Lasirans

I NORMAL pour en orater santi li nerve ler i debout pour koze, sirtou si i pa fer bann diskour souvan. En proklanmater i kapab santi li enpe nerve dan bann premye konversasyon pour lazournen dan predikasyon. Ler i ti ganny ordonnen pour vin en profet, Zeremi ti reponn: “La mon vreman pa konnen konman pour koze, akoz mon zis en garson.” (Zer. 1:5, 6) Zeova ti ed Zeremi, e i pou ed ou osi. Avek letan, ou kapab devlop lasirans.

En orater ki annan lasirans i enn ki kalm. Sa kalm i evidan dan lafason ki i konport son lekor. Lafason ki i kondwir son lekor i natirel e apropriye avek sa lokazyon. Son bann mouvman lanmen i fer sans. Son lavwa i eksprim bann santiman e i anba kontrol.

Kantmenm ou kapab santi ki sa deskripsyon lo en dimoun ki annan lasirans i pa dekrir sa ki ou ete, ou kapab amelyore. Konman? Annou egzaminen akoz en orater i santi li nerve e mank lasirans. Lakoz i kapab lo nivo fizik.

Ler ou pe fer fas avek en defi e anvi fer byen me ou pa asire ki ou pou kapab, ou santi ou enkyet. Sa i kapab fer ki laservel i sinyal lekor pour prodwir plis adrenalin. Rezilta sa logmantasyon adrenalin se en batman leker pli vit, en sanzman dan lavites respirasyon, ogmant transpirasyon, oubyen menm fer lanmen, zenou osi byen ki lavwa tranble. Ou lekor pe esey ed ou pour fer fas avek ou sitiasyon par ogmant lakantite lenerzi disponib. Problenm se konnen konman pour kontrol sa ogmantasyon lenerzi pour byen reflesir e fer en prezantasyon vivan.

Konman pour redwir Lenkyetid. Mazinen ki i normal pour ou santi serten lenkyetid. Sepandan pour ou gard ou lasirans, ou bezwen arive kapab redwir nivo lenkyetid e fer fas avek ou sitiasyon dan en fason kalm e diny. Konman ou kapab akonpli sa?

Prepar oprofon. Envesti letan pour prepar ou ekspoze. Fer sir ki ou klerman konpran ou size. Si ou ekspoze i enn kot ou ki swazir bann pwen pour diskite, pran an konsiderasyon sa ki ou lodyans i deza konnen konsernan sa size e sa ki ou ekspekte akonpli. Sa pou ed ou swazir lenformasyon ki pli itil. Si okonmansman ou trouv sa difisil, diskit sa problenm avek en orater eksperyanse. I kapab ed ou fer en analiz konstriktif lo ou lenformasyon e lo lodyans. Ler ou asire ki ou annan lenformasyon ki pou benefisye ou lodyans e sa lenformasyon i byen kler dan ou lespri, sa lanvi ki ou annan pour partaz sa lenformasyon pou konmans kouver sa lenkyetid ki ou kapab santi ler ou mazin pour prezant ou ekspoze devan lezot.

Akord en latansyon spesyal lo ou lentrodiksyon. Ou bezwen konnen ki mannyer ou pou konmans sa ekspoze. Enn fwa ki ou ekspoze in demare, i tre probab ki ou lenkyetid pou diminyen.

Sa bann diferan letap i osi aplik ler ou pe prepar pour predikasyon. Pa konsider selman sa size ki ou deside diskite me osi kalite dimoun ki ou pou donn temwannyaz avek. Plàn avek swen ou lentrodiksyon. Tir benefis atraver leksperyans bann proklanmater matir.

Petet ou kapab santi ki ou pou annan plis lasirans si ou ekrir tou keksoz ki ou pou dir ler pe donn en ekspoze devan en group. An realite, sa i kapab anmenn plis lenkyetid a sak fwa ki ou donn en ekspoze. I vre ki serten orater i servi bokou not, tandis ki lezot i servi en pti gin. Me sa ki pou vreman sanz keksoz ki ou konsantre lo la e redwir nivo ou lenkyetid, se pa bann mo lo papye, me sa konviksyon dan ou leker ki sa ki ou’n prepare pour ou lodyans i vreman itil.

Egzers ou prezantasyon aotvwa. En tel legzersis pou donn ou konfyans ki ou kapab eksprim bann lide ki ou’n prepare. Anmezir ki ou egzerse, ou lespri pe anrezistre keksoz ki pou fasilman revin an memwar ler ou pe fer ou prezantasyon. Fer ou sesyon legzersis reel. Imazin ou lodyans. Asize deryer en latab oubyen debout, zis parey ou pou fer ler ou prezant sa ekspoze.

Priy pour led Zeova. Eski i pou reponn en tel lapriyer? “E sa se lasirans ki nou annan dan li: si nou demann keksoz dapre son lavolonte, i pou ekout nou.” (1 Zan 5:14) Si ou dezir se pour onor Bondye e pour ed dimoun benefisye atraver son Parol, Zeova pou sirman reponn en tel lapriyer. Sa lasirans i kapab kontribye bokou pour ed ou reisi prezant ou ekspoze byen. Anplis ki sa, anmezir ki ou kiltiv bann fri lespri—lanmour, lazwa, lape, douser, ek kontrol lo ou lekor—ou pou devlop latitid mantal ki neseser pour tret bann sitiasyon avek lasirans.—Gal. 5:22, 23.

Ganny leksperyans. Pli ou partisip dan predikasyon, pli ou pou santi ou mwen nerve. Pli ou fer komanter dan bann renyon kongregasyon, pli i pou fasil pour koz devan lezot. Anmezir ki lakantite ekspoze ki ou donnen dan kongregasyon i ogmante, nivo lenkyetid ki ou gannyen avan sak ekspoze pou tre probab diminyen. Eski ou ti pou oule plis loportinite pour koze? Alor ou kapab volonterman ranplas lezot dan lekol ki pa kapab fer zot ekspoze.

Apre ki ou pran sa bann pa ki’n ganny dekrir, ou pou trouv li itil pour egzamin bann sentonm ki definitivman montre en mank lasirans. Idantifye bann sentonm e aprann konman pour fer fas avek zot pou ed ou koz avek lasirans. Bann sentonm i kapab fizik oubyen dan lavwa.

Bann Sentonm fizik. Si ou annan lasirans, oubyen si ou napa, sa i ganny demontre par lafason ou konport ou lekor e lafason ki ou servi ou lanmen. Konsider premyerman lanmen. Atrap lanmen par deryer, tenir li sere lo kote, tyonbo for pipit; met lanmen plizyer fwa dan pos, atas oubyen detas bouton palto, tous lazou, nennen, linet; lanmen pe zwe avek en mont, en kreyon, en bag oubyen bann papye; bann zes lanmen ki souden oubyen ki konmanse e pa fini—tousala i demontre en mank lasirans.

Mank konfyans i kapab osi ganny endike par konstaman trenn lipye, balans lekor lo sak kote lipye, fason debout ki tro drwat, enpe tro apiye dan en fason neglizan, souvan pe mouy lalev, pe anval plizyer fwa, e respir vitman e kourt.

Avek zefor konsyansye sa bann manifestasyon nerve i kapab ganny kontrole. Travay lo zis enn alafwa. Idantifye en problenm, e konsider byen boner sa ki ou bezwen fer pour anpes li. Si ou fer sa zefor, ou pou donn levidans lasirans dan ou konportman fizik.

Bann Sentonm Lavwa. Bann levidans vokal ki endike ki en dimoun i nerve i kapab enkli en ton lavwa ki tre o oubyen ki pe tranble. Petet pour plizyer fwa ou eklersi lagorz oubyen koz tro vit. Sa bann problenm ek manni i kapab ganny konkerir par zefor serye pour anmenn lavwa anba kontrol.

Si ou santi ou nerve, avan ki ou al lo lestrad pran detrwa gran respirasyon. Esey relaks ou lekor antye. Olye zis mazin ki ou nerve, konsantre lo akoz ou anvi partaz avek ou lodyans sa bann keksoz ki ou’n prepare. Avan konmans koze, pran en moman pour get ou lodyans, swazir en figir zantiy, e sourir. Pa koz vitman dan ou lentrodiksyon, e apre konsantre dan ou ekspoze.

Ki ou ekspektasyon. Pa ekspekte ki tou santiman nerve pour disparet. Bokou orater avek bokou lannen leksperyans lo lestrad zot santi nerve avan ki zot mont devan en lodyans. Sepandan, zot in aprann kontrol zot kondisyon.

Si ou fer en zefor senser pour elimin levidans ki ou nerve, ou lodyans pou konsider ou konman en orater ki annan lasirans. Ou kapab pe kontinyen santi ou nerve, me i kapab ki ou lodyans pa okouran sa ditou.

Mazinen, ki en ogmantasyon adrenalin ki koz bann sentonm nerve i osi anmenn plis lenerzi. Servi li pour koz avek santiman.

I pa neseser ki ou esper ziska ler ki ou al lo lestrad pour egzers tou sa bann keksoz. Aprann pour annan lasirans ek kontrol e pour koz avek santiman apropriye dan ou lavi toulezour. Si ou fer sa bann keksoz, zot pou kontribye bokou anver donn ou konfyans lo lestrad e dan predikasyon, landrwa kot i pli enportan.