PWEN 6

Montre akoz ou pe servi en verse

Zan 10:33-36

KI OU BEZWEN FER: Pa zis lir en verse Labib e apre al lo en lot pwen. Fer sir ki lodyans i konpran byen ki mannyer sa verse ki ou’n lir i relye avek sa pwen ki ou pe fer resorti.

KI MANNYER POUR FER LI:

Met lanfaz lo bann mo enportan. Apre ki ou’n lir en verse Labib, met lanfaz lo bann mo ki relye direkteman avek ou pwen prensipal. Ou kapab fer sa par repet sa bann mo enportan oubyen par demann en kestyon ki pou fer lodyans idantifye sa bann mo.

Si ler ou pe eksplike, ou servi lezot mo ki pa dan sa verse, fer sir ki lodyans pou fasilman konpran ki mannyer sa bann mo ki dan sa verse Labib i relye avek ou pwen prensipal.
Met lanfaz lo sa pwen. Si ou’n dir lodyans akoz ou pe al lir en verse, eksplike ki mannyer sa bann mo enportan dan sa verse i relye avek sa rezon akoz ou pe lir sa verse.

Anmezir ki ou eksplik sa verse, kit ou Labib ouver. Sa i ed lodyans pour vwar ki mannyer sa ki ou pe dir i relye avek sa ki ou fek lir.
Fer en laplikasyon senp. Evite koz lo bann pti detay ki napa nanryen pour fer avek pwen prensipal. Depandan lo sa ki lodyans i deza konnen lo sa size, deside ki kantite lenformasyon ou pou servi pour fer laplikasyon sa verse pour ki lodyans i fasilman konpran sa pwen.