Apocalipsis
4 Ti wiʼil tsaʼ j qʼuele jumpʼejl puerta jamʌl bʌ yaʼ ti panchan, i jiñi ñaxam bʌ tʼan tsaʼ bʌ cubi chaʼan woliʼ pejcañon lajal bajcheʼ i tʼan trompeta. Tiʼ subeyon: «Letsen tilel, mi caj c pʌsbeñet jiñi yom tac bʌ miʼ yujtel». 2 Cheʼ bʌ tsaʼ ujti j qʼuel jiñi, tsaʼ bʌcʼ tili i yespíritu Dios tic tojlel. I cheʼ jiñi tsaʼ j qʼuele jumpʼejl trono yaʼ ti panchan, i an majqui buchul yaʼ ti trono. 3 I jiñi buchul bʌ yaʼi cheʼ yilal bajcheʼ jiñi xajlel* i cʼabaʼ jaspe yicʼot sardio,* i yaʼ tiʼ joytʌlel jiñi trono an jumpʼejl arcoíris cheʼ bʌ yilal bajcheʼ jiñi xajlel i cʼabaʼ esmeralda.
4 Yaʼ tiʼ joytʌlel jiñi trono an yambʌ 24 trono, i tsaʼ j qʼuele chaʼan yaʼ buchulob 24 anciano. Lʌpʌlob i chaʼan sʌsʌcoʼ bʌ i pislel i yaʼ tiʼ jolob añob i corona melbil bʌ ti oro. 5 Yaʼ ti trono miʼ loqʼuel i cʼʌcʼal chajc, tʼan tac yicʼot chajc, i tiʼ tojel jiñi trono an 7 lámpara am bʌ i cʼʌcʼal. Ili i wentʌlelʌch jiñi 7 i yespíritu Dios. 6 Tiʼ tojel jiñi trono an chuqui an lajal bʌ bajcheʼ jumpʼejl mar cheʼ bʌ yilal bajcheʼ vidrio, lʌcʼʌ lajal bajcheʼ cristal.
Tiʼ yojlil jiñi trono* yicʼot tiʼ joytʌlel an chʌntiquil querubín cabʌloʼ bʌ i wut tiʼ joytʌlel i bʌcʼtal. 7 Jiñi ñaxam bʌ querubín lajal bajcheʼ juncojt león, jiñi i chaʼticlel querubín lajal bajcheʼ juncojt tat wacax maxto bʌ ñoxic, jiñi i yuxticlel querubín lajal i ñiʼ i wut bajcheʼ juntiquil wiñic i jiñi i chʌnticlel querubín lajal bajcheʼ juncojt xiyeʼ* woli bʌ ti wejlel. 8 Jujuntiquil querubín an 6 i wichʼ, cabʌl bʌ i wut tiʼ malil yicʼot tiʼ pat. I tiʼ pejtelel ora, ti qʼuiñil yicʼot ti acʼʌlel, miʼ yʌlob: «Chʼujul, chʼujul, chʼujul Jehová* Dios, jiñi Mach bʌ añic i pʼisol i pʼʌtʌlel, jiñi añix bʌ cʼʌlʌl ti wajali, jiñi am bʌ ili ora yicʼot muʼ bʌ caj i tilel».
9 Jajayajl jiñi querubiñob miʼ yʌqʼueñob cabʌl i ñuclel yicʼot wocolix i yʌlʌ jiñi yaʼ bʌ buchul ti trono, jiñi cuxul bʌ tiʼ pejtelel ora, 10 jiñi 24 ancianojob miʼ ñocchocoñob i bʌ tiʼ tojlel jiñi buchul bʌ yaʼ ti trono i miʼ chʼujutesañob jiñi cuxul bʌ tiʼ pejtelel ora. Cheʼ bʌ woliʼ yʌcʼob jiñi i corona tiʼ tojel jiñi trono, miʼ yʌlob: 11 «Jehová,* jatet c Dioset lojon, yom bʌ maʼ wʌqʼuentel cabʌl a ñuclel yicʼot a pʼʌtʌlel, come jatet tsaʼ mele pejtelel chuqui an, i tsaʼ mejli pejtelel chuqui an come cheʼʌch a wom».*