¿Tsaʼ baʼ sʌtʌ a weʼtel? Ticʼojel tac muʼ bʌ mejlel i coltañet
Cheʼ bʌ mi lac sʌt la queʼtel, miʼ mejlel lac taj wocol chaʼan taqʼuin o ti lac familia, i miʼ mejlel i cʼamʼesañonla. Chaʼan miʼ lʌjtʼel lac chaʼan jiñi wocol, laʼ laj qʼuel jiñi ticʼojel tac am bʌ ti Biblia bej anto bʌ i cʼʌjñibal.
Suben yañoʼ bʌ bajcheʼ yubil maʼ wubin a bʌ.
Muʼ bʌ i yʌl jiñi Biblia: «Mi isujm miʼ cʼuxbiñonla laj cʌñʌ bʌ maʼanic miʼ cʌy i cʼuxbiñonla tiʼ pejtelel ora» (Proverbios 17:17).
Mi tsaʼ sʌtʌ a weʼtel tajol maʼ wubin a chʼijyemlel, michʼet, mach a wujilic chuqui yom maʼ mel o maʼañic a cʼʌjñibal maʼ wubin a bʌ. Mi mucʼʌch a suben a wamigojob yicʼot a familia bajcheʼ yubil maʼ wubin a bʌ mi caj i coltañetob chaʼan maʼ taj a ñʌchʼtʌlel. Tajol an chuqui miʼ mejlel i subeñetob chaʼan maʼ taj yambʌ eʼtel.
Mach a cʌlʌx pensarin.
Muʼ bʌ i yʌl jiñi Biblia: «Mach laʼ cʼojoʼtan chuqui mi caj i yujtel ijcʼʌl come yambʌyix chuqui mi caj laʼ cʼojoʼtan» (Mateo 6:34).
Jiñi Biblia miʼ subeñonla chaʼan yom mi lac wʌn ñaʼtan chuqui yom mi lac mel (Proverbios 21:5). Pero miʼ subeñonla jaʼel chaʼan mach yomic mi laj cʌlʌx pensarin chuqui muʼ bʌ i mejlel ti ujtel. Ñumen wen cheʼ jin jach mi lac ñaʼtan chaʼan bʌ jumpʼejl qʼuin come joñon jachla mi lac bajñel ticʼlan lac bʌ cheʼ mi lac wen ñaʼtan jiñi mach bʌ ujtic.
Jiñi Biblia miʼ yʌqʼueñonla yambʌ ticʼojel tac chaʼan jiñi cʌlʌx pensar. Mi a wom a ñumen cʌn, pejcan jiñi tema «¿Chuqui miʼ mejlel lac mel cheʼ mucʼonla ti wen cʼojol?».
Cʼʌñʌ ti wen jiñi a taqʼuin.
Muʼ bʌ i yʌl jiñi Biblia: «Tsaʼ j cʌñʌ bajcheʼ mi cajñel […] cheʼ cabʌl chuqui an c chaʼan yicʼot cheʼ maʼañic chuqui an c chaʼan» (Filipenses 4:12).
Ñʌmtesan a bʌ cheʼ bajcheʼ añet wʌle. Tajol mucʼʌch cajel a cʌntan chaʼan maʼañic maʼ cʌlʌx cʼʌn taqʼuin. Yom tsajilet jaʼel chaʼan maʼañic maʼ wotsan a bet mi mach i cʼʌjñibalic a chaʼan (Proverbios 22:7).
Mi a womto a ñumen cʌn chuqui miʼ mejlel a mel chaʼan bajcheʼ añet wʌle, qʼuele jiñi tema «¿Bajcheʼ mi lac mejlel ti chumtʌl mi tsʼitaʼ jach lac taqʼuin?».
Cʼʌñʌ ti wen jiñi hora am bʌ a chaʼan.
Muʼ bʌ i yʌl jiñi Biblia: «Yom mi laʼ pʌs laʼ ñaʼtʌbal [...] i yom wen bajcheʼ mi laʼ cʼʌn jiñi i yorajlel am bʌ laʼ chaʼan» (Colosenses 4:5).
Mi maʼañic jumpʼejl hora chaʼan bajcheʼ maʼ chaʼlen eʼtel, qʼuele bajcheʼ maʼ cʼʌn ti wen jiñi hora. Mi tsaʼ mele bajcheʼ jiñi, mi caj i coltañet chaʼan wen maʼ wubin a bʌ.
Mele baqui jach bʌ eʼtel.
Muʼ bʌ i yʌl jiñi Biblia: «Pejtel eʼtel muʼ bʌ lac mel miʼ yʌcʼ i chobejtʌbal» (Proverbios 14:23).
Jacʼʌ a mel baqui jach bʌ eʼtel anquese mach jiñic ñʌmʌl bʌ a mel ti ñaxan. Mach cojach yom maʼ sʌclan jiñi ñuc tac bʌ eʼtel o baqui lets maʼ mejlel ti tojtʌl.
Chʌn chaʼlen wersa.
Muʼ bʌ i yʌl jiñi Biblia: «Yom maʼ chʌn chaʼlen pacʼ cʼʌlʌl ti sʌcʼan cʼʌlʌl ti icʼan, come mach a wujilic baqui bʌ miʼ cajel ti colel» (Eclesiastés 11:6).
Mach a cʌy a sʌclan eʼtel. Subeñob jiñi a familia, a cʌñʌyoʼ bʌ yicʼot a piʼʌloʼ bʌ ti eʼtel ti ñaxan chaʼan woli a sʌclan eʼtel. Qʼuele jiñi anuncio tac baqui woliʼ sʌclʌntel xʼeʼtelob. Cheʼ jaʼel, miʼ mejlel a sʌclan yaʼ ti página chaʼan internet baqui woliʼ sʌclʌntel xʼeʼtelob. Tajol mach junsujmic jach baqui mi caj a wʌcʼ jiñi a jun chaʼan maʼ taj weʼtel.