LESON 30
Ou bann defen pou reviv ankor!
Lanmor i anmenn bokou douler ek sagrinasyon. Sanmenm sa Labib i dir lanmor i en lennmi. (1 Korentyen 15:26) Dan Leson 27, ou ti aprann ki Zeova pou defet sa lennmi. Me ki pou arive avek bann dimoun ki’n deza mor? Dan sa leson, nou pou aprann konsernan en lot zoli promes ki Zeova in fer. I pou relev plizyer bilyon dimoun ki’n mor pour zot kapab viv pour touzour zot osi. I pou resisit zot! Vre sa pou arive? Kote zot pou resisite, dan lesyel ouswa lo later?
1. Ki Zeova i anvi pour nou bann defen?
Zeova i vreman anvi redonn lavi bann ki’n mor. Zob, en zonm ki ti annan lafwa, ti asire ki Bondye pa ti pou oubliy li ler i mor. I ti dir Bondye: “Ou pou kriy mwan e mon pou reponn ou [dan latonm].”—Lir Zob 14:13-15.
2. Ki mannyer nou konnen ki bann mor i kapab ganny resisite?
Ler Zezi ti lo later, Bondye ti donn li sa pouvwar pour resisit dimoun. I ti redonn lavi en pti fiy 12 an ek garson en vev. (Mark 5:41, 42; Lik 7:12-15) Pli tar, Zezi ti resisit son zanmi Lazar. Menm si Lazar ti’n mor depi kat zour, Zezi ti redonn li lavi. I ti priy avek Bondye e apre i ti kriye: “Lazar, sorti!” “Sa zonm ki ti’n mor ti sorti” e i ti vivan! (Zan 11:43, 44) Zis mazinen ki mannyer bann zanmi ek fanmir Lazar ti kontan!
3. Ki lespwar i annan pour nou bann defen?
Labib i promet: “Bann kiʼn fer sa ki byen e bann kiʼn fer sa ki mal pou ganny resisite.” (Akt 24:15) Sa bann dimoun ki Zezi ti resisite ler i ti lo later pa ti’n al dan lesyel. (Zan 3:13) Zot ti kontan pour reviv isi lo later. Pareyman, byento Zezi pou resisit plizyer bilyon dimoun pour viv pour touzour isi lo sa later ki pou’n vin en paradi. I ti dir ki “tou bann ki dan latonm” pou ganny resisite. Menm bann ki nou krwar in ganny oubliye, Bondye i rapel zot.—Zan 5:28, 29.
AL PLI O PROFON
Vwar levidans dan Labib ki montre ki bann mor i kapab ganny resisite e ki nou kapab asire ki zot pou ganny resisite. Aprann ki mannyer rezireksyon i kapab rekonfort ou e donn ou en lespwar.
4. Zezi ti prouve ki i kapab resisit bann mor
Aprann plis konsernan sa ki Zezi ti fer pour son zanmi Lazar. Lir Zan 11:14, 38-44 e apre reponn sa bann kestyon:
Ki mannyer nou konnen ki Lazar ti’n vreman mor?—Vwar verse 39.
Si Lazar ti’n al dan lesyel, eski ou krwar ki Zezi ti pou’n resisit li lo later?
5. Bokou dimoun pou ganny resisite!
Lir Psonm 37:29 e apre reponn sa kestyon:
Kote sa plizyer bilyon dimoun ki pou resisite pou viv?
Zezi pa pou resisit zis bann ki ti ador Zeova, i pou resisit bokou plis dimoun ki sa. Lir Akt 24:15 e apre reponn sa kestyon:
Lekel ki ou ti pou kontan revwar ankor?
Mazin sa: Zezi i kapab fasilman resisit en dimoun zis parey en papa ki pe lev son zanfan ki pe dormi
6. Rezireksyon i kapab rekonfort ou e donn ou en lespwar
Sa ki Labib i dir konsernan fiy Zairis in rekonfort e ankouraz bokou dimoun ki dan dey. Lir sa resi dan Lik 8:40-42, 49-56.
Avan Zezi ti resisit fiy Zairis, i ti dir son papa: “Pa bezwen per, zis annan lafwa.” (Vwar verse 50.) Ki mannyer sa lespwar rezireksyon i kapab ed ou . . .
ler en dimoun ki ou kontan i mor?
ler ou lavi i an danze?
Zwe sa VIDEO e apre reponn sa kestyon.
Ki mannyer sa lespwar rezireksyon ti rekonfort e ankouraz paran Phelicity?
SERTEN DIMOUN I DIR: “Mon krwar pa si rezireksyon i posib.”
Ki ou panse?
Ki verse Labib ou kapab servi pour montre ki i pou vreman annan en rezireksyon?
REZIMEN
Labib i montre ki plizyer bilyon dimoun ki’n mor pou ganny resisite. Zeova i anvi zot reviv ankor e i’n donn Zezi sa pouvwar pour resisit zot.
Revizyon
Ki mannyer Zeova ek Zezi i santi konsernan redonn lavi bann ki’n mor?
Kote sa plizyer bilyon dimoun ki pou resisite pou viv, dan lesyel ouswa lo later? Akoz ou dir sa?
Kwa ki konvenk ou ki ou bann defen pou reviv ankor?
FER PLIS RESERS
Annou vwar ki ou kapab fer pour fer fas avek ou sagrinasyon.
Eski bann prensip Labib i vreman kapab ed en dimoun ki dan dey?
Ki mannyer bann zanfan i kapab fer fas avek lanmor en dimoun ki zot kontan?
Lekel ki pou ganny resisite pour al viv dan lesyel? Lekel ki pa pou ganny resisite?