Me Yona li, i pa ti kontan ditou. I ti vreman ankoler.” Ki Yona ti fer apre? Labib i dir: “I ti priy Zeova e dir: ‘Aprezan Zeova, pa sanmenm ki mon ti dir letan mon ti ankor dan mon pei? Sanmenm mon ti sove e al Tarsis, akoz mon ti konnen ki ou en Bondye ki annan konpasyon, ki pran pitye, ki pa ankoler vitman, ki ranpli avek labonte leker, e ki regret ou desizyon pour anmenn maler.’ ” (Yona 4:1, 2) Yona ti konnen ki kalite Bondye Zeova i ete. Me sa letan, i ti napa menm pwennvi avek Bondye lo bann zabitan Niniv ki ti’n repantir e i ti fer son figir long.

9, 10. (a) Konman Zeova ti fer Yona aprann en bon leson? (b) Akoz nou prezimen ki plitar Yona ti devlop menm pwennvi avek Zeova lo bann zabitan Niniv?

⁹ Yona ti kit Niniv. I ti konstri en pti payot pour li asiz anba la pour ganny lonbraz anmezir ki i ti espere pour “vwar ki ti pou arive avek sa lavil.” Zeova ti fer en pye kalbas pouse pour donn lonbraz Yona. Me son lannmen, sa pye kalbas ti fletri. Yona ti ankoler akoz sa. Alors, Zeova ti dir li: “Ou ou’n pran pitye pour sa pye kalbas . . . Mwan, lo mon kote, eski mon napa drwa pran pitye pour Niniv, sa gran lavil ki annan plis ki san ven mil dimoun ki pa konn fer diferans ant zot lanmen drwat ek zot lanmen gos, san kont en kantite zannimo domestik?” (Yona 4:5-11) Yona ti’n bezwen aprann en bon leson konsernan lafason ki Zeova i vwar dimoun!

¹⁰ Labib pa dir konman Yona ti reazir apre ki Bondye ti’n dir li sa parol. Me i kler ki sa profet ti sanz son pwennvi lo bann zabitan Niniv ki ti’n repantir. Nou dir sa akoz Zeova ti servi li pour ekrir sa resi enspire.

Ki Kalite Latitid ou annan?

11. Konman ki petet Abraam ti pou vwar dimoun ki pe viv dan nou letan?

¹¹ Ozordi, nou pe fer fas avek en lot destriksyon. Sa i destriksyon sa sistenm ki nou pe viv ladan pandan gran zour Zeova. (Lik 17:26-30; Galat 1:4; 2 Pyer 3:10) Konman Abraam ti pou vwar bann dimoun ki pe viv dan sa lemonn ki pe al ganny detrir byento? I tre probab ki i ti pou trakas pour bann dimoun ki pa ti ankor tann “sa Bonn Nouvel Rwayonm.” (Matye 24:14) Abraam ti enplor Bondye osize bann dimoun drwat ki ti kapab reste Sodonm. Eski nou enterese avek dimoun ki ti a kapab abandonn fason viv sa lemonn ki anba pouvwar Satan si zot ti ganny loportinite pour repantir e servi Bondye?—1 Zan 5:19; Revelasyon 18:2-4.

12. Akoz i fasil pour nou devlop en latitid parey Yona anver dimoun ki nou zwenn dan predikasyon, e ki nou kapab fer pour evit sa?

¹² I byen pour nou anvi vwar en lafen avek mesanste. (Abakouk 1:2, 3) Parkont, i telman fasil pour nou devlop en latitid parey Yona, pour pa enterese avek byennet bann dimoun ki ti a kapab repantir. Sa i vre sirtou si nou kontinyen rankontre bann dimoun ki pa enterese, ki ay nou, oubyen menm agresif avek nou letan nou al pres sa mesaz Rwayonm kot zot. Petet nou kapab pa montre otan lentere pour lezot dimoun ki Zeova pa ankor tire dan sa sistenm mesan. (Romen 2:4) Si apre ki nou’n egzamin nou seryezman, nou vwar ki nou annan kanmenm en pti gin sa latitid ki Yona ti annan okonmansman, nou kapab priy Zeova pour ed nou aziste nou pwennvi avek sa ki pour li.

13. Akoz nou kapab dir ki Zeova i enterese avek bann dimoun ozordi?

¹³ Zeova i enterese avek bann ki pa ankor konmans servi li, e i ekout siplikasyon son bann serviter. (Matye 10:11) Par egzanp, “Bondye pou rann lazistis” pour reponn zot lapriyer. (Lik 18:7, 8) Deplis, Zeova pou akonpli tou son promes ek plan dan son letan ki i vwar apropriye. (Abakouk 2:3) Sa i enkli tir tou mesanste lo later, zis parey i ti detrir Niniv apre ki son bann zabitan ti retourn dan lemal ankor.—Naoum 3:5-7.

14. Ki nou devret fer anmezir nou pe esper gran zour Zeova?

¹⁴ Ziska ki sa sistenm mesan i ganny retire pandan gran zour Zeova, eski nou pou espere avek pasyans, e konsantre lo fer son lavolonte? Nou pa konn an detay ziska ki degre sa travay predikasyon i bezwen ganny fer avan zour Zeova i arive. Me nou konnen ki sa bon nouvel lo Rwayonm pou ganny prese partou lo later kot i annan dimoun ziska ki Bondye i satisfe e apre lafen pou vini. Sirman, nou bezwen enterese avek “bann keksoz dezirab” ki pa ankor ganny rasanble anmezir ki Zeova i kontinyen ranpli son lakaz avek laglwar.—Agai 2:7.

Nou Pwennvi i ganny demontre par nou Aksyon

15. Kwa ki kapab fer nou pli byen konpran nesesite pour prese?

¹⁵ Petet nou reste en landrwa kot dimoun pa montre lentere dan sa mesaz, e nou pa dan en pozisyon pour deplas kot i bezwen plis proklanmater. Meton i reste ankor dis dimoun pour trouve dan nou teritwar avan lafen i arive. Eski nou santi ki i vo lapenn rod sa dis ki reste? Zezi ti “ranpli avek konpasyon pour lafoul ki i ti war, akoz zot ti fatige e dekouraze parey bann mouton ki napa berze.” (Matye 9:36) Ler nou etidye Labib e lir bann lartik dan Latour Veyer ek Réveillez-vous!, nou kapab konpran pli byen kondisyon deplorab ki sa lemonn i ladan. An retour, sa i kapab fer nou pli byen konpran nesesite pour pres sa bon nouvel. Deplis, ler nou servi avek lapresyasyon bann piblikasyon ki’n ganny fourni atraver ‘lesklav fidel e pridan,’ sa i kapab fer nou pres avek plis konviksyon dan bann teritwar ki ganny travay souvan.—Matye 24:45-47; 2 Timote 3:14-17.

16. Ki mannyer nou kapab fer nou predikasyon vin pli efikas?

¹⁶ Lentere ki nou annan pour bann ki pa ankor aksepte sa mesaz Labib ki donn lavi, i pous nou pour adapte nou ler prese e fason ki nou apros dimoun dan predikasyon. Eski nou remarke ki bokou dimoun pa kot zot ler nou prese? Si wi, petet nou kapab fer nou predikasyon pli efikas par pres diferan ler e diferan landrwa. Peser i al lapes kot i pou ganny pwason. Eski nou osi nou kapab fer parey letan nou al lapes dan en sans spirityel? (Mark 1:16-18) Akoz nou pa esey pres lo tar apremidi oubyen temwanny par telefonn dan bann landrwa kot i legal? Serten in dekouver ki bann landrwa parking, bèstòp, stasyon petrol, ek magazen i bann ‘landrwa kot pwason i mord byen.’ Nou montre ki nou annan en latitid parey Abraam letan nou sezi tou loportinite pour donn temwannyaz enformel.

17. Ki mannyer nou kapab ankouraz bann misyonner ek lezot ki pe servi dan en lot pei?

¹⁷ Bokou dimoun pa ankor tann sa mesaz Rwayonm. Apard ki prese, eski nou ti a kapab montre lentere pour sa bann dimoun san ki nou bezwen kit se nou? Bon, eski nou konn okenn misyonner oubyen serviter aplentan ki pe servi dan en lot pei? Si wi, i ti a byen pour ekrir zot de mo pour eksprim nou lapresyasyon pour zot travay. Konman ki sa i dan zentere dimoun an zeneral? Nou let lankourazman e felisitasyon i kapab donn lafors bann misyonner pour zot kontinyen zot servis. An retour, sa i ed bokou plis dimoun pour konn laverite. (Ziz 11:40) Nou kapab osi priy pour zot e pour bann ki swaf laverite dan lezot pei. (Efezyen 6:18-20) En lot fason pour montre nou lentere se kan nou kontribye finansyerman anver travay mondyal Temwen Zeova.—2 Korentyen 8:13, 14; 9:6, 7.

Eski ou ti a kapab deplase?

18. Ki serten Kretyen in fer pour promot lentere Rwayonm dan sa pei kot zot reste?

¹⁸ Bann ki’n deplase pour al viv dan en lot landrwa kot i bezwen plis proklanmater, in ganny rekonpanse pour zot zefor ek sakrifis. De lot kote, serten Temwen Zeova in aprann en lot langaz pour zot kapab vin en led spirityel pour bann etranze ki pe reste dan zot pei. Zot zefor in vreman ganny rekonpanse. Par egzanp, set Temwen ki ti pe ed bann Sinwan dan en lavil Texas, Letazini, ti akey 114 dimoun pour Repa Senyer lannen 2001. Bann ki ti ed sa bann group in vwar ki zot rekolt in pare.—Matye 9:37, 38.

19. Ki ti a byen ou fer si ou pe mazin al viv dan en lot pei pour ede dan travay predikasyon laba?

¹⁹ Petet ou ansanm avek ou fanmiy, zot santi ki zot dan en bon pozisyon pour deplase e al kot i bezwen plis proklanmater. Byensir, zot bezwen “asize premyerman e estimen konbyen i pou koute.” (Lik 14:28) Sa i neseser sirtou si zot pe mazin pour al reste dan en pei etranze. Tou sa ki pe mazin lo sa posibilite, i kapab demann zot lekor bann kestyon parey: ‘Eski mon pou kapab siport mon fanmiy? Eski mon kapab ganny en viza apropriye? Eski mon konn koz langaz sa pei? Si non, eski mon pare pour aprann sa langaz? Eski mon’n mazin enpe lo kote klima ek kiltir sa pei? Eski mon kapab vreman vin “en led fortifyan” pour bann frer ek ser dan sa pei, non pa en fardo?’ (Kolosyen 4:10, 11, NW ) Pour vwar ki kantite bezwen i annan dan sa pei ki ou pe anvizaze ale, i byen pour ekrir biro brans Temwen Zeova ki sirvey travay predikasyon dan sa landrwa.a

20. Ki mannyer en zenn Kretyen in depans son lenerzi pour benefisye bann konpanyon Kretyen ek lezot dan en pei etranze?

²⁰ En Kretyen ki ti travay lo konstriksyon bann Lasal Rwayonm Zapon ti aprann ki Paragwe ti bezwen serten travayer kalifye pour konstri en lasal. Vi ki i ti en selibater e en zenn ki annan lenerzi pour depanse, i ti deplase pour al dan sa pei. I ti travay pour wit mwan lo sa proze konman sel travayer aplentan. Letan i ti pe reste laba, i ti aprann langaz Espanyol e kondwir bann letid Labib. I ti vwar ki dan sa pei i bezwen plis proklanmater. I ti retourn Zapon, me pa bokou letan apre i ti retourn Paragwe pour ede rasanble dimoun dan sa menm Lasal Rwayonm ki i ti konstri.

21. Anmezir ki nou esper gran zour Zeova, kwa ki merit preokip nou e ki pwennvi nou devret annan?

²¹ Bondye pou fer sir ki predikasyon i ganny akonpli plennman, an armoni avek son lavolonte. Ozordi, i pe akseler sa dernyen rekolt spirityel. (Izai 60:22) Anmezir ki nou esper zour Zeova, avek devouman annou fer nou par dan sa travay rekolt e annou vwar dimoun parey Zeova i vwar zot.

[Not anba lo paz]

Eski ou rapel?

• Anmezir ki nou pe esper zour Zeova, konman nou devret vwar dimoun?

• Ki pwennvi Abraam ti annan lo bann dimoun drwat ki ti pe viv Sodonm?

• Ki mannyer Yona ti vwar bann zabitan Niniv ki ti’n repantir?

• Konman nou kapab montre ki nou annan menm pwennvi avek Zeova lo bann dimoun ki pa ankor tann sa bon nouvel?

[Portre lo paz 16]

Abraam ti vwar dimoun parey Zeova i vwar

[Portre lo paz 17]

Yona ti arive annan menm pwennvi avek Zeova konsernan bann zabitan Niniv ki ti repantir

[Portre lo paz 18]

Lentere ki nou annan pour dimoun i pous nou pour adapte nou ler ek fason ki nou pres sa bon nouvel