I wʌn ñaʼtʌntel jiñi talto bʌ qʼuin

¿Am baʼ cʼajtibe a bʌ chuqui mi caj i yujtel ti a tojlel yicʼot a familia? ¿Muʼ ba caj i wen pʼojlel laʼ chubʌʼan yicʼot mi caj laʼ wen cʼuxbintel, o pʼumpʼun mi caj laʼ ñusan yicʼot laʼ bajñel jach mi caj laʼ wubin laʼ bʌ? ¿Jal ba mi caj laʼ chumtʌl, o ti orajach mi caj laʼ chʌmel (sajtel)? Cʼʌlʌl ti wajali miʼ cʼajtibeñob i bʌ bajcheʼ iliyi.

Ili ora, jiñi wen yujiloʼ bʌ miʼ tsajiñob chuqui tac miʼ yujtel, i miʼ ñopob i wʌn ñaʼtan chuqui mi caj i yujtel. An tacʌch muʼ bʌ i tsʼʌctiyel, pero an maʼañic bʌ. Jumpʼejl ejemplo, cheʼ ti 1912, Guglielmo Marconi, tsaʼ bʌ i mele lajal bʌ bajcheʼ jumpʼejl radio maʼañix bʌ miʼ cʼʌn cable, tsiʼ yʌlʌ: «Pejtelel jiñi guerra mi caj i jilel cheʼ miʼ tejchel ti cʼʌjñel jiñi radio». Juntiquil ñuc bʌ i yeʼtel ti jumpʼejl empresa chaʼan música i cʼaba Decca Record maʼañic tsiʼ yʌqʼue eʼtel jumpʼejl grupo i cʼaba Beatles cheʼ ti 1962, come tsiʼ ñaʼta chaʼan jiñi muʼ bʌ i ñijcañob guitarra maʼañic miʼ cajelob ti wen cʌjñel.

Cabʌl muʼ bʌ i majlelob ti xwujt chaʼan miʼ ñaʼtañob jiñi talto bʌ qʼuin. An muʼ bʌ i majlelob baʼañob jiñi xqʼuel ecʼ, i cabʌl revista yicʼot periódico baʼ miʼ wen ajlel chaʼan bʌ horóscopo. Cheʼ jaʼel, an muʼ bʌ i majlelob baʼan muʼ bʌ i cʼʌñob carta tac, número tac o i pachʼtilel laj cʼʌb chaʼan miʼ poj ñaʼtañob chuqui mi caj i yujtel.

Ti wajali, an muʼ bʌ i sʌclañob i coltʌntel ti xmotomajob cʌmbiloʼ bʌ bajcheʼ oráculo, jiñobʌch muʼ bʌ i pejcañob dios tac. Cheʼʌch tsiʼ mele jiñi rey ti Lidia i cʼabaʼ Creso. Chaʼan miʼ majlel i contrajin Ciro, rey bʌ ti Persia, tsiʼ ñaxan chocbe majlel wen tac bʌ i majtan jiñi oráculo i chaʼan Delfos (Grecia) come yom i ñaʼtan bajcheʼ mi caj i yujtel jiñi guerra. Creso tsaʼ subenti chaʼan mi tsaʼ majli tiʼ contra Ciro, mi caj i jisan jumpʼejl «pʼʌtʌl bʌ tejclum». Tsiʼ lon ñaʼta chaʼan mucʼʌch caj i mʌl (jot), pero jiñi tsaʼ bʌ jisʌnti, jiñʌch i tejclum.

Tsaʼ bʌ i yʌlʌ jiñi oráculo tsaʼʌch tsʼʌctiyi yubil, pero maʼañic i cʼʌjñibal come mach wen tsiquilic tsiʼ yʌlʌ majqui mi caj i mʌl jiñi guerra. Creso wen letsʌch tsiʼ tojo come tsaʼ jisʌnti. ¿Ñumen wem ba añob jiñi muʼ bʌ i sʌclañob i coltʌntel tiʼ pejtelel chuqui miʼ cʼʌjñel chaʼan miʼ ñaʼtʌntel jiñi talto bʌ qʼuin?