Primera a los Corintios
8 Weno, tiʼ tojlel jiñi bʌlñʌcʼʌl tsaʼix bʌ aqʼuenti jiñi melbil tac jach bʌ dios, añix chuqui la cujil chaʼan tac bʌ iliyi. Jiñi yujil tac bʌ chaʼan bʌ iliyi miʼ qʼuel i bʌ ti ñuc, pero jiñi yujil bʌ cʼuxbiya miʼ pʼʌtʼan. 2 Mi an muʼ bʌ i ñaʼtan chaʼan an chuqui yujil, maxto wen yujilic cheʼ bajcheʼ cʼamel yom miʼ ñaʼtan. 3 Pero mi an muʼ bʌ i cʼuxbin Dios, cʌmbilʌch tiʼ tojlel.
4 Weno, chaʼan mi yom miʼ cʼuxtʌl jiñi bʌlñʌcʼʌl tsaʼix bʌ aqʼuenti jiñi melbil jach bʌ dios, la cujil chaʼan jiñi melbil tac jach bʌ dios maʼañic i cʼʌjñibal ti pañimil yicʼot chaʼan juntiquil jach Dios an. 5 Come, anquese poj cabʌl diosob ti panchan yicʼot ti pañimil, cheʼ bajcheʼ cabʌl «diosob» yicʼot cabʌl «yumʌlob», 6 tiʼ sujm, chaʼañonla an jach juntiquil Dios, jiñi Tatʌl, baqui miʼ tilel pejtelel chuqui an yicʼot i chaʼañoñʌchla, i juntiquil jach lac Yum, Jesucristo, tiʼ tojlel tsaʼ mejli pejtelel chuqui tac an i tiʼ tojlel cuxulonla jaʼel.
7 Pero mach tiʼ pejtelelobic yujilob iliyi. Chaʼtiqui uxtiquil miʼ cʼuxob ili bʌlñʌcʼʌl i cheʼ yilal miʼ qʼuelob bajcheʼ aqʼuebil bʌ jiñi melbil tac jach bʌ dios come ti ñaxan miʼ chʼujutesañob jiñi mach bʌ i sujmic dios, i jiñi i concienciajob miʼ bibʼan come maxto pʼʌtʌlic. 8 Pero jiñi bʌlñʌcʼʌl maʼañic miʼ ñumen lʌcʼtesañonla ti Dios. Mi maʼañic mi laj cʼux lac waj, mach ñumen lecojic añonla, i mi mucʼʌch laj cʼux lac waj, mach ñumen weñic añonla. 9 Pero yom tsajaletla,* anquese an ti laʼ wenta laʼ yajcan chuqui laʼ wom, mach yomic mi laʼ wʌcʼ ti yajlel jiñi cʼuñoʼ bʌ. 10 Come, cheʼ añic majqui miʼ qʼuelet, jatet wen a wujil bʌ, chaʼan woliyet ti uchʼel tiʼ templo mach bʌ i sujmic dios tac, ¿mach ba añic miʼ mejlel i ñijcʌben i conciencia jiñi cʼun bʌ chaʼan miʼ cʼux jiñi bʌlñʌcʼʌl aqʼuebil bʌ jiñi melbil tac jach bʌ dios? 11 Tiʼ caj jiñi wen a wujil bʌ miʼ jejmel i ñopoñel jiñi cʼun bʌ, juntiquilʌch a wermañu i Cristo tsaʼ chʌmi tiʼ tojlel. 12 Cheʼ bʌ jatetla mi laʼ chaʼlen mulil tiʼ tojlel laʼ wermañu bajcheʼ iliyi yicʼot mi laʼ ticʼlan jiñi cʼuñoʼ bʌ i conciencia, woli laʼ chaʼlen mulil tiʼ contra Cristo. 13 Jin chaʼan, mi jiñi bʌlñʌcʼʌl miʼ yʌcʼ ti yajlel jiñi quermañu, maʼañix baʼ ora mi caj j cʼux weʼel chaʼan maʼañic mi cʌcʼ ti yajlel jiñi quermañu.