Miʼ wen michʼan i miʼ tsʌnsan i yijtsʼin

Cheʼ bʌ Adán yicʼot Eva tsaʼ loqʼuiyob yaʼ ti pʌcʼʌbʌl am bʌ ti Edén, tsaʼ tiliyob i yalobil. I cʼabaʼ jiñi ñaxam bʌ jiñʌch Caín i miʼ pʌcʼ chuqui tac cʼuxbil. I chaʼticlel jiñʌch Abel i miʼ cʌntan tiñʌmeʼ.

Ti jumpʼejl bʌ qʼuin, Caín yic’ot Abel tiʼ yʌqʼueyob i majtan Jehová. Utsʼatax tsiʼ qʼuelbe i chaʼan Abel, pero i chaʼan Caín mach cheʼiqui. Jin chaʼan tsaʼ wen michʼa Caín, i Jehová tiʼ sube: «Mi maʼañic maʼ cʌy a michʼajel mi caj a mel mach bʌ weñic». Pero Caín maʼañic tsiʼ chʼujbi.

Caín tiʼ sube Abel: «Conla ti jamil». Cheʼ i bajñelob jach, Caín tsiʼ contraji i yijtsʼin i tiʼ tsʌnsa. ¿Chuqui tsiʼ mele (chaʼle) Jehová? Tsiʼ yʌqʼue i toj i mul Caín cheʼ bʌ wen ñajt ti choco majlel baʼan i familia. Maʼañix miʼ mejlel ti chʌn cʼotel.

¿Chuqui mi laj cʌn? Mi lac mejlel ti michʼan mi an chuqui mach toj miʼ loqʼuel bajcheʼ laʼ com. Mi woli (choncol) lac bej michʼan mi la cubin o mi an majqui miʼ qʼuelonla chaʼan wen michʼonla, yom mi laj qʼuextan lac bʌ. Mi maʼañic chuqui mi lac mel ti ora, jiñi lac melbal miʼ mejlel i yʌqʼueñonla lac mel mach bʌ weñic.

Abel ti wen cʼuxbi Jehová yicʼot utsʼat ti chaʼle i bʌ, jin chaʼan Jehová mi caj i chʌn cʼajtesan. Dios mi caj i chaʼ aqʼuen i cuxtʌlel cheʼ bʌ miʼ sujtesan ti paraíso ili pañimil.