En nouvo Lemonn dapre Promes Bondye

PAROL Bondye, Labib, i donn nou en lespwar ler i dir: “Nou pe espere dapre son promes en nouvo lesyel ek en nouvo later kot pou annan lazistis.”—2 Pyer 3:13.

Kwa sa “nouvo lesyel”? Labib i asosye lesyel avek lotorite. (Akt 7:49) Sa “nouvo lesyel” i en nouvo gouvernman ki pou diriz later. I nouvo akoz i pou ranplas sa bann gouvernman. I osi en nouvo devlopman dan plan Bondye. I sanmenm sa Rwayonm lo ki Zezi ti ansenny nou pour priye. (Matye 6:10) Vi ki sa Rwayonm i pour Bondye e li i reste dan lesyel, alor sa Rwayonm i ganny apele “Rwayonm lesyel.”—Matye 7:21.

Kwa sa “nouvo later”? I pa en lot later, vi ki Labib i klerman dir ki sa later pou ganny abite pour touzour. Sa “nouvo later” i en nouvo sosyete imen. I pou nouvo akoz bann move dimoun pou’n ganny retire. (Proverb 2:21, 22) Tou dimoun ki pou viv sa letan pou onor e obeir Kreater e pou viv an armoni avek son standar. (Psonm 22:27) Dimoun dan tou pei pe ganny envite pour aprann sa ki Bondye i ekspekte zot fer e pour viv zot lavi an akor avek sa ki Bondye i ekspekte konmela menm. Eski ou pe fer sa?

Dan nouvo lemonn Bondye, tou dimoun pou respekte Son lotorite. Eski lanmour pour Bondye i pous ou pour obeir li? (1 Zan 5:3) Eski sa i evidan dan ou lakour, kot travay, oubyen kot lekol? Eski i evidan dan fason ki ou pe servi ou lavi?

Dan sa nouvo lemonn, bann dimoun pou ador sa vre Bondye dan linite. Eski ou ador Kreater lesyel ek later? Eski ou larelizyon i vreman fer ou ini avek lezot adorater dan tou nasyon, ras, ek langaz?—Psonm 86:9, 10; Izai 2:2-4; Tsefanya 3:9.

[Bwat lo paz 17]

Sa Bondye ki promet sa bann Keksoz

I Kreater lesyel ek later. I sa enn ki Zezi Kri ti idantifye konman sa “sel vre Bondye.”—Zan 17:3.

Laplipar dimoun i onor bann bondye ki zot in fer zot menm. Plizyer milyon zot i tonm azenou devan bann stati ki napa lavi. Lezot i glorifye bann lorganizasyon imen, keksoz materyel, filozofi, oubyen zot prop dezir. Menm bann ki dir zot servi Labib pa onor non sa enn ki Labib i idantifye konman sa “vre Bondye.”—Deterononm 4:35.

Kreater i dir sa lo li menm: “Mwan Zeova. Sa i mon non.” (Izai 42:5, 8) Dan langaz ki Labib ti ganny ekrir, sa non i aparet plis ki 7,000 fwa. Zezi Kri ti ansenny son bann disip pour priye: “Nou Papa ki dan lesyel ki ou non sen i ganny glorifye.”—Matye 6:9.

Ki kalite personnalite sa vre Bondye i annan? Zeova i dekrir li konman en Bondye ki “mizerikord, e bon, pa ankoler vitman e ranpli avek labonte leker ek laverite.” I osi en Bondye ki pa pou toler bann ki volonterman rezet son bann komannman. (Egzod 34:6, 7) Fason ki Zeova in azir avek imen i prouve ki sa deskripsyon lo li i vre.

Sa non ek sa Bondye ki sa non i prezante i bezwen ganny glorifye, oubyen ganny vwar konman sen. Konman Kreater ek Sef Siprenm liniver, nou merit obeir li e ador zis li tousel. Eski ou obeir e ador li?

[Bwat/Portre lo paz 18]

Ki Sanzman “en nouvo Lesyel ek en nouvo Later” pou anmennen?

Later pou ganny transformen dan en Paradi Lik 23:43

Travay satisfezan, dekwa manze Izai 25:6; 65:17, 21-23

[Bwat/Portre lo paz 19]

Eski ou pou vreman benefisye?

Bondye pa zanmen manti!—Tit 1:2.

Zeova i dir: “Mon parol . . . pa pou retourn kot mwan san rezilta, me i pou sirman akonpli sa ki mon’n pran plezir ladan, e i pou sirman annan sikse dan sa ki mon’n anvoy li.”—Izai 55:11.

Zeova pe deza kree “en nouvo lesyel ek en nouvo later.” Sa gouvernman dan lesyel i deza pe fonksyonnen. Sa fondasyon pour sa “nouvo later” in deza fini ganny etablir.

Apre ki i’n mansyonn serten keksoz merveye ki “en nouvo lesyel ek en nouvo later” pou anmennen pour limanite, Zeova li menm, Sef Siprenm liniver, i dir dan liv Revelasyon: “Lala mon refer tou keksoz a-nef.” Apre i ti dir, “Ekri, sa bann parol i serten e i vre.”—Revelasyon 21:1, 5.

Kestyon byen enportan ki nou devret poz nou lekor i, eski mwan, mon pe fer sanzman neseser pour Zeova vwar mwan merite form parti sa “nouvo later” anba sa “nouvo lesyel”?