Apocalipsis

14 Cheʼ jiñi tsaʼ j qʼuele jiñi Tiñʌmeʼ waʼal yaʼ ti wits Sion, i yaʼañob jaʼel jiñi 144 mil tsʼijbubiloʼ bʌ tiʼ pam jiñi i cʼabaʼ Tiñʌmeʼ yicʼot i cʼabaʼ jiñi i Tat. 2 An chuqui tsaʼ cubi tsaʼ bʌ i subu i bʌ yaʼ ti panchan, cheʼ bajcheʼ miʼ sub i bʌ cabʌl jaʼ yicʼot cheʼ bajcheʼ miʼ sub i bʌ cʼam bʌ chajc. Jiñi tsaʼ bʌ cubi lajal bajcheʼ i cʼay jiñi xcʼayob cheʼ bʌ woliʼ ñijcañob jiñi arpa. 3 Woliʼ cʼʌyiñob tsijiʼ bʌ cʼay yilal tiʼ tojel jiñi trono, tiʼ tojel jiñi chʌntiquil querubín yicʼot tiʼ tojel jiñi ancianojob. Maʼañic majqui miʼ mejlel i ñop ti wen jiñi cʼay, cojach jiñi 144 mil tsaʼ bʌ mʌjñiyob loqʼuel ti pañimil. 4 Ili jiñobʌch jiñi mach bʌ añic tsiʼ bibʼesayob i bʌ yicʼotob xʼixic, tiʼ sujm, sʌc tsaʼ ajñiyob. Jiñobʌch muʼ bʌ i tsajcañob majlel jiñi Tiñʌmeʼ baqui jach miʼ majlel. Tsaʼ mʌjñiyob loqʼuel ti pañimil bajcheʼ ñaxam bʌ i wut pʌcʼʌbʌl chaʼan Dios yicʼot chaʼan jiñi Tiñʌmeʼ, 5 i maʼañic tsiʼ wis chaʼleyob lot, maʼañobic i sajtemal.

6 Tsaʼ j qʼuele yambʌ ángel woli bʌ ti wejlel yaʼ tiʼ yojlil panchan.* An i chaʼan wen tʼan muʼ bʌ jalijel tiʼ pejtelel ora chaʼan miʼ suben jiñi añoʼ bʌ ti pañimil: Tiʼ pejtelel ñuqui tejclum, pʼolbalʌl tac, tʼan tac yicʼot alʌ tejclum tac. 7 Woliʼ yʌl ti cʼam bʌ tʼan: «⁠Bʌcʼñanla Dios yicʼot aqʼuenla i ñuclel, come tsaʼix cʼoti i yorajlel chaʼan miʼ chaʼlen meloñel. Jin chaʼan chʼujutesanla jiñi tsaʼ bʌ i mele panchan, lum, mar yicʼot i pasibal jaʼ».

8 Cheʼ jiñi tsaʼ tili i chaʼticlel ángel, woli bʌ i yʌl: «¡Tsaʼix yajli! ¡Jiñi Ñuc bʌ Babilonia tsaʼix yajli! Jiñi tsaʼ bʌ i yʌcʼʌ chaʼan pejtelel tejclum miʼ japob jiñi vino muʼ bʌ i wen aqʼueñob i mulan tsʼiʼlel».*

9 Yambʌ ángel, i yuxticlel, tiʼ tsajcayob majlel, i woliʼ yʌl ti cʼam bʌ tʼan: «Mi an muʼ bʌ i chʼujutesan jiñi jontol bʌ bʌteʼel yicʼot i yejtal, i miʼ yʌqʼuentel jumpʼejl marca tiʼ pam o tiʼ cʼʌb, 10 mi caj i jap jaʼel jiñi vino chaʼan bʌ i michʼajel Dios, tsaʼ bʌ jejbi yaʼ ti copa chaʼan bʌ i michʼajel i maʼañic chuqui xʌcʼbil yicʼot, mi caj i yʌqʼuentel i ñusan wocol ti cʼajc yicʼot ti azufre tiʼ tojel i wut jiñi chʼujul bʌ ángelob yicʼot jiñi Tiñʌmeʼ. 11 Jiñi i butsʼil jiñi wocol* mi caj i letsel tiʼ pejtelel ora. I jiñi muʼ bʌ i chʼujutesañob jiñi jontol bʌ bʌteʼel yicʼot i yejtal yicʼot jiñi muʼ bʌ i yʌqʼuentelob i marcajlel i cʼabaʼ maʼañic mi caj i cʼajob i yo mi ti qʼuiñilic mi ti acʼʌlelic. 12 Jin chaʼan jiñi chʼujuloʼ bʌ, muʼ bʌ i jacʼbeñob i mandar Dios yicʼot tsʌts bʌ miʼ chucob i bʌ tiʼ ñopoñel ti Jesús, yom miʼ cuchob wocol».

13 Tsaʼ cubi jumpʼejl tʼan tilem bʌ ti panchan i woliʼ yʌl: «Tsʼijbun iliyi: ‹Cʼʌlʌl ili ora, tijicñayob jiñi muʼ bʌ i chʌmelob bajcheʼ xcʌntʼañob i chaʼan lac Yum. Jiñi espíritu miʼ yʌl, cheʼʌchi, laʼ i cʼajob i yo ti tsʌts bʌ i yeʼtelob, come Dios miʼ cʼajtesan chuqui tac tsiʼ meleyob›».

14 Cheʼ jiñi tsaʼ j qʼuele jumpʼejl sʌsʌc bʌ tocal, yaʼ ti tocal yaʼ buchul cheʼ bʌ yilal bajcheʼ i yalobil wiñic, yaʼ tiʼ jol an i corona melbil bʌ ti oro i yaʼ tiʼ cʼʌb an jay bʌ i yeʼtijib.

15 Tsaʼ loqʼui yambʌ ángel yaʼ ti chʼujul bʌ ajñibʌl am bʌ yaʼ ti templo i ti cʼam bʌ tʼan tiʼ sube jiñi yaʼ bʌ buchul ti tocal: «¡Techex a cʼʌn jiñi a weʼtijib* i tsepe jiñi trigo, tsaʼix cʼoti i yorajlel chaʼan miʼ tempʌntel, come cʼʌñix i wut jiñi a pʌcʼʌb am bʌ ti pañimil!». 16 I jiñi yaʼ bʌ buchul ti tocal tsiʼ yotsa jiñi i yeʼtijib ti pañimil, i jiñi trigo am bʌ ti pañimil tsaʼ tempʌnti.

17 Tsaʼ loqʼui yambʌ ángel yaʼ ti chʼujul bʌ ajñibʌl am bʌ yaʼ ti templo yaʼ ti panchan, an i chaʼan jumpʼejl jay bʌ i yeʼtijib jaʼel.

18 Yaʼ ti pulʌntib tsaʼ loqʼui yambʌ ángel, am bʌ i pʼʌtʌlel tiʼ tojlel jiñi cʼajc. I ti cʼam bʌ tʼan tiʼ sube jiñi am bʌ i chaʼan jiñi jay bʌ i yeʼtijib: «¡Techex a cʼʌn jiñi jay bʌ a weʼtijib i lotox jiñi tsocʼol tac bʌ uva ti pañimil, come cʼʌñix jiñi uva!». 19 Jiñi ángel tsiʼ yotsa i yeʼtijib ti pañimil i tiʼ tsepe jiñi uva, i tsiʼ choco ochel yaʼ baqui miʼ tʼuchtʌntel* jiñi uva i wentʌlel bʌ i michʼajel Dios. 20 Jiñi uva tsaʼ tʼuchtʌnti yaʼ tiʼ jumpatlel jiñi tejclum, i tsaʼ loqʼui chʼichʼ yaʼ baqui miʼ tʼuchtʌntel jiñi uva i jiñi chʼichʼ yaʼ jaxʌl tsaʼ cʼoti baqui an i frenojlel i yej jiñi caballo tac i lʌcʼʌ 296 kilómetro* i ñajtlel.