Cʌntesʌntel 22
José tsaʼ yotsayob ti mʌjquibʌl
JOSÉ an jaxto wuclujumpʼejl i jabilel cheʼ tsiʼ pʌyʌyob majlel ti Egipto. Yaʼi tsiʼ chombeyob juntiquil winic i cʼabaʼ Potifar. Potifar jiñʌch i yaj eʼtel jini rey bʌ yaʼ ti Egipto, muʼ bʌ i subentel ti Faraón.
José mi chaʼlen tsʌts bʌ eʼtel tiʼ tojlel i yum, i cʼabaʼ Potifar. Jini chaʼan, cheʼ bʌ José tsiʼ taja i colel, Potifar tsiʼ yʌqʼue tiʼ wenta pejtelel chuqui an ti yotot. Cheʼ jini, ¿chucoch an ti mʌjquibʌl José? Tiʼ caj i yijñam Potifar.
Cheʼ bʌ tsiʼ taja i colel José wen i tʼojol jax bʌ winic tsaʼ sujti, i jini i yijñam Potifar yom chaʼan miʼ piʼlen. Pero José yujil chaʼan mach wenic jini, jini chaʼan mach yomic. Jini i yijñam Potifar tsaʼ wen michʼa. Jini chaʼan, cheʼ tsaʼ cʼoti i ñoxiʼal, tsiʼ jopʼbe i mul yicʼot tsaʼ yʌlʌ: ‹¡Jini jontol bʌ José tsiʼ ñopo i piʼleñon!› Potifar tsiʼ ñopbe i yijñam, i tsaʼ wen michʼa yicʼot José. Tsaʼ yʌcʼʌ tiʼ ochel ti mʌjquibʌl.
Jini am bʌ tiʼ wenta mʌjquibʌl tsiʼ bʌcʼ qʼuele chaʼan jini José mach jontolic bʌ winic. Jini chaʼan tsiʼ yʌqʼue tiʼ wenta pejtelel jini yambʌ xñujpʼelob. Ti wiʼil Faraón tsaʼ wen michʼa yicʼot jini yaj ñusa vino yicʼot jini yaj mel caxlan waj, i tsaʼ yotsa ti mʌjquibʌl. Jumpʼejl acʼʌlel, ti jujuntiquilob tsiʼ chaʼleyob cojach bʌ ñajal, pero mach yujilobic chuqui i sujmlel jini i ñajalob. Ti yijcʼʌlal José tsiʼ yʌlʌ: ‹Subeñonla jini laʼ ñajal›. Cheʼ jini José, yicʼot i coltaya Dios, mi tsictesan i sujmlel jini i ñajalob.
José tsaʼ yʌlʌ, jini xñusa vino: ‹Ti yuxpʼejlel qʼuin mi caj a locʼsʌntel ti mʌjquibʌl, i mi caj a chaʼ waʼchocontel ti xñusa vino chaʼan jini Faraón›. Jini chaʼan José tsiʼ chaʼ alʌ: ‹Cheʼ maʼ locʼsʌntel, tsictesañon tiʼ tojlel Faraón, coltañon chaʼan mic loqʼuel ilayi›. Pero José tsaʼ yʌlʌ, jini xmel caxlan waj: ‹Ti yuxpʼejlel qʼuin Faraón mi caj i tsep loqʼuel a bicʼ›.
Ti yuxpʼejlel qʼuin tsaʼ ujti cheʼ bajcheʼ tsiʼ yʌlʌ José. Faraón tsiʼ tsepbe i bicʼ jini xmel caxlan waj. Pero jini xñusa vino tsaʼ locʼsʌnti ti mʌjquibʌl i tsaʼ chaʼ caji i ñusʌben vino jini rey. ¡Pero tsaʼ ñajʌyi i chaʼan José! Maʼanic chuqui tsiʼ sube Faraón chaʼan tiʼ tojlel José, i yaʼto tsaʼ cʌyle ti mʌjquibʌl.
Génesis 39:1-23; 40:1-23.