¿Bajcheʼ tsaʼ tejchi ti sujbel jiñi wen tʼan chaʼan i Yumʌntel Dios yaʼ ti Portugal?

JIÑI jaʼ am bʌ ti jiñi océano Atlántico woli (choncol) i jatsʼ jiñi barco woli bʌ i majlel ti Europa. Juntiquil majlel bʌ mucʼ ti jiñi barco jiñʌch George Young, i woli (yʌquel) i cʼajtesan yicʼot i tijicñʌyel chuqui tac tsiʼ taja ti jiñi eʼtel (troñel) chaʼan i Yumʌntel Dios ti Brasil.a Pero cheʼ bʌ wolito i majlel tsaʼ caji i ñaʼtan jiñi tsijiʼ bʌ i yeʼtel yaʼ ti España yicʼot Portugal. Ilayi maxto wen ujtemic jiñi subtʼan. Cheʼ bʌ miʼ cʼotel, tsiʼ ñaʼta i chajpan discurso tac loqʼuem bʌ ti Biblia muʼ bʌ caj i ñusan jiñi hermano Joseph F. Rutherford yicʼot mi caj i puc 300 mil tratado.

Jiñi hermano Young tsaʼ cʼoti ti Lisboa (Portugal) ti 1925. Ti jiñi bʌ ora wen cabʌl wocol ti jiñi país. Jiñi Guerra ti 1910 tsiʼ yʌcʼʌ ti jilel i pʼʌtʌlel jiñi rey yicʼot chuqui tac an i chaʼan jiñi Iglesia Católica. Jiñi tejclum tijicña añob come librejob, pero ti jiñi país bej anto wocol tac.

Cheʼ bʌ George Young luʼ chajpʌbilix i chaʼan chaʼan jiñi hermano Rutherford miʼ yʌcʼ jiñi discurso, jiñi yumʌl tsiʼ waʼchoco jumpʼejl ñuc bʌ mandar tiʼ caj colel i contrajintel. Jiñi secretario i chaʼan jiñi Sociedad Bíblica Británica yicʼot Extranjera tsiʼ sube jiñi hermano chaʼan mi caj i taj cabʌl i contrajintel. Anquese tsaʼ subenti jiñi, tsiʼ cʼajti permiso chaʼan miʼ cʼʌn jiñi gimnasio i chaʼan bʌ jiñi Escuela Secundaria Camões, i tsaʼʌch aqʼuenti.

Tsaʼ cʼoti i yorajlel chaʼan miʼ ñusʌntel jiñi discurso cheʼ ti 13 i chaʼan mayo, wen wolix i pijtañob jiñi cʌntesʌntel. Jiñi welel tac bʌ jun am bʌ ti colem otot tac yicʼot jiñi periódico tac miʼ subob jiñi discurso am bʌ i temajlel: «¿Bajcheʼ miʼ mejlel lac chumtʌl tiʼ pejtelel ora ila ti Pañimil?». Jiñi añoʼ bʌ ti yambʌ ñopbal orajach tsiʼ locʼsayob tiʼ periódico jumpʼejl temaj chaʼan miʼ subeñob jiñi xpejcaya juñob chaʼan woliʼ cʼotel jiñi «lot bʌ xʼaltañob». Cheʼ jaʼel, tiʼ tiʼ jiñi gimnasio tsiʼ pucuyob jun tac baqui miʼ yʌl cʌntesʌntel tac mach bʌ lajalic yicʼot jiñi muʼ bʌ caj i tsictesan jiñi hermano Rutherford.

Anquese tsiʼ meleyob bajcheʼ jiñi, an cheʼ bʌ 2 mil wiñicob xʼixicob (quixtañujob) tsaʼ cʼotiyob ti jiñi gimnasio i an mach bʌ añix tsaʼ mejliyob ti ochel. An yom bʌ i ñaʼtañob chuqui mi caj i yʌjlel jin chaʼan tsaʼ cʼʌjquiyob ti escalera tac melbil bʌ ti lazo am bʌ tiʼ tsʼejtʌlel tac jiñi gimnasio i an tsaʼ bʌ buchleyob tiʼ pam muʼ bʌ i cʼʌjñel ti mejlel ejercicio tac.

Pero tsaʼ ujti wocol tac. Jiñi i contrajob tsiʼ chaʼleyob cʼam bʌ tʼan yicʼot tsiʼ xuluyob silla tac. Pero jiñi hermano Rutherford maʼañic tsiʼ chaʼle bʌqʼuen i tsaʼ letsi ti jumpʼejl mesa chaʼan jiñi quixtañujob miʼ ñʌchʼtañob. Cheʼ bʌ tsaʼix ujti jiñi discurso lʌcʼʌ ti xiñil acʼʌlel, ñumen ti 1,200 quixtañujob tsiʼ cʌyʌyob i cʼabaʼ yicʼot tiʼ subuyob baqui chʼoyolob chaʼan miʼ chocbentelob majlel jun tac loqʼuem bʌ ti Biblia. Cheʼ tiʼ yijcʼʌlel, jiñi periódico O Século tsiʼ taja ti tʼan jiñi discurso tsaʼ bʌ ñusʌnti.

Ti septiembre cheʼ ti 1925 yaʼ ti Portugal, tsaʼ tejchi ti locʼsʌntel tiʼ tʼan portugués jiñi La Torre del Vigía, muʼ bʌ i cʌjñel ili ora bajcheʼ jiñi Lac Tsictesʌbentel (ti jiñi bʌ ora ili revista muqʼuix i pujquel ti Brasil ti jiñi tʼan portugués). Ti jiñi bʌ ora, juntiquil xpejcaya Biblia chʼoyol bʌ ti Brasil i cʼabaʼ Virgílio Ferguson tsiʼ teche i chajpan i bʌ chaʼan miʼ majlel ti chumtʌl ti Portugal i miʼ coltan i sub jiñi wen tʼan chaʼan i Yumʌntel Dios. Tiʼ chaʼle eʼtel yicʼot George Young yaʼ ti alʌ sucursal i chaʼan jiñi xPejcaya bibliajob am bʌ ti Brasil. Virgílio yicʼot i yijñam i cʼabaʼ Lizzie, orajach tsaʼ majliyob ti Portugal chaʼan mi cʼotelob i chaʼ tajob. Weñʌch cheʼ tsaʼ cʼotiyob, come jiñi hermano Young mach jalix yom chaʼan miʼ loqʼuel majlel ti subtʼan ti yan tac bʌ país, bajcheʼ ti jiñi Unión Soviética.

Cheʼ bʌ jiñi soldadojob tsaʼ ochiyob bajcheʼ yumʌl ti jiñi país, tsaʼ ñumen caji jiñi contrajintel. Pero jiñi hermano Ferguson xucʼul tsaʼ ajñi. Tsiʼ ñumen qʼuele bajcheʼ miʼ mejlel i cʌntan jiñi junmojt xpejcaya bibliajob yicʼot chaʼan bajcheʼ miʼ mejlel i ñumen melbeñob i yeʼtel Jehová, i tsiʼ cʼajti permiso chaʼan miʼ mejlel i melob tempa bʌ tac tiʼ yotot. Ti octubre i chaʼan 1927, jiñi xʼeʼtelob tsaʼʌch i yʌqʼueyob.

Cheʼ bʌ ñumeñix jumpʼejl jab i chaʼleyob yumʌntel, cheʼ bʌ 450 quixtañujob tsiʼ yotsa i cʼabaʼ chaʼan miʼ chocbentelob cʼotel jiñi revista La Torre del Vigía. Cheʼ jaʼel, wocolix i yʌlʌ jiñi tratado yicʼot folleto tac, jiñi i sujmlel tsaʼ cʼoti i yubintel ti jiñi lum tac i chaʼan bʌ Portugal: Angola, Azores, Cabo verde, Goa (India), Madeira, Mozambique yicʼot Timor oriental.

Tiʼ jilibal jiñi jab 1929, tsaʼ cʼoti ti Lisboa juntiquil xcʌnta ñichteʼ i cʼabaʼ Manuel da silva Jordão, chʼoyol bʌ ti portugal. Cheʼ bʌ yaʼto chumul ti Brasil, tsiʼ ñʌchʼta jumpʼejl discurso tsaʼ bʌ i ñusa jiñi hermano Young. Orajach tsiʼ ñaʼta chaʼan jiñʌch i sujmlel, i tsiʼ ñaʼta ti pusicʼal chaʼan yom miʼ coltan jiñi hermano Young chaʼan miʼ sujbel majlel jiñi wen tʼan chaʼan i yumʌntel Dios. Jin chaʼan, jiñi Manuel tsaʼ ochi bajcheʼ colportor, ti jiñi bʌ ora cheʼʌch miʼ subentelob jiñi precursorob. Come wen chajpʌbil bajcheʼ woliʼ chaʼlentel ti imprimir yicʼot ti pujquel jiñi jun tac loqʼuem bʌ ti Biblia, jiñi congregación am bʌ ti Lisboa tsaʼ ñucʼa majlel.

Jiñi hermanojob Ferguson tsaʼ chaʼ sujtiyob ti Brasil ti 1934. Pero jiñi wen tʼan tsaʼix pujqui ti Portugal. Anquese jiñi wocol tsaʼ bʌ i ñusa jiñi Europa ti caj jiñi guerra tac tsaʼ bʌ ujti ti jiñi país yicʼot jiñi Segunda Guerra Mundial, jiñi hermanojob xucʼul tsaʼ ajñiyob ti chaʼan bʌ Dios. Ti jiñi bʌ ora, jiñi junmojt hermanojob lajalob bajcheʼ i ñich cʼajc. Pero cheʼ bʌ tsaʼ cʼoti jiñi ñaxam bʌ misionero tsajñi bʌ ti jiñi cʌntesʌntel chaʼan Galaad, i cʼabaʼ John Cooke cheʼ ti 1947 tsaʼ chaʼ pʼʌtʼayob, cheʼ bajcheʼ cʼajc. Cheʼ jiñi, tsaʼ caji ti ñucʼan jiñi xpejcaya bibliajob. I tsaʼ bej coli jiñi congregación anquese jiñi yumʌlob tsiʼ mʌctayob lac subtʼan ti 1962. Ti diciembre i chaʼan 1974, cheʼ bʌ jiñi yumʌlob tsiʼ yʌqʼueyob permiso jiñi i testigojob Jehová chaʼan miʼ subob jiñi wen tʼan, añix cheʼ bʌ 13,000 xsubtʼañob ti jiñi país.

Wʌle ora, ñumeñix ti 50,000 xsubtʼañob miʼ subob jiñi wen tʼan chaʼan i Yumʌntel Dios yaʼ ti Portugal yicʼot ti jiñi isla tac baqui yujilob jiñi tʼan portugués, bajcheʼ jiñi Azores yicʼot Madeira. Yicʼot yaʼ ochemob jaʼel i pʼolbal jiñi hermanojob tsaʼ bʌ i yubiyob jiñi discurso tsaʼ bʌ i ñusa jiñi hermano Rutherford ti 1925.

Mi cʌqʼuen lon wocolix i yʌlʌ Jehová yicʼot jiñi xucʼul bʌ hermanojob tsaʼ bʌ i pʌsʌyob i chʼejlel chaʼan tsiʼ subuyob jiñi wen tʼan ti jiñi bʌ ora, cheʼ bajcheʼ tsiʼ yʌlʌ jiñi Pablo, tsiʼ pʌsʌyob i yutslel chaʼan miʼ subob Cristo Jesús tiʼ tojlel gentilob (Ro. 15:15, 16). (Jiñi lotbil bʌ yaʼ ti Portugal).