Segunda a Timoteo
1 I chaʼan Pablo, apóstol i chaʼan Cristo Jesús come cheʼʌch yom Dios chaʼan jiñi tʼan wʌn albil bʌ chaʼan bʌ jiñi cuxtʌlel muʼ bʌ i tajtʌl cheʼ bʌ miʼ tsajcʌntel Cristo Jesús, 2 tiʼ tojlel Timoteo, juntiquil cʼuxbibil bʌ calobil:
Taja jiñi ñuc bʌ i yutslel, i pʼuntaya yicʼot i ñʌchʼtʌlel Dios jiñi lac Tat yicʼot i chaʼan jiñi lac Yum Cristo Jesús.
3 Mi cʌqʼuen wocolix i yʌlʌ Dios, muʼ bʌ c melben chʼujul bʌ i yeʼtel cheʼ bajcheʼ tsiʼ mele c ñojteʼelob i yicʼot sʌc bʌ j conciencia, i chʌn cʼajal c chaʼañet cheʼ mic pejcan Dios ti wocol tʼan ti qʼuiñil yicʼot ti acʼʌlel. 4 Cheʼ bʌ mij cʼajtesan bajcheʼ tsaʼ beqʼue i yaʼlel a wut, wen com jax j qʼuelet chaʼan mi cubin c tijicñʌyel. 5 Come mij cʼajtesan jiñi i sujm bʌ a ñopoñel, tsaʼ bʌ i ñaxan pʌsʌ jiñi a chuchuʼ* Loida yicʼot jiñi a mamá Eunice, i cujil chaʼan añʌch a chaʼan jaʼel.
6 Jin chaʼan, mij cʼajtesʌbeñet chaʼan maʼ pʼʌtʼesan bajcheʼ cʼajc jiñi majtan tilem bʌ ti Dios tsaʼ bʌ aqʼuentiyet cheʼ bʌ tsaʼ cʌcʼʌ j cʼʌb ti a tojlel. 7 Come Dios maʼañic tsiʼ yʌqʼueyonla jiñi espíritu chaʼan bʌ bʌqʼuen, jiñʌch chaʼan bʌ jiñi pʼʌtʌlel, cʼuxbiya yicʼot wem bʌ lac ñaʼtʌbal. 8 Jin chaʼan mach a quisñin a sub jiñi wen tʼan tiʼ tojlel lac Yum yicʼot mach a quisñin a bʌ tic tojlel, xcʌjchel lon bʌ tiʼ caj. Yom chajpʌbilet chaʼan maʼ ñusan jiñi wocol tac yom bʌ maʼ ñusan tiʼ caj jiñi wen tʼan i chʌn ñopo ti jiñi i pʼʌtʌlel Dios. 9 Jiñʌch tsiʼ coltayonla i tsiʼ pʌyʌyonla chaʼan mi lac sujtel ti chʼujul, pero mach chaʼañic chuqui tac tsaʼ lac mele, chaʼañʌch cheʼ yom i mel yicʼot chaʼan jiñi ñuc bʌ i yutslel. Iliyi wajalix tsaʼ pʌsbentiyonla tiʼ tojlel Cristo Jesús, 10 pero wʌle ñumen tsiquilix come tsaʼix i pʌsʌ i bʌ jiñi la caj Coltaya, Cristo Jesús. Tsiʼ jisʌbe i pʼʌtʌlel jiñi chʌmel, i tiʼ coltaya jiñi wen tʼan tiʼ tsictesʌbeyonla bajcheʼ mi lac taj laj cuxtʌlel yicʼot lac bʌcʼtal mach bʌ yujilic ocʼmʌn.* 11 Jin chaʼan tsaʼ waʼchocontiyon bajcheʼ xsubtʼan, apóstol yicʼot xcʌntesa.
12 Jin chaʼan woli cubin pejtelel ili wocol, pero maʼañic mij quisñin c bʌ. Come j cʌñʌyʌch jiñi muʼ bʌ c ñop, i cujil chaʼan jin miʼ mejlel i cʌntan pejtelel tsaʼ bʌ cʌqʼue tiʼ wenta cʼʌlʌl ti jiñi bʌ qʼuin. 13 Chʌn tsajcan jiñi ejemplo chaʼan jiñi i sujm bʌ tʼan* tsaʼ bʌ c subeyet i chʌn pʌsʌ jiñi a ñopoñel yicʼot a cʼuxbiya bajcheʼ juntiquil lac piʼʌl temel bʌ yicʼot Cristo Jesús. 14 Tiʼ coltaya jiñi chʼujul bʌ espíritu am bʌ ti lac tojlel, cʌntan jiñi wen lets bʌ i tojol tsaʼ bʌ aqʼuentiyet ti a wenta.
15 A wujilix chaʼan pejtelel jiñi wiñicob chʼoyoloʼ bʌ ti jiñi tejclum Asia tsiʼ cʌyʌyoñob, yaʼ ochem jaʼel Figelo yicʼot Hermógenes. 16 Jiñi lac Yum laʼ i pʌsbeñob pʼuntaya jiñi añoʼ bʌ tiʼ yotot Onesíforo, come tsiʼ chʌn tijicñesa c pusicʼal i maʼañic tsiʼ quisñi i bʌ tiʼ caj cʌchʌlon ti cadena. 17 Cheʼ bʌ wʌʼan ti Roma, maʼañic tsaʼ lujbʼa i sʌclañon jinto tsiʼ tajayon. 18 Jiñi lac Yum laʼ i yʌcʼ chaʼan miʼ taj jiñi pʼuntaya tilem bʌ ti Jehová* ti jiñi qʼuin waʼchocobil bʌ. Wʌleʼli a wujilix pejtelel chuqui tsiʼ mele tic tojlel yaʼ ti Éfeso.