Cʌntesʌntel 2
¿Majqui jini Dios?
¿Majqui jini isujm bʌ Dios, yicʼot chuqui i cʼabaʼ? (1, 2)
¿Bajcheʼ yilal i bʌcʼtal? (3)
¿Baqui tac bʌ jini i melbal wen utsʼat bʌ mi laj qʼuelben Dios? (4)
¿Yom ba mi laj cʼʌn imágen tac chaʼan mi lac chʼujutesan? (5)
¿Chuqui jini chaʼchajp bʌ bajcheʼ miʼ mejlel laj cʌn Dios? (6)
1. Jini winicob xʼixicob cabʌl chuqui miʼ chʼujutesañob. Pero, jini Biblia miʼ subeñonla chaʼan an jach juntiquil ISUJM BɅ Dios. I melbal tiʼ pejtelel chuqui an ti panchan, yicʼot ila ti Pañimil, yicʼot tsiʼ yʌqʼueyonla laj cuxtʌlel, cojach tiʼ bajñelil yom mi lac chʼujutesan (1 Corintios 8:5, 6; Apocalipsis 4:11).
2. Anquese Dios an cabʌl bajcheʼ miʼ pejcʌntel, cojach an jumpʼejl i cʼabaʼ: JEHOVÁ. Ti cabʌl Biblia tsaʼix i yʌpbeyob i cʼabaʼ jini Dios i tsiʼ qʼuextʌbeyob ti lac Yum o Dios. Pero, cheʼ bʌ tsaʼ tsʼijbunti jini Biblia, ¿jaysujtel tsaʼ tajle jini cʼabaʼ Jehová? Ñumen ti siete mil (Éxodo 3:15; Salmo 83:18).
3. Jehová an i bʌcʼtal, anquese mach lajalic bajcheʼ lac chaʼan. «Dios Espíritujʌch», cheʼ mi yʌl jini Biblia (Juan 4:24). I cuxtʌlel juntiquil espíritu ñumen ñuc bajcheʼ lac chaʼan. Mi juntiquilic wʌʼ bʌ an ti pañimil qʼuelel i chaʼan Dios. Anquese Jehová chumul ti panchan, pero miʼ mejlel i luʼ qʼuel tiʼ pejtelel (Salmo 11:4, 5; Juan 1:18). ¿I chuqui jini chʼujul bʌ espíritu? Mach juntiquilic lac piʼʌl, bajcheʼ Dios, jiñʌch i pʼʌtʌlel Dios (Salmo 104:30).
4. Jini Biblia miʼ subeñonla bajcheʼ yilal jini Jehová. Miʼ yʌl chaʼan jini wen utsʼat bʌ an i chaʼan jiñʌch cʼuxbiya, i tojel, i ñaʼtʌbal yicʼot i pʼʌtʌlel (Deuteronomio 32:4; Job 12:13; Isaías 40:26; 1 Juan 4:8). Yicʼot jaʼel miʼ yʌl chaʼan xpʼuntaya, uts i pusicʼal, xñusa mulil, pʼejw i yujil pijtaya. Cheʼ bajcheʼ xjacʼ tʼan bʌ i yalobilonla, yom mi lac ñop lac lajin (Efesios 5:1, 2).
5. ¿Yom ba mi lac cʼuchchocon lac bʌ tiʼ tojlel imágen tac yicʼot yan tac bʌ? Mach wenic (Éxodo 20:4, 5). Jehová mi yʌl chaʼan cojach yom mi lac chʼujutesan. Maʼanic miʼ tʼox i ñuclel yicʼot yañoʼ bʌ mi jinic yicʼot mach bʌ cuxulic. Yicʼot jaʼel, jini imágen tac maʼanic i pʼʌtʌlel chaʼan miʼ coltañonla (Salmo 115:4-8; Isaías 42:8).
6. ¿Bajcheʼ miʼ mejlel lac ñumen cʌn Dios? Junchajp jiñʌch cheʼ mi laj qʼuel chuqui tac tsiʼ mele, yicʼot mi lac wen ñaʼtan chuqui mi yʌqʼueñonla lac chʼʌmben isujm jini. I melbal tac Dios miʼ pʌsbeñonla chaʼan wen an i pʼʌtʌlel yicʼot i ñaʼtʌbal. Ti pejtelel chuqui tac tsaʼ bʌ i mele mi laj qʼuelben i cʼuxbiya (Salmo 19:1-6; Romanos 1:20). Yambʌ bajcheʼ mi mejlel laj cʌn Dios, jiñʌch cheʼ mi lac chajpan jini Biblia. Yaʼi miʼ ñumen subeñonla bajcheʼ yilal bʌ Dios. Yicʼot jaʼel miʼ subeñonla chuqui mi caj i mel yicʼot chuqui yom mi lac mel (Amós 3:7; 2 Timoteo 3:16, 17).
[Dibujo yaʼ ti iyopol 5]
Yaʼ ti Biblia yicʼot cheʼ mi laj qʼuelben i melbal miʼ mejlel lac wen cʌn Dios