Hebreos
8 Weno, jiñi ñumen ñuc bʌ i cʼʌjñibal ti jiñi woli bʌ la cʌl jin iliyi: An lac chaʼan juntiquil ñumen ñuc bʌ sacerdote cheʼ bʌ bajcheʼ jiñi, i tsaʼ buchle yaʼ tiʼ ñoj jiñi Ñuc bʌ Dios yaʼ ti panchan, 2 xyaj eʼtel ti jiñi chʼujul bʌ ajñibʌl yicʼot ti jiñi i sujm bʌ pisil bʌ otot tsaʼ bʌ i mele Jehová* i mach jiñic wiñicob. 3 Come pejtelel jiñi ñumen ñuc bʌ sacerdotejob waʼchocobilob chaʼan miʼ yʌcʼob majtañʌl tac yicʼot tsʌnsʌbil bʌ añimal tac, jin chaʼan ili ñumen ñuc bʌ sacerdote wersa an chuqui yom miʼ yʌcʼ bajcheʼ majtañʌl jaʼel. 4 Cheʼ wʌʼic an ti lum, mach sacerdotejic, come añix wiñicob muʼ bʌ i yʌcʼob jiñi majtañʌl tac cheʼ bajcheʼ miʼ yʌl jiñi Mandar. 5 Jiñi chʼujul bʌ eʼtel muʼ bʌ i melob ili wiñicob jiñʌch junchajp muʼ bʌ i pʌs an tac bʌ ti panchan yicʼot i yʌxñalʌch, cheʼ bajcheʼ miʼ yʌl jiñi mandar tsaʼ bʌ aqʼuenti Moisés tiʼ tojlel Dios cheʼ bʌ muqʼuix caj i mel jiñi pisil bʌ otot: «Wen qʼuele chaʼan cheʼʌch maʼ mel cheʼ bajcheʼ jiñi tsaʼ bʌ pʌsbentiyet yaʼ ti wits». 6 Pero wʌle, Jesús tsaʼix aqʼuenti jumpʼejl ñumen wem bʌ eʼtel, come xcoltaya jaʼel chaʼan jumpʼejl ñumen wem bʌ trato, ili trato miʼ taj i bʌ yicʼot jiñi mandar i tsʌts xucʼchocobil ti jiñi ñumen wen tac bʌ tʼan tsaʼ bʌ ajqʼui.
7 Cheʼ machic tsaʼ tajle chuqui mach weñic ti jiñi ñaxam bʌ trato, mach wersajic tsaʼ ajqʼui jiñi i chaʼpʼejlel trato. 8 Come tsiquil chaʼan Dios miʼ qʼuelben i sajtemal jiñi tejclum cheʼ bʌ miʼ yʌl: «Jehová* miʼ yʌl ‹Qʼuele, lʌcʼʌlix jiñi i yorajlel chaʼan mic mel jumpʼejl tsijiʼ bʌ trato quicʼot jiñi tejclum Israel yicʼot jiñi tejclum Judá. 9 Mach cheʼic bajcheʼ jiñi trato tsaʼ bʌ c mele quicʼot laʼ ñojteʼelob ti jimbʌ qʼuin cheʼ bʌ tsaʼ c chucuyob tiʼ cʼʌb chaʼan mic locʼsañob ti Egipto. Mach xucʼulobic tsaʼ ajñiyob ti jiñi c trato, jin chaʼan tsaʼ j cʌyʌ j cʼojoʼtañob›,* cheʼen Jehová».*
10 «Jehová* miʼ yʌl: ‹Jiñi trato muʼ bʌ caj c mel quicʼot jiñi tejclum Israel cheʼ bʌ ñumeñix jiñi qʼuin tac jin iliyi. Mi caj cʌcʼ tiʼ ñaʼtʌbalob jiñi c mandar tac i mi caj c tsʼijbubeñob tiʼ pusicʼal. Joñon mi caj c sujtel tiʼ Diosob i mi caj i sujtelob tic tejclum›».
11 «‹I maʼañix majqui mi caj i cʌntesan jiñi i piʼʌlob yicʼot jiñi i yermañujob cheʼ bʌ miʼ subeñob: «¡Cʌñʌ Jehová!».* Come mi caj i laj cʌñoñob, jiñi alʌlobto bʌ yicʼot añobix bʌ i jabilel. 12 I joñon mi caj c pʌs c pʼuntaya anquese miʼ melob mach bʌ tojic, i maʼañix mi caj c chʌn cʼajtesan jiñi mulil tac tsaʼ bʌ i meleyob›».
13 Cheʼ tsiʼ taja ti tʼan «jumpʼejl tsijiʼ bʌ trato» tsiʼ jisʌbe i cʼʌjñibal jiñi ñaxam bʌ. Weno, jiñi tsaʼix bʌ jisʌnti i cʼʌjñibal yicʼot ñoxix bʌ tsʼitaʼ yom chaʼan miʼ jilel.