WOCOL TAC TI PAÑIMIL

1 | Cʌntan a bʌ

¿CHUCOCH ÑUC I CʼɅJÑIBAL?

Jiñi tsʌts tac bʌ wocol cabʌl bajcheʼ miʼ mejlel i ticʼlañonla.

Cheʼ bʌ miʼ yujtel mach tac bʌ weñic, miʼ wen acʼ ti pensar cabʌl lac piʼʌlob, i mi jal cheʼ miʼ yubiñob i bʌ bajcheʼ jiñi ti orajach miʼ mejlelob ti cʼamʼan.
An i tajol jiñi doctorob maʼañix miʼ tajbeñob i yorajlel chaʼan miʼ luʼ qʼuelob jiñi lac piʼʌlob cʼamoʼ bʌ o mach cabʌlic tsʼac.
An i tajol jiñi lac piʼʌlob mach cabʌlobic i taqʼuin chaʼan miʼ mʌñob jiñi i cʼʌjñibal bʌ i chaʼañob bajcheʼ i bʌl i ñʌcʼob o jiñi i tsʼac.

¿A wujilix ba?

Jiñi tsʌts tac bʌ cʼamʌjel yicʼot cʌlʌx pensar miʼ mejlel i yʌqʼueñet a cʌy a cʌntan a bʌ. Jiñi mucʼ jach caj i ñumen cʼamʼesañet.
Mi maʼañic maʼ tsʼʌcan jiñi a cʼamʌjel, mi caj i ñumen tsʌtsʼan o miʼ mejlel i tsʌnsañet.
Mi cʼoqʼuetʌch, wen chuqui mi caj a ñaʼtan a mel cheʼ maʼ ñusan chuqui wocol jax bʌ.
Mach yʌlʌyic mi mach cabʌlic a taqʼuin, an tacʌch chuqui miʼ mejlel a mel chaʼan maʼ cʌntan a bʌ.

¿Chuqui miʼ mejlel a mel?

Jiñi añʌch bʌ i ñaʼtʌbal miʼ ñaʼtan chuqui tac ti wocol miʼ mejlel ti ujtel yicʼot chuqui yom miʼ mel chaʼan maʼañic miʼ taj jiñi wocol. Jin chaʼan, mi mach a womic miʼ tajet tsʌts bʌ cʼamʌjel, yom sʌc maʼ wajñel. Ñumen wen cheʼ mi laj cʌntan lac bʌ chaʼan maʼañic mi laj cʼamʼan.

«Maʼañic mi lon c wen cʼʌn taqʼuin ti doctor yicʼot ti tsʼac come mi lon j cʌntan chaʼan sʌc mi lon cajñel yicʼot sʌc jiñi lon cotot» (Andreas).a

a An cʼabaʼʌl tac tsaʼ bʌ qʼuextʌyi.

¿BAJCHEʼ MIʼ MEJLEL A LɅTʼ? Ticʼojel tac

Chaʼan maʼ cʌntan a bʌ cheʼ bʌ an wocol, mele iliyi

SɅC YOM MAʼ WAJÑEL

Sʌc yom maʼ wajñel

Jiñi Biblia miʼ yʌl: «Jini cʌntesʌbil bʌ miʼ wʌn ñaʼtan chuqui bʌbʌqʼuen miʼ yujtel. Miʼ chajpan i bʌ» (Proverbios 22:3). Chaʼlen wersa a qʼuel chuqui tac miʼ mejlel i cʼamʼesañet.

Yom maʼ chʌcʌ poc a cʼʌb ti jaʼ yicʼot ti xapom, ñumento cheʼ mi caj a tʌl chuqui tac mi caj a cʼux yicʼot cheʼ bʌ maʼ wajñel ti baño.
Chʌcʌ sʌqʼuesan jiñi a wotot, ñumento jiñi muʼ bʌ a wen tʌl.
Mach a wen ñochtan jiñi muʼ bʌ i mejlel i ñusʌbeñetob i cʼamʌjel.

CɅNTAN CHUQUI MAʼ CʼUX

Cʌntan chuqui maʼ cʼux

Jiñi Biblia miʼ yʌl: «Maʼañic majqui tsʼaʼlebil i chaʼan i bʌcʼtal, miʼ weʼsan i miʼ cʌntan yicʼot cʼuxbiya» (Efesios 5:29). Mi lac pʌs chaʼan mucʼʌch laj cʼuxbin jiñi lac bʌcʼtal mi mucʼʌch laj cʌntan chuqui mi laj cʼux.

Wen japʌ jaʼ.
Wen cʼuxu fruta yicʼot verdura.
Mach a wen cʼux grasa, atsʼam yicʼot azúcar.
Mach a ñucʼ cʼujts, mach a cʼʌn droga yicʼot mach a wen jap lembal.

«Chaʼan maʼañic mi lon j cʼamʼan, mi lon j cʌntan chuqui mi lon j cʼux, come mi maʼañiqui mi caj i jilel ti doctor jiñi tsʼitaʼ taqʼuin muʼ bʌ lon c taj. Jin chaʼan, mi lon c mʌn wen tacʌch bʌ bʌlñʌcʼʌl» (Carlos).

MELE EJERCICIO YICʼOT WɅYEN TI WEN

Mele ejercicio

Jiñi Biblia miʼ yʌl: «Utsʼat mi lac tsʼitaʼ cʼaj la co cheʼ jasʌlonla. Mach utsʼatic mi lac chʌn bajben eʼtel chaʼan jach lac woʼlel ti chubʌʼañʌl. Toʼol icʼ jach woli la cʌsin cheʼ jini» (Eclesiastés 4:6). Yom pʼisbil jach chuqui mi lac mel: Yom mi lac chaʼlen eʼtel, pero yom mi laj cʼaj la co jaʼel.

Añʌch chuqui yom maʼ mel chaʼan maʼ ñijcan a bʌcʼtal. Maʼ mejlel ti loqʼuel ti xʌmbal. Cheʼ bʌ añʌch chuqui maʼ mel chaʼan maʼ ñijcan jiñi a bʌcʼtal mi caj i coltañet chaʼan ñumen cʼoqʼuet, ñumento mi ñoxetix o mi an a discapacidad o yambʌ tsʌts bʌ cʼamʌjel.
Wʌyen ti wen

Wʌyen ti wen. Mi mach weñic mi lac wʌyel, orajach miʼ mejlel i ñumen acʼonla ti cʌlʌx pensar i maʼañic miʼ mejlel lac xucʼchocon lac pensar. I ti wiʼil miʼ mejlel i cʼamʼesañonla.
Mele jumpʼejl horario chaʼan maʼ majlel ti wʌyel i tsʼʌctesan. Chaʼlen wersa chaʼan maʼañic maʼ qʼuextan bajcheʼ hora maʼ wʌyel yicʼot bajcheʼ hora maʼ tejchel ti jujumpʼejl qʼuin.
Mach a qʼuel televisión, celular o yan tac bʌ cheʼ yaʼix añet ti a wʌyib.
Mi muqʼuix caj a wʌyel mach oñic yom maʼ cʼux a waj, mach a jap cajpeʼ yicʼot lembal.

«Añʌch chuqui miʼ yujtel ti lac tojlel mi wen o mi mach weñic mi lac wʌyel. Mi mach weñic mic wʌyel muʼ ti cʼux col yicʼot pejtelel c bʌcʼtal. Pero, cheʼ wen mic wʌyel, tijicña mi cubin c bʌ i miʼ mejlel c mel pejtelel chuqui yom melol. Wen an c pʼʌtʌlel yicʼot maʼañic mic wen cʼamʼan» (Justin).