Galleta tac chaʼan jiñi c tsʼiʼ
NICK, juntiquil wiñic chumul bʌ ti Oregón (Estados Unidos), tiʼ tsʼijbu: «Tiʼ tejchibal jiñi 2014 tsaʼ cajiyon ti loqʼuel ti xʌmbal quicʼot jiñi chaʼcojt c tsʼiʼ tiʼ centrojlel jiñi tejclum. Tiʼ pejtelel ora yaʼañob jiñi i testigojob Jehová ti jiñi carrito tac, wen qʼuextʌbilob i wen tijicña miʼ pejcañob majqui jach miʼ ñumelob».
«Jiñi Testigojob mach cojach utsob yicʼotob jiñi lac piʼʌlob, weñʌch chuqui tsiʼ meleyob jaʼel tiʼ tojlel jiñi c tsʼiʼ. Ti jumpʼejl bʌ qʼuin yaʼan ti jiñi carrito tac juntiquil xʼixic i cʼabaʼ Elaine, i tsiʼ yʌqʼue galleta jiñi chaʼcojt c tsʼiʼ. Cʼʌlʌl ti jimbʌ ora, cheʼ bʌ mic majlel lon ti xʌmbal yaʼi, jiñi c tsʼiʼ tac miʼ tujcʼañob i chʼajñal chaʼan miʼ majlelob yaʼ baqui tsaʼ aqʼuentiyob galleta».
«Tsaʼ ñumi majlel jiñi uw tac. Jiñi c tsʼiʼ tsaʼ caji i wen mulañob jiñi galleta tac, i joñon mic mulan c jumucʼ pejcañob jiñi Testigojob. Pero maʼañic mij cʌlʌx cotsan c bʌ yicʼotob. Ñumeñix ti 70 c jabilel i mach wen cujilic chuqui miʼ ñopob jiñi Testigojob. Come maʼañic tsaʼ c mulaj chuqui tac miʼ mel jiñi yan tac bʌ iglesia, tsaʼ c ñaʼta chaʼan ñumen wen cheʼ mic bajñel pejcan jiñi c Biblia».
«Ti jiñi bʌ ora tsaʼ caji j qʼuel yambʌ Testigojob ti jiñi carrito tac ti cabʌl parte ti jiñi tejclum. Wen utsob jaʼel. Tiʼ pejtelel ora miʼ jacʼob j cʼajtiya tac yicʼot jiñi Biblia, jin chaʼan tsaʼ caji c ñumen c ñop tiʼ tojlelob».
«Ti jumpʼejl bʌ qʼuin, Elaine tsiʼ cʼajtibeyon: ‹¿Muʼ ba a wʌl chaʼan jumpʼejl majtañʌl tsaʼ bʌ i yʌcʼʌ Dios jiñi añimal tac?›. Tsaʼ c jacʼbe: ‹Cheʼʌchi›. Cheʼ jiñi tsiʼ pejcʌbeyon Isaías 11:6-9. Cʼʌlʌl ti jimbʌ ora an chuqui tsaʼ qʼuextʌyi, anquese maxto añic tsaʼ caji c chʼʌm majlel jumpʼejl jun».
«Tsaʼ ñumi chaʼpʼej uxpʼejl qʼuin i tsaʼ c jumucʼ chaʼle tʼan quicʼot Elaine i yicʼot Brent, jiñi i ñoxiʼal. Tiʼ subeyoñob chaʼan mic pejcan Mateo cʼʌlʌl Hechos chaʼan mic ñaʼtan chuqui tac yom i yʌl cheʼ mi lac tsajcan Cristo. I cheʼʌch tsaʼ c mele. Ti wiʼil, tsaʼ cajiyon ti estudio yicʼot Brent i yicʼot Elaine. Jiñi tsaʼ ujti tiʼ yojlil majlel jiñi jabil 2016».
«Ti jujumpʼejl semana wen tijicña mic pijtan jiñi estudio yicʼot jiñi tempa bʌ tac. Wen tijicñayon i mij qʼuel ti ñuc cheʼ miʼ mejlel j cʌn chuqui miʼ yʌl jiñi Biblia. Pʼis ñumen ti jumpʼejl jab, tsaʼ c chʼʌmʌ jaʼ. Wʌle añix 79 c jabilel, i cujil chaʼan añon ti jiñi wem bʌ bij. Jehová an i yʌqʼueyon i bendición cheʼ ochemon ti jumpʼejl familia am bʌ tiʼ pejtelel Pañimil woli (choncol) bʌ i melben i yeʼtel (troñel)».