Colosenses
2 Come com mi laʼ cʌn bajcheʼ cʼamel woli c ñop j coltañetla, jatetla añetbʌla ti Laodicea yicʼot pejtelel jiñi maxto bʌ i ñoj qʼueleyoñob. 2 Jiñi com bʌ jiñʌch cheʼ mic ñuqʼuesʌbeñetla laʼ pusicʼal yicʼot chaʼan ti laʼ pejtelel utsʼat temeletla ti cʼuxbiya i mi laʼ taj pejtelel jiñi bendición tac muʼ bʌ i tajtʌl cheʼ mucʼʌch laʼ wen ñop ti jiñi muʼ bʌ laʼ chʼʌmben i sujm, chaʼan mi laʼ cʌn ti tsʼʌcʌl jiñi chʼujul bʌ tʼan mucul bʌ i chaʼan Dios: Jiñi Cristo. 3 Yaʼ wen mucul pejtelel jiñi ñaʼtʌbalʌl wen ñuc tac bʌ i cʼʌjñibal yicʼot pejtelel chuqui miʼ mejlel laj cʌn. 4 Mic subeñetla iliyi chaʼan maʼañic majqui miʼ tʌtsʼetla* loqʼuel yicʼot lot tac. 5 Anquese mach yaʼic ñoj añon quicʼotetla, jiñi c ñaʼtʌbal yaʼʌch an ti laʼ tojlel, tijicña mi cubin cheʼ bʌ mij qʼuel chaʼan wen bajcheʼ añetla yicʼot cheʼ bʌ mij qʼuel jiñi laʼ xucʼtʌlel ti laʼ ñopoñel ti Cristo.
6 Jin chaʼan, cheʼ bajcheʼ tsaʼ laʼ chʼʌmʌ jiñi lac Yum Cristo Jesús, chʌn chaʼlenla xʌmbal laʼ wicʼot. 7 Cheʼ bajcheʼ tsaʼix laʼ cʌñʌ, jiñi laʼ ñopoñel ti Cristo yom miʼ pʼʌtʼesañetla i miʼ xucʼchocoñetla bajcheʼ juntejc teʼ tam bʌ ochem i wiʼ ti lum. Jiñi laʼ ñopoñel yom wen tsiquil cheʼ bʌ mi laʼ wʌqʼuen wocolix i yʌlʌ Dios.
8 Yom tsajaletla* chaʼan maʼañic majqui miʼ chuquetla* tiʼ ñaʼtʌbal ili pañimil yicʼot ti ñaʼtʌbalʌl tac mach bʌ i sujmic i maʼañic bʌ i cʼʌjñibal chucul bʌ tiʼ costumbre tac wiñicob, ti chuqui tac ñuc bʌ i cʼʌjñibal i chaʼan jiñi pañimil i mach yaʼic ti Cristo. 9 Pejtelel jiñi melbal tac am bʌ i chaʼan Dios laj an tiʼ tojlel Cristo. 10 Jin chaʼan jatetla tsʼʌcʌlix chuqui an laʼ chaʼan tiʼ coltaya, i jol bʌ pejtelel yumʌl yicʼot am bʌ i yeʼtel. 11 Chaʼan bajcheʼ añetla laʼ wicʼot tsaʼ tsepbentiyetla laʼ pʌchʌlel* pero mach jiñic jiñi melbil bʌ tiʼ cʼʌb wiñicob, jiñʌch jiñi tsep pʌchʌlel i chaʼan bʌ Cristo, ili jiñʌch cheʼ mi laj cʌy jiñi lac bʌcʼtal xmulil bʌ. 12 Come jatetla tsaʼ mujquiyetla laʼ wicʼot tiʼ chʼʌmjaʼ,* i chaʼan bajcheʼ añetla laʼ wicʼot, tsaʼ chʼojyesʌntiyetla* laʼ wicʼot chaʼan laʼ ñopoñel ti jiñi i pʼʌtʌlel Dios, jiñi tsaʼ bʌ i chʼojyesa yaʼ baqui an chʌmeñoʼ bʌ.
13 Cheʼ jaʼel, anquese lon chʌmeñetla tiʼ caj laʼ mul yicʼot tiʼ caj mach tsepbilic laʼ pʌchʌlel, Dios tsiʼ yʌqʼueyetla laʼ cuxtʌlel laʼ wicʼot Cristo. Yicʼot i yutslel tsiʼ ñusʌbeyonla pejtelel lac mul 14 i tsiʼ yʌpʌ loqʼuel jiñi jun tsʼijbubil bʌ ti cʼʌbʌl baqui miʼ tilel mandar tac yicʼot am bʌ ti laj contra. Tsiʼ locʼsa ti lac tojlel cheʼ bʌ tsiʼ chʼiji* ti jiñi teʼ chaʼan bʌ wocol.* 15 Yicʼot iliyi, tsiʼ mʌlbe* jiñi yumʌlob yicʼot añoʼ bʌ i yeʼtel i tsiʼ jamʌ pʌsʌyob tiʼ wut lac piʼʌlob chaʼan tsiʼ mʌlbeyob i tsiʼ pʌyʌyob majlel bajcheʼ xcʌjchelob.
16 Jin chaʼan, maʼañic majqui yom miʼ chaʼlen meloñel ti laʼ tojlel tiʼ caj chuqui mi laʼ cʼux yicʼot chuqui mi laʼ jap, o tiʼ caj mi laʼ mel jumpʼejl qʼuiñijel, chaʼan bʌ jumpʼejl tsijiʼ bʌ uw o chaʼan bʌ sábado. 17 Pejtelel jiñi i yʌxñal jach jiñi muʼto bʌ caj i tilel, pero jiñi i sujm bʌ bʌcʼtalʌl jiñʌch Cristo. 18 Mach yomic miʼ mʌctañetla chaʼan mi laʼ taj laʼ majtan mi juntiquilic wiñic muʼ bʌ i poj pʌs i pecʼlel yicʼot muʼ bʌ i mulan i chʼujutesʌntel ti ángelob, mucʼ jach i chucob i bʌ ti chuqui miʼ taj i qʼuelob i miʼ chañʼesañob i bʌ tiʼ caj jiñi i ñaʼtʌbal mach bʌ añic i cʼʌjñibal 19 i mach chuculobic ti jiñi jolʌl, jiñi muʼ bʌ i yʌqʼuen chuqui i cʼʌjñibal i chaʼan jiñi bʌcʼtalʌl, jiñʌch muʼ bʌ i yʌcʼ chaʼan temel miʼ yajñel jujunchajp am bʌ i chaʼan, i Dios miʼ yʌcʼ ti colel pejtelel jiñi bʌcʼtalʌl tiʼ coltaya.
20 Mi jatetla tsaʼ chʌmiyetla laʼ wicʼot Cristo tiʼ chaʼan bʌ pejtelel chuqui i cʼʌjñibal bʌ i chaʼan pañimil, ¿chucoch cheʼto bej chumuletla cheʼ bajcheʼ i chaʼañettola pañimil? ¿Chucoch wolito laʼ bej jacʼ jiñi mandar tac 21 «mach a chʼʌm, mach a mitsʼtian,* mach a tʌl»? 22 Pejtelel iliyi woli jach i taj ti tʼan chuqui tac miʼ jilel cheʼ bʌ miʼ cʼʌjñel. I mandar tac yicʼot i cʌntesa tac wiñicob. 23 Ili mandar tac mucʼʌch i poj aqʼueñonla lac ñaʼtʌbal yilal, pero maʼañic miʼ coltan jiñi lac piʼʌlob chaʼan miʼ contrajiñob chuqui yomob i bʌcʼtal. Iliyi miʼ yujtel come jiñi lac piʼʌlob i bajñelob jach miʼ ñaʼtañob bajcheʼ yom miʼ chʼujutesañob Dios, mucʼ jach i poj pʌsob chaʼan añob i pecʼlel i miʼ yʌcʼob ti wocol jiñi i bʌcʼtal.