Jumpʼejl wem bʌ cʼajtiya majqui jach bʌ miʼ mejlel i mel

Cabʌl lac piʼʌlob chʼoyoloʼ bʌ ti Filipinas miʼ majlel i sʌclañob eʼtel ti jumpʼejl país baqui chʼoyolob jumpʼejl xñujpuñel i cʼabaʼ Mary yicʼot John.a Ili xñujpuñel tsaʼ caji i subeñob wen tʼan jiñi muʼ bʌ i cʼotelob. Tiʼ yorajlel jiñi pandemia chaʼan COVID-19, Mary tsaʼ caji i yʌcʼ estudio, pero mach cojach tsaʼ caji i yʌqʼuen estudio jiñi yaʼ bʌ chʼoyolob ti jiñi país, miʼ yʌqʼueñob jaʼel jiñi chʼoyoloʼ bʌ ti yan tac bʌ país. ¿Bajcheʼ miʼ mel?

Mary miʼ cʼajtibeñob jiñi i estudiante: «¿A cʌñʌ ba majqui yomob i cʌn muʼ bʌ i yʌl jiñi Biblia?». Mi tsiʼ yʌlʌ chaʼan añʌch, miʼ suben: «¿Muʼ ba mejlel j cʌn?». Cheʼ miʼ mel ili cʼajtiya añʌch i colta, ¿chucoch? Come jiñi lac piʼʌlob muʼ bʌ i mulañob i cʌn muʼ bʌ i yʌl jiñi Biblia miʼ mulan i subeñob jiñi i familia o i yamigojob woli bʌ i cʌñob. Laʼ laj qʼuel chuqui tsaʼ ujti tiʼ tojlel Mary.

Juntiquil i estudiante i cʼabaʼ Jasmin tiʼ sube chaʼan an chʌntiquil yomoʼ bʌ i chʼʌm estudio. Juntiquil jiñʌch Kristine, tsaʼ bʌ i wen mulaj jiñi estudio i tsiʼ cʼajti chaʼan chaʼyaj miʼ yʌqʼuentel ti jumpʼejl semana. I cheʼ bʌ Mary tsiʼ cʼajtibe mi an yambʌ majqui i cʌñʌ yom bʌ i cʌn muʼ bʌ i yʌl jiñi Biblia, Kristine tsiʼ yʌlʌ: «Añʌch, jiñi camigajob». Ti wiʼil, Kristine tsiʼ yʌqʼue Mary i ñumerojlel i teléfono chʌntiquil i yamiga yom bʌ i cʌñob jaʼel jiñi Biblia. Cheʼ jaʼel, tiʼ sube chaʼan anto yambʌ lac piʼʌlob yom bʌ i cʌñob jiñi Biblia. I cheʼʌch tsiʼ meleyob jaʼel jiñi yambʌlob.

Cheʼ jaʼel, Kristine tsiʼ mulaj chaʼan jiñi i familia añoʼ bʌ ti Filipinas miʼ cʌñob jaʼel muʼ bʌ i yʌl jiñi Biblia. Jin chaʼan tsiʼ pejca jiñi i yixicʼal i cʼabaʼ Andrea. Ti ñaxan, Andrea tsiʼ ñaʼta: «Jiñi Testigojob jumpʼejlob secta. Maʼañic miʼ ñopob Jesús i cojach miʼ cʼʌñob jiñi Antiguo Testamento». Pero cheʼ cojaxto tsiʼ chʼʌmʌ jiñi estudio tsiʼ qʼuele chaʼan mach i sujmic, i cheʼ bʌ woliʼ yʌqʼuentel estudio muʼto i yʌl: «Mi jiñi Biblia miʼ yʌl, ¡yom i yʌl chaʼan i sujmʌch!».

Ti wiʼil, Andrea tiʼ sube Mary chaʼan chaʼtiquil i yamigajob yicʼot juntiquil i piʼʌl ti eʼtel yomob i chʼʌm estudio jaʼel. Pero cheʼ jaʼel, Andrea an juntiquil i tía i cʼabaʼ Angela xpotsʼ bʌ, i cheʼ bʌ Andrea miʼ yʌqʼuentel estudio, jiñi i tía miʼ ñʌchʼtan jaʼel, pero Mary mach yujilic. Ti jumpʼejl bʌ qʼuin, Angela tiʼ sube Andrea chaʼan miʼ suben Mary chaʼan yom i chʼʌm estudio jaʼel. Angela tsiʼ wen mulaj jiñi estudio, i mach i taja jumpʼejl uw i cajel ti estudio, tsaʼix i cʌyʌ tiʼ jol texto tac. Cheʼ jaʼel, tsiʼ yʌlʌ chaʼan chʌnyaj miʼ yʌqʼuentel estudio ti jujumpʼejl semana. Andrea tsiʼ colta Angela chaʼan miʼ chaʼlen i bʌ ti conectar ti tempa bʌ.

Cheʼ bʌ Kristine miʼ yʌqʼuentel estudio, jiñi i ñoxiʼal i cʼabaʼ Joshua miʼ cʌytʌl chaʼan miʼ ñʌchʼtan jaʼel. Cheʼ bʌ Mary tsiʼ qʼuele, tsiʼ cʼajtibe mi yom ajñel jaʼel cheʼ bʌ Kristine miʼ yʌqʼuentel estudio. Joshua tsiʼ jacʼʌ: «Yomʌch, pero, mucʼ jach caj c ñʌchʼtan. Mach comic chaʼan maʼ melbeñon cʼajtiya tac». I maxto i taja 5 minuto, tsaʼix i wen mele cʼajtiya tac ñumento bajcheʼ Kristine i tsiʼ yʌlʌ chaʼan yomʌch estudio jaʼel.

Jiñi cʼajtiya tsaʼ bʌ i mele Mary tsiʼ yʌcʼʌ chaʼan cabʌl lac piʼʌlob miʼ chʼʌmob estudio. ¡28 lac piʼʌlob añoʼ bʌ ti chʌmpʼejl país tsaʼ caji i chʼʌmob estudio! Jin chaʼan Mary tiʼ sube yambʌ hermanojob chaʼan miʼ yʌcʼob jaʼel jiñi estudio.

Jiñi ñaxam bʌ estudiante i cʼabaʼ Jasmin tsiʼ chʼʌmʌ jaʼ ti abril 2021. Kristine tsiʼ chʼʌmʌ jaʼ ti mayo 2022, i wʌle yaʼix chaʼ an yicʼot i familia ti Filipinas. Cheʼ jaʼel, yambʌ chaʼtiquil estudiante tsiʼ chʼʌmʌyob jaʼ. Ti wiʼil, Angela tsiʼ chʼʌmʌ jaʼ, i mach wen jalic tsaʼ ñumi tsaʼ ochi bajcheʼ precursora regular. I jiñi i ñoxiʼal Kristine yicʼot i yixicʼal yicʼot jiñi yambʌ estudiantejob woliʼ bej chaʼleñob wersa.

Ti jiñi ñaxam bʌ siglo, orajach tsaʼ pujqui jiñi wen tʼan ti jiñi familia tac yicʼot jiñi amigojob (Juan 1:​41, 42a; Hech. 10:​24, 27, 48; 16:​25-33). ¿Chucoch maʼañic maʼ cʼajtiben jiñi a estudiante o yambʌlob: «¿A cʌñʌ ba majqui yom i cʌn muʼ bʌ i yʌl jiñi Biblia?»? Ili cʼajtiya majqui jach miʼ mejlel i mel, i mach la cujilic jaytiquil miʼ mejlel i tech i chʼʌmob jiñi estudio.