Jiñi chʌmeñoʼ bʌ mi caj i chaʼ tejchelob

¿Cʼajal baʼ chaʼan jiñi Gail, tsaʼ bʌ lac taja ti tʼan ti i chaʼpʼejlel temaj ti ili revista? Mach yujilic mi mucʼʌch caj i ñumel i chaʼan cheʼ tsaʼ chʌmi (sajti) i ñoxiʼal i cʼabaʼ Rob. Pero wen yomix chaʼan miʼ cʼotel jiñi qʼuin cheʼ miʼ chaʼ qʼuel yaʼ ti tsijiʼ bʌ pañimil (mulawil) albil bʌ i chaʼan Dios. Miʼ yʌl: «Jiñi texto muʼ bʌ c wen mulan jiñʌch Apocalipsis [Revelación] 21:3, 4». Yaʼi miʼ yʌl: «Mi caj i yajñel Dios yicʼotob. Dios mi caj i sujcubeñob i yaʼlel i wut. Maʼanix majch miʼ caj ti chʌmel. Maʼanix ucʼtaya mi uqʼuel mi wocol tiʼ pejtelel ora. Come tsaʼix ñumi jini ñaxan tac bʌ».

Gail miʼ bej al: «Ili texto wen tsiquil miʼ yʌl chuqui miʼ cajel ti talto bʌ qʼuin. Mic wen pʼuntan am bʌ majqui chʌmeñob i chaʼan yicʼot mach bʌ i cʌñʌyobic jiñi pijtaya». Gail miʼ pʌs chaʼan mucʼʌch i ñop chuqui miʼ yʌl cheʼ miʼ ñumen aqʼuen i yorajlel i suben i piʼʌlob ti chumtʌl chaʼan ti talto bʌ qʼuin, Dios miʼ yʌl chaʼan «maʼanix majch miʼ caj ti chʌmel».

Tajol ñajal jach maʼ ñaʼtan. Pero ñaʼtancu tiʼ tojlel Job, tsaʼ bʌ wen cʼamʼa (Job 2:7). Anquese tsaʼ cʼoti i ñaʼtan chʌmel, tsiʼ ñopo chaʼan Dios mi caj i chaʼ tejchesan chaʼan miʼ chaʼ chumtʌl wʌʼ ti Pañimil. Jin chaʼan tsiʼ yʌlʌ: «Utsʼat muqʼuic a mucon yicʼot jiñi chʌmeñoʼ bʌ [...], mi caj c jacʼ baʼ ora maʼ pʌyon, come tiʼ yutslel a pusicʼal mi caj a cʼajtesan a winic tsaʼ bʌ a mele» (Job 14:13, 15). Cheʼ bajcheʼ mi laj qʼuel, Job wen yujil chaʼan Dios mi caj i chaʼ aqʼuen i cuxtʌlel.

Cheʼʌch mi caj i mel Dios tiʼ tojlel Job yicʼot yonlel wiñicob xʼixicob (quixtañujob) cheʼ bʌ miʼ sujtesan ti jumpʼejl paraíso ili Pañimil (Lucas 23:42, 43). Jiñi Biblia miʼ yʌl: «Mi caj i chʼojyelob jini chʌmeñoʼ bʌ» (Hechos 24:15). Jesús tsiʼ yʌlʌ jaʼel: «Mach yomic miʼ toj sajtel laʼ pusicʼal chaʼan jini c tʼan, come tal i yorajlel cheʼ mi caj i yubibeñob i tʼan i Yalobil Winic jini añoʼ bʌ ti mucoñibʌl. [...] mi caj i chʼojyelob loqʼuel» (Juan 5:28, 29). Job mi caj i qʼuel ti tsʼʌctiyel ili tʼan. Cheʼ jiñi «mi caj i chaʼ wenʼan. Lajal mi caj i sujtel i bʌcʼtal bajcheʼ chʼiton, wen chʼejl bʌ» (Job 33:24, 25). Cheʼʌch miʼ cajel tiʼ tojlel muʼ bʌ i ñopob chaʼan Dios mucʼʌch caj i chaʼ tejchesan jiñi quixtañujob wʌʼ ti Pañimil.

Mi an majqui chʌmen a chaʼan, ili tsaʼ bʌ laj qʼuele maʼañic mi caj i jisan jiñi i cʼuxel muʼ bʌ a wubin. Pero mi tsaʼ wen ñaʼta chuqui miʼ yʌl yaʼ ti Biblia chaʼan muʼ bʌ caj i mel Dios, mi caj i yʌqʼueñet a pijtaya yicʼot a pʼʌtʌlel chaʼan maʼ chʌn chaʼlen wersa (1 Tesalonicenses 4:13).

¿A wom baʼ ñaʼtan chuqui tac yambʌ miʼ mejlel a mel chaʼan miʼ ñumel majlel a chaʼan i cʼuxel? ¿O am baʼ cʼajtibe a bʌ chucoch miʼ yʌcʼ ti ujtel Dios jiñi jontolil yicʼot ilaya wocol? Mi cheʼʌchi, ochen yaʼ ti lon c página ti Internet www.jw.org/ctu i yaʼʌch mi caj a tajben i jacʼbal yicʼot ticʼojel tac loqʼuem bʌ ti Biblia ñuc tac bʌ i cʼʌjñibal.