Bann ansyen ki ‘travay ansanm avek nou pour nou lazwa’

“Nou travay ansanm avek zot pour zot lazwa.”​—2 KOR. 1:24, NW.

ROD LAREPONS:

Ki mannyer Pol ti montre ki i pa ti ‘domin lo lafwa son bann frer’ me ki i ti “travay ansanm avek zot pour zot lazwa”?

Dan ki fason bann ansyen i kontribye pour ki zot bann frer ek ser Kretyen i dan lazwa?

Ki mannyer nou tou nou kapab ede pour ki i annan lazwa dan kongregasyon?

1. Kwa ki ti fer Pol dan lazwa konsernan bann Kretyen Korent?

I TI lannen 55 N.L. Zapot Pol ti dan lavil Troas, me i pa ti kapab aret mazin Korent. Pli boner sa menm lannen, i ti dan bokou lapenn akoz bann frer laba ti pe fer bann diskisyon antre zot. Alor, son konsern konman en papa pour zot ti pous li pour ekrir en let pour redres zot. (1 Kor. 1:11; 4:15) I ti’n osi anvoy Tit, son konpanyon travay kot zot e fer laranzman pour ki Tit i retournen e raport tou avek li Troas. La aprezan, Pol ti pe esper Tit Troas e i ti vreman anvi konnen ki mannyer bann Korentyen ti ete. Me, Pol ti vreman dezapwente kan Tit pa ti vini. Ki Pol ti fer? I ti pran bato pour al Masedwann e i ti dan en gran lazwa kan i ti zwenn Tit laba. Tit ti rakont Pol ki bann frer Korent ti’n byen resevwar son let e ki zot ti vreman anvi vwar li. Kan Pol ti tann sa bon rapor, i ti dan “bokou [plis] lazwa” ankor.​—2 Kor. 2:12, 13; 7:5-9.

2. (a) Ki Pol ti ekrir bann Korentyen konsernan lafwa ek lazwa? (b) Ki kestyon nou pou egzaminen?

² En pti pe letan apre, Pol ti ekrir en dezyenm let pour bann Korentyen. I ti dir zot: “Pa ki nou domin lo zot lafwa, me nou travay ansanm avek zot pour zot lazwa parski se par zot lafwa ki zot pe reste debout.” (2 Kor. 1:24, NW) Ki Pol ti oule dir par sa? Ki lefe sa parol i devret annan lo bann ansyen dan nou letan?

NOU LAFWA EK NOU LAZWA

3. (a) Ki Pol ti pe dir kan i ti dir: “Parski se par zot lafwa ki zot pe reste debout”? (b) Ki mannyer bann ansyen ozordi pe swiv legzanp Pol?

³ Pol ti koz lo de kalite enportan nou ladorasyon e sa se lafwa ek lazwa. Rapel byen ki Pol ti dir sa konsernan lafwa: “Pa ki nou domin lo zot lafwa, . . . parski se par zot lafwa ki zot pe reste debout.” Atraver sa parol, Pol ti pe montre ki son bann frer Korent ti pe tenir ferm, pa akoz li ouswa lezot imen, me akoz zot prop lafwa dan Bondye. Alor, Pol pa ti pe vwar okenn nesesite pour kontrol lafwa son bann frer ek ser e i pa ti oule fer en keksoz parey. I ti asire ki zot ti bann Kretyen fidel ki ti anvi fer sa ki byen. (2 Kor. 2:3) Dan nou letan, bann ansyen i swiv legzanp Pol ler zot annan konfyans dan lafwa zot bann frer e dan zot dezir senser pour servi Bondye. (2 Tesa. 3:4) Plito ki etablir bann lareg strik lo kongregasyon, bann ansyen i depan lo bann prensip Labib ek gidans lorganizasyon Zeova. Apre tou, bann ansyen pa domin lo lafwa zot bann frer.​—1 Pyer 5:2, 3.

4. (a) Ki Pol ti oule dir ler i ti dir: “Nou travay ansanm avek zot pour zot lazwa”? (b) Ki mannyer bann ansyen ozordi i kapab imit latitid Pol?

⁴ Pol ti osi dir: “Nou travay ansanm avek zot pour zot lazwa.” Ler i ti pe dir sa parol, i ti pe refer avek son prop lekor ek bann ki ti pros avek li dan sa travay. Akoz nou tonm lo sa konklizyon? Anfet, dan sa menm let, Pol ti rapel kongregasyon Korent konsernan de frer ki ti pros avek li kan i ti ekrir: “Kris-Zezi, ki Silven, Timote ek mwanmenm nou’n anonse parmi zot.” (2 Kor. 1:19, nou ki’n met an italik.) Deplis, dan son bann let, sak fwa ki Pol ti servi sa lekspresyon “koleg travay” ouswa bann ki “travay ansanm” avek li, i ti touzour pe refer avek bann ki ti pros avek li tel ki Apolos, Akilas, Prisil, Timote, Tit ek lezot. (Rom. 16:3, 21; 1 Kor. 3:6-9; 2 Kor. 8:23) Alor, an dizan: “Nou travay ansanm avek zot pour zot lazwa,” Pol ti pe asir bann Korentyen ki li ek son bann konpanyon ti anvi fer tou sa ki zot kapab pour promouvwar lazwa parmi tou manm dan kongregasyon. Denozour, bann ansyen i anvi fer parey. Zot anvi fer tou sa ki zot kapab pour ed zot bann frer ek ser pour “servi Zeova dan lazwa.”​—Ps. 100:2; Fili. 1:25.

5. Larepons ki kestyon nou pou egzaminen e lo kwa nou devret reflesir?

⁵ Tou resaman, en group frer ek ser devoue ki reste dan diferan parti lemonn ti ganny demande pour reponn sa kestyon, “Ki parol ek aksyon ki en ansyen in dir ouswa fer ki’n fer ou ganny plis lazwa?” Anmezir ki nou egzamin remark ki sa bann frer ek ser in fer, esey gete si ou santi parey zot. An plis ki sa, annou esey konpran ki mannyer nou tou nou kapab kontribye pour ki i annan plis lazwa dan nou kongregasyon.a

“FER SALANM . . . MON BON ZANMI PERSID”

6, 7. (a) Nonm en fason ki bann ansyen i kapab imit Zezi, Pol ek lezot serviter Bondye. (b) Akoz i kontribye anver lazwa nou bann frer ek ser kan bann ansyen i rapel zot non?

⁶ Bokou frer ek ser i dir ki zot annan plis lazwa ler bann ansyen i demontre en lentere personnel dan zot. En fason senp pour fer li se kan bann ansyen i swiv legzanp David, Eliou ek Zezi li menm. (Lir 2 Samyel 9:6; Zob 33:1;b Lik 19:5.) Sak sa bann serviter Zeova ti demontre en lentere senser dan en lot dimoun par servi son non. Pol osi ti apresye lenportans pour rapel e servi non lezot Kretyen. A lafen enn son let, i ti anvoy salitasyon pour plis ki 25 frer ek ser par mansyonn zot non. Sa ti enkli Persid, en ser Kretyen ki Pol ti dir: “Fer salanm . . . mon bon zanmi Persid.”​—Rom. 16:3-15.

⁷ Serten ansyen i vwar li difisil pour rapel non bann dimoun. Toudmenm, ler zot fer en vre zefor, se konmsi zot pe dir zot bann frer ek ser, ‘Ou enportan pour mwan.’ (Egz. 33:17) Par egzanp, bann ansyen i kontribye anver lazwa zot bann frer ek ser kan zot rapel zot non ler zot pe donn zot larepons dan Letid Latour Veyer ouswa lezot renyon.​—Konpar Zan 10:3.

PERSID TI TRAVAY BOKOU POUR SENYER

8. Dan ki laspe enportan Pol ti swiv legzanp Zeova ek Zezi?

⁸ Pol ti osi demontre lentere dan lezot par felisit zot senserman e sa i en lot fason senp pour ed nou bann frer ek ser gard zot lazwa. Se pour sa rezon ki dan sa let kot Pol ti eksprim son dezir pour ogmant lazwa son bann frer, i ti osi dir: “Mon annan rezon fyer akoz zot.” (2 Kor. 7:4) Lefet ki Pol ti felisit sa bann frer Korent, sa ti’n vreman bezwen ankouraz zot. Pol ti eksprim preski menm santiman anver lezot kongregasyon. (Rom. 1:8; Fili. 1:3-5; 1 Tesa. 1:8) Anfet, apre ki i ti’n koz lo Persid dan son let pour kongregasyon Ronm, Pol ti osi dir ki Persid ti’n ‘travay bokou pour Senyer.’ (Rom. 16:12) Eski pa sa felisitasyon ti’n bezwen vreman ankouraz sa ser fidel! Ler Pol ti pe felisit lezot, i ti pe imit legzanp Zeova ek Zezi.​—Lir Mark 1:9-11; Zan 1:47; Rev. 2:2, 13, 19.

9. Akoz donn e resevwar felisitasyon i kontribye pour ki kongregasyon i zwaye?

⁹ Bann ansyen ozordi osi i vwar sa lenportans pour eksprim sa lapresyasyon ki zot annan pour zot bann frer ek ser. (Prov. 3:27; 15:23) Sak fwa ki en ansyen i fer sa, se konmsi i pe dir bann frer ek ser, ‘Mon’n remarke sa ki ou’n fer. Mon enterese avek ou.’ Bann frer ek ser i vreman bezwen antann bann parol lankourazman sorti kot bann ansyen. En ser dan son 55 an i annan menm santiman ki bokou kan i ti dir: “Dan travay, byen rar mon ganny en konpliman. Dimoun pa fatig zot avek kanmarad e i annan en leta lespri konpetisyon antre zot. Alor, ler en ansyen i felisit mwan pour en keksoz ki mon’n fer pour kongregasyon, sa i ankouraz mwan e donn mwan lafors. I fer mwan santi ki mon Papa ki dan lesyel i kontan mwan.” En frer ki pe elve son de zanfan li tousel ti santi parey. Tou resaman, en ansyen ti felisit li senserman. Ki lefe sa ti annan lo li? I ti dir: “Sa ki sa ansyen ti dir mwan ti vreman ankouraz mwan en kantite pour donn mon meyer.” Vreman, ler bann ansyen i senserman felisit bann frer ek ser dan kongregasyon, sa i ogmant zot lazwa e i donn zot lafors pour kontinyen mars lo semen lavi e ‘pa epwize.’​—Iza. 40:31.

‘PRAN SWEN KONGREGASYON BONDYE’

10, 11. (a) Ki mannyer bann ansyen i kapab swiv legzanp Neemya? (b) Kwa ki pou ed en ansyen pour partaz bann kado spirityel ler i pe vizit son bann frer ek ser?

¹⁰ Dan ki fason vreman enportan bann ansyen i demontre en lentere personnel dan bann frer ek ser pour ki kongregasyon i zwaye? Se ler zot pran linisyativ pour ankouraz sa bann ki bezwen lankourazman. (Lir Akt 20:28.) Ler bann ansyen i fer sa, zot pe imit bann berze spirityel dan letan lontan. Pran legzanp Neemya, en sirveyan fidel ki ti remarke ki serten son bann frer Zwif ti’n afeblir spirityelman. Ki i ti fer? Sa resi i dir ki deswit i ti leve e al ankouraz zot. (Nee. 4:14) Bann ansyen ozordi osi i fer parey. Zot “leve,” andotmo zot pran linisyativ pour al afermi lafwa zot bann frer ek ser. Zot vizit zot bann frer ek ser kot zot pour donn zot sa lankourazman personnel si i posib. Pandan sa bann vizit, bann ansyen i oule “partaz avek zot bann kado spirityel.” (Rom. 1:11) Ki mannyer bann ansyen i kapab arive fer sa?

¹¹ Avan ki en ansyen i fer en vizit, i bezwen pran letan pour reflesir lo sa dimoun ki i pe al vizite. Ki defi sa dimoun pe rankontre? Kwa ki ti kapab batir ouswa ankouraz sa dimoun? Ki verse ouswa leksperyans en dimoun dan Labib ki ti kapab aplikab pour li? Sa pti preparasyon pou ed sa ansyen pour pa zis annan en konversasyon koumsa menm, me pour dir bann keksoz ki pou annan en bon lefe lo sa frer ouswa sa ser. Dan sa bann vizit, en ansyen pou les son bann frer ek ser eksprim zot, anmezir ki i ekout zot avek latansyon. (Zak 1:19) En ser ti dir: “I vreman rekonfortan kan en ansyen i ekout avek tou son leker.”​—Lik 8:18.

12. Lekel dan kongregasyon ki bezwen lankourazman e akoz?

¹² Lekel ki kapab benefisye avek vizit bann ansyen? Pol ti demann bann ansyen parey li menm pour “pran swen [avek tou dimoun dan] troupo.” Tou manm dan kongregasyon i merit ganny ankouraze, menm bann proklanmater ek pionye ki’n akonplir zot servis fidelman pour plizyer lannen. Akoz zot bezwen sipor bann berze spirityel? Parski parler sa bann frer ek ser spirityel osi i kapab pe fer fas avek bann presyon sa lemonn. Pour konpran akoz menm bann serviter fidel Bondye i kapab parler bezwen led en lot dimoun, annou egzamin en levennman ki ti arive dan lavi Lerwa David.

“ABISAI . . . TI VIN ED LI”

13. (a) Ki mannyer Isbi-Benob ti kapitaliz lo sityasyon David? (b) Ki mannyer Abisai ti vin sov David?

¹³ Pa tro bokou letan apre ki David ki ti ankor en zenn garson ti’n ganny apwente lerwa, i ti lager avek Golyat, en Refaim ki ti bann zean. Avek kouraz, David ti touy sa zean. (1 Sam. 17:4, 48-51; 1 Kron. 20:5, 8) En bann lannen pli tar, dan en batay avek bann Filisten, ankor enn fwa David ti fas a fas avek en zean. I ti apel Isbi-Benob, ki li osi ti en Refaim. (2 Sam. 21:16; not) Me, safwasi sa zean ti pros pour touy David. Akoz? Pa akoz David ti mank kouraz me akoz i ti’n perdi son lafors. Sa resi i dir: “David ti’n fatige.” Desito ki Isbi-Benob ti remarke ki lafors fizik David ti’n diminyen, i ti “mazinen pour frap David a mor.” Me apre, zis avan ki sa zean ti kapab frap David avek son lepe pour touy li, “deswit, Abisai garson Tserouiya ti al kot [David] pour ed li, i ti frap sa Filisten a mor e touy li.” (2 Sam. 21:15-17) Pa i ti’n sov li zis a tan! David ti’n bezwen vreman kontan ki Abisai ti’n zet en koudey lo li e vin ed li deswit ler i ti vreman bezwen li akoz son lavi ti an danze, pa i vre! Ki leson nou kapab tire avek sa resi?

14. (a) Ki mannyer nou kapab fer fas avek bann gro defi? (b) Ki mannyer bann ansyen i kapab ed lezot reganny lafors e retrouv zot lazwa? Donn legzanp.

¹⁴ Dan lemonn antye, konman pep Zeova, nou pe kontinyen akonplir nou minister, malgre tou bann lobstak ki Satan ek son bann reprezantan i met dan nou semen. Serten parmi nou dan pep Bondye in fer fas avek bann defi ki preski parey bann zean. Me nou’n met nou konfyans dan Zeova e sa in ed nou pour ranport laviktwar lo bann “Golyat” letan modern. Toudmenm, parler, sa lalit kontinyel ki nou bezwen fer pour reziste presyon sa lemonn i kapab fer nou fatige ouswa dekouraze. Ler nou koumsa, nou san defans e menm an danze pour ganny ‘frape’ avek bann presyon ki normalman nou ti pou’n kapab reisi sirmonte. Dan bann moman parey, ler bann ansyen i ed nou zis a tan, sa i ed nou reganny nou lazwa ek lafors parey bokou in eksperyanse. En pionye dan son 65 an ti dir: “En pe letan pase, mon pa ti santi mwan tro tro byen e mon ti epwize apre predikasyon. En ansyen ti remarke ki mon ti preski napa ditou lafors e i ti apros mwan. Nou ti annan en konversasyon ankourazan baze lo enn de verse Labib. Mon ti aplik bann sizesyon ki i ti donn mwan e mon ti benefisye en kantite.” I ti azoute: “Sa ansyen ti vreman demontre lanmour anver mwan ler i ti remark mon kondisyon e donn mwan sa led neseser.” Wi, i vreman tousan pour konnen ki nou annan bann ansyen ki vey lo nou e ki parey Abisai, zot pare pour ‘vin ed nou.’

“SANTI SA GRAN LANMOUR KI MON ANNAN POUR ZOT”

15, 16. (a) Akoz bann frer ek ser Kretyen ti kontan Pol en kantite? (b) Akoz nou kontan nou bann ansyen dan kongregasyon?

¹⁵ Konman berze, en ansyen i bezwen travay dir. Parler, zot mank sonmey aswar pe priye akoz konsern ki zot annan pour troupo Bondye ouswa akoz zot donn sipor spirityel zot bann frer ek ser. (2 Kor. 11:27, 28) Kantmenm sa, bann ansyen i antyerman desarz zot responsabilite e kontan pour fer li zis parey Pol. I ti ekrir bann Korentyen: “Mwan mon pare pour depans tou, menm depans mwanmenm pour zot lam.” (2 Kor. 12:15) Vreman, akoz son lanmour pour zot, Pol ti donn tou pour fortifye zot. (Lir 2 Korentyen 2:4; Fili. 2:17, NW; 1 Tesa. 2:8) I pa drol ki bann frer ek ser ti kontan Pol en kantite.​—Akt 20:31-38.

¹⁶ Nou osi, konman bann serviter Zeova ozordi, nou kontan bann ansyen ki pran swen avek nou e nou remersye Zeova dan lapriyer pour sa provizyon ki I’n fer. Zot fer nou annan plis lazwa ankor ler zot demontre lentere personnel dan nou. Nou ganny rekonforte en kantite avek zot bann vizit. An plis ki sa, nou vreman rekonesan ki zot touzour pare pour vin ed nou dan bann moman kot nou santi nou anba bokou presyon avek sa lemonn. Sa bann ansyen i vreman bann ‘ki travay ansanm avek nou pour nou lazwa.’

[Not anba lo paz]

[Portre lo paz 27]

[Portre lo paz 30]

Preparasyon i ed en ansyen pour “partaz . . . bann kado spirityel” avek bann frer ek ser ki i vizite