Jiñi xpejcaya juñob miʼ cʼajtibeñob i bʌ
Cheʼ bʌ Jesús tsaʼ ujti i yilan pañimil ti Belén, ¿chucoch José yicʼot María maʼañic tsaʼ sujtiyob majlel ti Nazaret?
Jiñi Biblia maʼañic miʼ yʌl, pero mucʼʌch i coltañonla lac ñaʼtan chucoch tajol cheʼ tsiʼ meleyob bajcheʼ jiñi.
Cheʼ bʌ María tsaʼ subenti chaʼan mi caj i yʌcʼ ti pañimil Jesús, yaʼʌch chumul ti Nazaret, jumpʼejl tejclum am bʌ ti Galilea, i José yaʼʌch chumul jaʼel (Luc. 1:26-31; 2:4). Anquese tsaʼʌch jumucʼ ajñiyob ti Egipto, tsaʼʌch chaʼ jubiyob majlel ti Nazaret. Jesús yaʼʌch tsaʼ coli yaʼi, jin chaʼan miʼ yʌjlel chaʼan chʼoyol ti Nazaret (Mat. 2:19-23). Cheʼ miʼ yʌjlel jiñi tejclum Nazaret miʼ tilel ti lac jol ili uxtiquilob.
I miʼ mejlel la cʌl chaʼan María i cʌñʌyʌch Judea come yaʼ chumul juntiquil i familia, jiñi Elisabet, tsaʼ bʌ i yʌcʼʌ ti pañimil Juan jiñi Xʼacʼ chʼʌmjaʼ. I ñoxiʼal Elisabet jiñʌch jiñi sacerdote Zacarías (Luc. 1:5, 9, 13, 36). María tsajñi i julaʼtan Elisabet i yaʼ tsaʼ cʌyle uxpʼejl uw, cheʼ jiñi tsaʼ chaʼ sujti majlel ti Nazaret (Luc. 1:39, 40, 56).
Ti wiʼil, tsaʼ ajli chaʼan pejtelel chumuloʼ bʌ ti Nazaret yom miʼ majlel i tsʼijbuñob i bʌ ti jun. Jin chaʼan, José yicʼot María tsaʼ majliyob ti Belén am bʌ ti Judá, cʌmbil bʌ bajcheʼ i tejclum David, yaʼ baqui tsaʼ wʌn ajli chaʼan mi caj i yilan pañimil (chʼocʼan) jiñi Mesías (Luc. 2:3, 4; 1 S. 17:15; 20:6; Mi. 5:2). I yaʼʌch tsiʼ yila pañimil jiñi Jesús, jin chaʼan yaʼ tsaʼ cʌyleyob ti Belén, lʌcʼʌl bʌ an ti Jerusalén. ¿Chucoch? Come José maʼañic mi caj i waʼ suben María chaʼan miʼ chaʼ sujtelob majlel ti Nazaret cheʼ bʌ ujtel jaxto i yʌcʼ ti pañimil i yalobil. Weñʌch cheʼ yaʼ tsaʼ cʌyleyob yaʼi come 9 kilómetro jach i ñajtlel ti Jerusalén, i mach ñajtic yom miʼ chaʼleñob xʌmbal chaʼan miʼ majlel i yʌcʼob majtañʌl yaʼ ti templo cheʼ bajcheʼ miʼ yʌl jiñi Mandar (Lv. 12:2, 6-8; Luc. 2:22-24).
Jiñi ángel tiʼ sube María chaʼan Jesús mi caj i yʌqʼuentel jiñi i trono David i mi caj i sujtel ti Rey. ¿Tsaʼ ba caji i ñaʼtañob José yicʼot María chaʼan wen ñucʌch i cʼʌjñibal cheʼ Jesús yaʼʌch miʼ yilan pañimil yaʼi? (Luc. 1:32, 33; 2:11, 17). Tajol tsiʼ ñaʼtayob chaʼan yom miʼ pijtañob chaʼan Jehová miʼ subeñob chuqui mi caj i melob i yaʼ jaxto miʼ cʌytʌlob ti Belén.
Mach la cujilic bajcheʼ jalel tsaʼ cʌyleyob yaʼi, pero la cujil chaʼan tsaʼʌch jalʼayob, come cheʼ bʌ tsaʼ cʼotiyob jiñi astrólogojob, Jesús mach juntiquilix alʌl meqʼuelto bʌ i chaʼan i mamá i cheʼ jaʼel añobix i yotot (Mat. 2:11). Jin chaʼan, tsiquil chaʼan mach ti orajic tsaʼ sujtiyob majlel ti Nazaret.
Ti wiʼil, Herodes «tsiʼ xiqʼui ti tsʌnsʌntel jiñi chʼitoñob añoʼ bʌ chaʼpʼejl i jabilel o maxto bʌ i taja chumuloʼ bʌ ti Belén yicʼot tiʼ joytʌlel» (Mat. 2:16). Pero juntiquil ángel tsiʼ wʌn sube José iliyi, jin chaʼan tsaʼ putsʼiyob majlel ti Egipto i yaʼʌch tsaʼ cʌyleyob jinto tsaʼ chʌmi Herodes. Cheʼ jiñi, tsaʼ sujtiyob majlel ti Nazaret. ¿Chucoch mach yaʼic ti Belén? Come Arquelao, i yalobil jiñi Herodes, jiñʌch woli bʌ (choncol bʌ) ti yumʌntel i wen jontol. Cheʼ jaʼel, juntiquil ángel tiʼ sube José chaʼan miʼ mejlel i taj wocol. Jin chaʼan, José tsiʼ pʌyʌ majlel i familia ti Nazaret, yaʼi wen jach mi caj i mejlel i cosan Jesús (Mat. 2:19-22; 13:55; Luc. 2:39, 52).
Miʼ ñaʼtʌntel chaʼan José tsaʼ chʌmi cheʼ bʌ maxto añic majqui miʼ mejlel ti majlel ti panchan, come ñaxan tsaʼ chʌmi bajcheʼ Jesús. Mi cheʼ bajcheʼ jiñi, José wʌʼ mi caj i chaʼ chʼojyel wʌʼ ti pañimil i mi caj i mejlel i tsictesʌbeñonla chucoch yaʼ tsaʼ cʌyleyob ti Belén.