Cʌntesʌntel 11

Jini ñaxam bʌ tʼoxjaʼ

¿AWUJIL ba chuqui tsiʼ mele ti ñaxan jini Noé yicʼot i familia cheʼ tsaʼ loqʼuiyob yaʼ ti arca? Noé tsiʼ yʌqʼue jumpʼejl i majtan Dios. Qʼuele cu ila tiʼ dibujolel woli i mel jini. Noé tsiʼ pulbe añimal tac chaʼan mi yʌqʼuen wocolix i yʌlʌ Dios chaʼan tsiʼ colta ti jini ñuc bʌ butʼjaʼ jini i familia.

¿Utsʼat ba tsiʼ qʼuele Jioba maʼ wʌl jini majtañʌl? Cheʼʌchi, utsʼatʌch tsiʼ qʼuele. Jini chaʼan tsiʼ wʌn sube Noé chaʼan maʼanic baʼ ora mi caj i chʌn jisan jini pañimil ti butʼjaʼ.

Mach jalic tsaʼ tiqui jini lum, jini Noé yicʼot i familia tsiʼ techeyob yambʌ tsijiʼ bʌ chumtʌl cheʼ loqʼuemobix yaʼ ti arca. Dios tsiʼ yʌqʼueyob i yutslel i tʼan i tsiʼ subeyob: ‹Yom tilic cabʌl laʼ pʼolbal. Yom mi laʼ pʼojlel, butʼula jini Pañimil›.

Pero ti wiʼil, cheʼ mi yubiñob ti ajlel jini winicob xʼixicob chaʼan jini ñuc bʌ butʼjaʼ, tajol mi bʌcʼñañob chaʼan mi chaʼ cajel yambʌ butʼjaʼ cheʼ bajcheʼ jini tsaʼ bʌ ujti. Jini chaʼan Dios an chuqui tsaʼ bʌ i yʌcʼʌ chaʼan mi cʼajtesañob jini winicob xʼixicob Jiñʌch i tʼan tsaʼ bʌ i yʌlʌ chaʼan maʼanic baʼ ora mi caj i chʌn choc tilel butʼjaʼ ila ti Pañimil. ¿Awujil ba chuqui tsaʼ bʌ yʌcʼʌ chaʼan mi cʼajtesañob jini? Jiñʌch jumpʼejl tʼoxjaʼ.

An i tajol miʼ wen pʌs i bʌ jini tʼoxjaʼ ti tocal cheʼ mi tsʼʌjyel Qʼuin chaʼan tsaʼ ujti ti ñumel jaʼal. Jini tʼoxjaʼ an cabʌl i tʼojol jax bʌ i colorlel. ¿Am ba qʼuelbil a chaʼan jumpʼejl jatet? ¿Muʼ ba a qʼuel ili am bʌ ila ti dibujo?

Jiñʌch tsaʼ bʌ i yʌlʌ Dios iliyi: ‹Mi cʌcʼ c tʼan chaʼan mach chʌn talix butʼjaʼ chaʼan miʼ jisan pejtelel cuxul tac bʌ ti pañimil. Woli cʌcʼ c tʼoxjaʼ ti tocal. Cheʼ miʼ pʌs i bʌ jini tʼoxjaʼ, mi caj j qʼuel joñon chaʼan mic ñaʼtan xucʼul bʌ c tʼan›.

Jini chaʼan, cheʼ maʼ qʼuel jumpʼejl tʼoxjaʼ, ¿chuqui yom maʼ cʼajtesan? Jiñʌch, jini xucʼul bʌ i tʼan Dios chaʼan maʼanic baʼ ora mi caj i jisan jini pañimil ti ñuc bʌ butʼjaʼ.

Génesis 8:18-22; 9:9-17.