¿A wujilix ba?

¿Bajcheʼ yilal jiñi carreta baqui woliʼ majlel jiñi wiñic chʼoyol bʌ ti Etiopía cheʼ bʌ Felipe tsaʼ majli i pejcan?

Yaʼ ti Traducción del Nuevo Mundo, jiñi tʼan am bʌ ti griego muʼ bʌ i chaʼlentel ti traducir bajcheʼ «carreta», miʼ yʌcʼ ti ñaʼtʌntel chaʼan mach junchajpic jach bajcheʼ yilal jiñi carreta tac ti jiñi bʌ ora (Hech. 8:28, 29, 38). Jiñi carreta baqui woliʼ majlel jiñi wiñic chʼoyol bʌ ti Etiopía mach jumpʼejlic carreta chaʼan bʌ guerra o chaʼan bʌ carrera, jumpʼejlʌch carreta ñumen colem bʌ. Laʼ laj qʼuel chucoch mi la cʌl iliyi.

Jiñi wiñic chʼoyol bʌ ti Etiopía an ñuc bʌ i yeʼtel yicʼot ñajt tsiʼ chaʼle xʌmbal. Jiñi Biblia miʼ yʌl chaʼan «ili wiñic miʼ melben i yeʼtel Candace, jiñi reina ti Etiopía, an tiʼ wenta pejtelel i chubʌʼan» (Hech. 8:27). Etiopía jiñʌch cʌmbil bʌ ili ora bajcheʼ Sudán yicʼot jumpʼejl parte Egipto. Anquese ili wiñic tajol mach jumpʼejl jach carreta tsaʼ bʌ i cʼʌñʌ ti xʌmbal, miʼ mejlel lac ñaʼtan chaʼan cabʌlʌch chuqui tsiʼ chʼʌmʌ majlel come ñajt baqui tsaʼ majli. Ti ñaxam bʌ siglo, mach junchajpic jach jiñi carreta tsaʼ bʌ i cʼʌñʌyob jiñi lac piʼʌlob, an carreta tac chʌmpʼejl bʌ i llantajlel i mʌcʌl ti chan. Jumpʼejl libro miʼ yʌl: «Ti ili carreta tac ñumen cabʌl chuqui miʼ mejlel laj cuch majlel, ñumen wen mi lac majlel i tajol ñumen ñajt baqui miʼ cʼotel».

Jiñi wiñic woliʼ pejcan jiñi Tsʼijbujel cheʼ bʌ Felipe tsiʼ lʌcʼtesa i bʌ tiʼ tojlel. Jiñi Biblia miʼ yʌl chaʼan «Felipe tsaʼ majli ti ajñel tiʼ tʼejl i tsiʼ yubi chaʼan woliʼ pejcan ti cʼam bʌ tʼan i jun jiñi xʼaltʼan Isaías» (Hech. 8:30). Ti jimbʌ ora, jiñi carreta tac muʼ bʌ i cʼʌjñel chaʼan miʼ cujchel lac piʼʌlob mach orajic miʼ chaʼlen ajñel, jin chaʼan ili wiñic tsaʼ mejli i pejcan majlel jiñi tsʼijbujel, i cheʼ bʌ Felipe tsaʼ majli i yajñesan tsaʼʌch i taja.

Jiñi wiñic «tsiʼ cʼajtibe Felipe ti wocol tʼan chaʼan miʼ letsel i miʼ buchtʌl yicʼot» (Hech. 8:31). Jiñi carreta chaʼan bʌ carrera, maʼañic i buchlib, jin chaʼan jiñi muʼ bʌ i ñijcan waʼal miʼ majlel. Pero ti jiñi carreta baqui woliʼ majlel ili wiñic mucʼʌch lac mejlel ti buchtʌl, jin chaʼan tiʼ sube Felipe chaʼan miʼ buchtʌl yicʼot.

Cheʼ bajcheʼ miʼ pʌs jiñi capítulo 8 chaʼan Hechos yicʼot jiñi tajbil tac bʌ, jiñi carreta baqui woliʼ majlel jiñi wiñic ñumen colemʌch, jin chaʼan jiñi lac publicación tac maʼañix miʼ chʌn pʌs i dibujojlel jumpʼejl carreta chaʼan bʌ guerra o chaʼan bʌ carrera.