¿Añoʼ ba i ticʼojel jiñi i testigojob Jehová chaʼan jiñi noviazgo?

Joñon lojon bajcheʼ i testigojob Jehová mi lon c ñop chaʼan jiñi cʌntesa tac yicʼot jiñi mandar tac am bʌ ti Biblia miʼ coltañon lojon chaʼan mi lon c mel chuqui miʼ mulan Dios yicʼot miʼ yʌqʼueñon lon c wenlel (Isaías 48:17, 18). Mach tsaʼ jach c bajñel ñaʼta lojon ili cʌntesa tac, pero mic jacʼ lojon. Laʼ laj qʼuel chaʼpʼejl uxpʼejl muʼ bʌ i taj ti tʼan jiñi noviazgo.a

• Jiñi ñujpuñel chaʼañʌch miʼ yajñel tiʼ pejtelel ora (Mateo 19:6). Mi lon j qʼuel ti ñuc cheʼ bʌ miʼ loqʼuel ti xʌmbal juntiquil wiñic yicʼot juntiquil xʼixic, come jiñʌch muʼ bʌ i pʌyob majlel ti ñujpuñel.

• Mi an juntiquil maxto bʌ añic i jabilel chaʼan miʼ ñujpuñel, mach yomic miʼ loqʼuel ti xʌmbal yicʼot juntiquil wiñic o xʼixic. Cojach yom miʼ ñujpuñel jiñi tsaʼix bʌ i taja i colel, ili jiñʌch cheʼ bʌ tsaʼix ñumi i yorajlel chaʼan wen yom piʼleya miʼ yubin (1 Corintios 7:​36, Traducción del Nuevo Mundo).

• Jiñi muʼ bʌ i loqʼuelob ti xʌmbal yom libre añob chaʼan miʼ ñujpuñelob. Cheʼ bʌ an majqui miʼ chaʼlen i bʌ ti divorciar mach yom i yʌl chaʼan libre an tiʼ wut Dios chaʼan miʼ chaʼ ñujpuñel. Cojach wen miʼ qʼuel Dios chaʼan miʼ yujtel jiñi divorcio cheʼ bʌ an majqui miʼ chaʼlen tsʼiʼlel (Mateo 19:9).

• Jiñi xñoptʼañob yomoʼ bʌ ñujpuñel cojach yom miʼ sʌclañob jiñi añoʼ bʌ tiʼ ñopbal (1 Corintios 7:​39). Ili yom i yʌl chaʼan cojach yom mi lon c mulan yicʼot lon c ñujpuñel yicʼot yambʌ Testigo chʼʌmʌlix bʌ i chaʼan jaʼ, mach yicʼotic juntiquil mucʼ jach bʌ i qʼuel ti ñuc chuqui mi lon c ñop (2 Corintios 6:​14). Cʼʌlʌl ti wajali, Dios an i sube jiñi i wiñicob chaʼan cojach yom miʼ ñujpuñelob yicʼot jiñi lajaloʼ bʌ tiʼ ñopbal (Génesis 24:3; Malaquías 2:​11). Cheʼ jaʼel, jiñi wen yujiloʼ bʌ an i qʼueleyob chaʼan weñʌch cheʼ miʼ jajqʼuel ili mandar.b

• Jiñi alobob yom miʼ jacʼbeñob i tʼan i tat i ñaʼ (Proverbios 1:8; Colosenses 3:​20). Jiñi yaʼ to bʌ chumulob tiʼ yotot i tat i ñaʼ yom miʼ jacʼbeñob i ticʼojel chaʼan jiñi noviazgo. Ti ili ticʼojel tac yaʼ ochem jaypʼejl i jabilel miʼ mejlelob ti loqʼuel yicʼot juntiquil wiñic o xʼixic yicʼot chuqui miʼ mejlel i melob.

• Jiñi Biblia miʼ yʌl chaʼan ‹an ti lac wenta lac melbal ti jujuntiquil› (Gálatas 6:5). Jin chaʼan, cheʼ bʌ mic jacʼ lojon jiñi ticʼojel tac loqʼuem bʌ ti Biblia, miʼ mejlel lon c bajñel ñaʼtan mi comʌch lon c tech jumpʼejl noviazgo yicʼot majqui. An cabʌl wen tsajiloʼ bʌ, i miʼ cʼajtibeñob ticʼojel jiñi Testigojob añobix bʌ i ñaʼtʌbal mucʼʌch bʌ i cʼojoʼtañob tiʼ sujmlel (Proverbios 1:5).

• Ti ili pañimil, cheʼ bʌ juntiquil wiñic yicʼot juntiquil xʼixic miʼ loqʼuelob ti xʌmbal ñʌmʌl i melob tsʌts tac bʌ mulil. Jiñi Biblia miʼ yʌl chaʼan mach weñic jiñi tsʼiʼlel. Ili mach cojach yom i yʌl cheʼ bʌ miʼ piʼleñob i bʌ cheʼ bʌ maxto ñujpuñemobic, yaʼ ochem jaʼel cheʼ bʌ miʼ tʌlbeñob i bʌ jiñi aqʼuebiloʼ bʌ chaʼan miʼ piʼleñob i bʌ, cheʼ bʌ miʼ piʼleñob i bʌ tiʼ yej o tiʼ yit yicʼot yan tac bʌ (1 Corintios 6:​9-​11). Cheʼ jaʼel, mi jiñi noviojob miʼ tsʼujtsʼuñob i bʌ yicʼot miʼ tʌlob i bʌ cʼʌlʌl to cheʼ bʌ yomix i piʼleñob i bʌ, tiʼ sujm woliʼ melob bibiʼ bʌ tiʼ tojlel Dios, anquese maʼañic miʼ piʼleñob i bʌ (Gálatas 5:​19-​21). Jiñi Biblia miʼ yʌl jaʼel chaʼan mach weñic jiñi bibiʼ bʌ tʼan (Colosenses 3:8).

• Jiñi lac pusicʼal miʼ lotiñonla (Jeremías 17:9). I pusicʼal juntiquil quixtañu miʼ mejlel i yʌqʼuen i mel mach tac bʌ weñic anquese yujilʌch chaʼan mach weñic jiñi. Chaʼan maʼañic miʼ yʌqʼueñonla lac mel mach bʌ weñic jiñi lac pusicʼal, jiñi añoʼ bʌ ti jumpʼejl noviazgo mach yomic miʼ bajñel cʌytʌlob yaʼ baqui miʼ mejlelob ti yajlel ti mulil. Jiñi noviojob maʼañic mi caj i yajlelob ti cabʌl wocol mi mach i bajñelic miʼ loqʼuelob o mi mucʼʌch i majlel yicʼotob juntiquil wem bʌ miʼ cʌntañob (Proverbios 28:26). Jiñi xñoptʼan yom bʌ ñujpuñel yujil chaʼan miʼ mejlel i taj wocol cheʼ miʼ sʌclan i novio o novia ti Internet, come wen bʌqʼuentic jax i pejcʌntel juntiquil quixtañu mach bʌ lac wen cʌñʌyic (Salmo 26:4).