Primera a los Corintios
3 Jin chaʼan, hermanojob, maʼañic tsaʼ mejli c pejcañetla bajcheʼ jiñi chumuloʼ bʌ cheʼ bajcheʼ yom jiñi chʼujul bʌ espíritu, tsaʼ c pejcayetla bajcheʼ jiñi chumuloʼ bʌ cheʼ bajcheʼ yomob i bʌcʼtal, cheʼ bajcheʼ jiñi alʌlobto bʌ ti Cristo. 2 Ti ñaxan cojaxto leche tsaʼ cʌqʼueyetla, maʼañic tsaʼ cʌqʼueyetla yambʌ bʌlñʌcʼʌl come maxto wen pʼʌtʌleticla. Tiʼ sujm, maxto wen pʼʌtʌleticla cʼʌlʌl ili ora, 3 bej chumulettola bajcheʼ yom laʼ bʌcʼtal. ¿Maʼañic ba woli laʼ mel cheʼ bajcheʼ yom laʼ bʌcʼtal i cheʼetla bajcheʼ jiñi lac piʼʌlob ti pañimil cheʼ bʌ an michʼ pusicʼal yicʼot leto* ti laʼ tojlel? 4 Cheʼ bʌ juntiquil miʼ yʌl «Joñon i chaʼañon Pablo», pero yambʌ miʼ yʌl «Joñon i chaʼañon Apolos», ¿mach ba cheʼic woli laʼ mel bajcheʼ jiñi yambʌ lac piʼʌlob?
5 ¿Chuquiyes jiñi Apolos? ¿Chuquiyes jiñi Pablo? Xʼeʼtelob tsaʼ bʌ i coltayetla chaʼan mi laʼ sujtel ti xñoptʼan, cheʼʌch bajcheʼ tsiʼ yʌqʼueyob i mel ti jujuntiquilob jiñi lac Yum. 6 Joñon tsaʼ c pʌcʼʌ, Apolos tsiʼ mulu, pero Dios tsiʼ bej acʼʌ ti colel, 7 jin chaʼan mi jiñic ñuc i cʼʌjñibal jiñi muʼ bʌ i chaʼlen pacʼ mi jiñic jiñi muʼ bʌ i mul, cojach Dios, jiñi muʼ bʌ i yʌcʼ ti colel. 8 Jiñi xpacʼ yicʼot jiñi muʼ bʌ i mul juntiquilob jach,* pero jujuntiquil mi caj i taj i chobejtʌbal cheʼ bajcheʼ tsiʼ chaʼle eʼtel. 9 Come joñon lojon mi lon c tem chaʼlen eʼtel lon quicʼot Dios. Jatetla jiñi lum woli bʌ i cʼʌn ti eʼtel Dios, jiñi otot tsaʼ bʌ i mele Dios.
10 Chaʼan jiñi ñuc bʌ i yutslel Dios tsaʼ bʌ i pʌsbeyon, joñon tsaʼ c techbe i yebal jiñi otot bajcheʼ juntiquil wen yujil bʌ melol, pero yambʌyix woliʼ bej mel majlel. Ti jujuntiquil laʼ i qʼuel bajcheʼ woliʼ mel majlel jiñi eʼtel. 11 Come maʼañic majqui miʼ mejlel i melben yambʌ i yebal, cojach jiñi yaʼix bʌ an, Jesucristo. 12 Weno, tajol an majqui miʼ mejlel i cʼʌn oro, plata, utsʼatax bʌ xajlel tac,* teʼ, xan yicʼot jam chaʼan miʼ bej mel majlel jiñi otot. 13 Muʼto caj i tsictiyel chuqui tsiʼ cʼʌñʌ i mel i yeʼtel jujuntiquil. Cheʼ tiʼ yorajlel* wocol mi caj i pʌstʌl come ti cʼajc mi caj i tsictiyel, jiñi cʼajc mi caj i pʌs bajcheʼ yilal jiñi eʼtel tsaʼ bʌ i mele jujuntiquil. 14 Mi mucʼʌch i cuch jiñi otot tsaʼ bʌ i mele juntiquil ti jiñi i yebal waʼchocobilix bʌ, mi caj i yʌqʼuentel i chobejtʌbal. 15 Mi jiñi eʼtel tsaʼ bʌ i mele juntiquil miʼ pulel, mi caj i sʌt, pero mucʼʌch caj i taj i coltʌntel. Pero lajal bajcheʼ jiñi muʼ bʌ i putsʼel loqʼuel ti cʼajc.
16 ¿Mach ba laʼ wujilic chaʼan i templojetla Dios yicʼot chaʼan jiñi i yespíritu an ti laʼ tojlel? 17 Mi an majqui miʼ jisʌben i templo Dios, Dios mi caj i jisan come chʼujul jiñi i templo, i jatetla i templojetla.
18 Maʼañic majqui yom miʼ lotin i bʌ: Mi an juntiquil ti laʼ tojlel muʼ bʌ i ñaʼtan chaʼan wen an i ñaʼtʌbal ti ili pañimil, laʼ sujtic ti mach bʌ añic i ñaʼtʌbal chaʼan miʼ wen taj i ñaʼtʌbal. 19 Come tiʼ tojlel Dios maʼañic i cʼʌjñibal i ñaʼtʌbal ili pañimil, come tsʼijbubil: «Dios miʼ yʌcʼ chaʼan jiñi wen añoʼ bʌ i ñaʼtʌbal miʼ chaʼ bajñel yajlelob tiʼ yac». 20 Tsʼijbubil jaʼel: «Jehová* yujil chaʼan maʼañic i cʼʌjñibal chuqui miʼ ñaʼtañob jiñi wen añoʼ bʌ i ñaʼtʌbal». 21 Jin chaʼan, maʼañic majqui yom chan miʼ yubin i bʌ tiʼ caj jiñi lac piʼʌlob come laʼ chaʼañʌch pejtelel chuqui an: 22 Mach yʌlʌyic mi Pablo, Apolos, Cefas,* jiñi pañimil, jiñi cuxtʌlel, jiñi chʌmel, jiñi an tac bʌ ili ora o jiñi talto bʌ. Luʼ laʼ chaʼañʌch. 23 I jatetla i chaʼañetla Cristo, i Cristo i chaʼañʌch Dios.