Cʌntesʌntel 7
Bajcheʼ mi lac lʌcʼtesan lac bʌ ti Dios ti oración
¿Chucoch ñuc i cʼʌjñibal jini oración ti pejtelel ora? (1)
¿Majqui yom mi lac chocben majlel jini la coración, yicʼot bajcheʼ? (2, 3)
¿Chuqui tac yom mi laj cʼajtin ti lac coración? (4)
¿Jala yom maʼ mel oración? (5, 6)
¿Muʼ ba i laj ñichʼtan Dios ti pejtelel jini oración tac? (7)
1. Jini oración jiñʌch i pejcʌntel Dios yicʼot lac pecʼlel. Yom mi lac pejcan Dios ti oración ti pejtelel ora. Mi mucʼʌch lac mel, mi caj lac ñumen lʌcʼtesan lac bʌ baʼan cheʼ bajcheʼ juntiquil la camigo wen cʼuxbibil bʌ. Anquese Jehová wen ñuc yicʼot wen pʼʌtʌl, miʼ ñichʼtan la coración. ¿Muʼ ba a pejcan Dios ti pejtelel ora? (Salmo 65:2; 1 Tesalonicenses 5:17.)
2. Jini oración jiñʌch lac chʼujutesaya jaʼel. Jini chaʼan, cojach Jehová Dios yom mi lac melben oración. Cheʼ bʌ tsajñi Jesús ila ti Pañimil, tsiʼ chʌn pejca i Tat ti oración, i maʼanic majch yambʌ. Joñonla cheʼ yom mi lac mel jaʼel (Mateo 4:10; 6:9). Pero yom mi lac chʌn mel oración tiʼ cʼabaʼ Jesús. Cheʼ bajcheʼ jini, mi lac pʌs chaʼan wolʌch lac chʼʌm ti ñuc i yajñib Jesús, yicʼot chaʼan mucʼʌch lac ñop tsiʼ yʌcʼʌ i bʌ chaʼan tsiʼ mʌñʌyonla (Juan 14:6; 1 Juan 2:1, 2).
3. Cheʼ mi lac pejcan Dios ti oración, yomʌch mi lac pejcan yicʼot lac pusicʼal. Mach yomic mi lac chʌn al jini tsaʼix bʌ la cʌlʌ, mi muqʼuic i mejlel lac pejcan ti jumpʼejl jun (Mateo 6:7, 8). Miʼ mejlel lac mel oración bajcheʼic jach añonla pero yom mi lac chʼʌm ti ñuc, yicʼot bajcheʼ jach ora yicʼot baqui jach. Dios miʼ ñichʼtan jaʼel jini oración muʼ bʌ lac mel ti lac pusicʼal, anquese maʼanic mi lac chaʼlen tʼan (1 Samuel 1:12, 13). Wen jaʼel cheʼ mi lac bajñel mel la coración baʼ ñʌchʼʌl pañimil, yicʼot baʼ maʼanic mach an (Marcos 1:35).
4. ¿Chuqui tac mi mejlel a cʼajtin ti a woración? Jin jach muʼ bʌ mejlel i coltañonla chaʼan chʌn i yamigojonla Dios (Filipenses 4:6, 7). Jini oración lac pʌsbentel bʌ, miʼ pʌs chaʼan yomʌch mi lac mel oración tiʼ cʼabaʼ yicʼot chuqui mi caj i mel Jehová. Yicʼot jaʼel miʼ mejlel laj cʼajtin chuqui anto yom lac chaʼan, yicʼot chaʼan miʼ ñusan lac mul i chaʼan miʼ coltañonla lac lʌtʼ i yilʌbentel lac pusicʼal (Mateo 6:9-13). Ti la coración mach yomic lac bajñel cʼajtin chuqui jach bajñel la com. Cojach yom mi laj cʼajtin cheʼ bajcheʼ yom Dios (1 Juan 5:14).
5. Jatet mi mejlel a mel oración ti pejtelel ora, cheʼ miʼ ñijcañet a pusicʼal chaʼan maʼ suben Dios wocolix i yʌlʌ o maʼ chʼujutesan (1 Crónicas 29:10-13). Mach a cʌy a mel oración cheʼ an a wocol yicʼot cheʼ bʌbʌqʼuen maʼ sʌt i xucʼtʌlel a pusicʼal (Salmo 55:22; 120:1). Yicʼot jaʼel utsʼat cheʼ mi lac mel oración cheʼ mi caj laj cʼux lac waj (Mateo 14:19). Jehová miʼ subeñonla chaʼan mi lac chʌn mel oración ti «pejtelel ora» (Efesios 6:18).
6. Cheʼ mi lac mel jumpʼejl mulil wen tsʌts bʌ, mach yomic mi laj cʌy laj cʼajtiben Jehová ti oración chaʼan miʼ ñusʌbeñonla yicʼot chaʼan miʼ pʌsbeñonla i pʼuntaya. Dios «chajpʌbilix chaʼan miʼ ñusʌbeñonla» pero mi mucʼʌch lac tsictesan jini lac mul yicʼot mi lac chaʼlen wersa chaʼan maʼanix mi lac chʌn mel (Salmo 86:5; Proverbios 28:13).
7. Jehová cojach miʼ yubiben i yoración jini tojoʼ bʌ. Chaʼan miʼ ñichʼtan Dios a woración, jatet yom maʼ chaʼlen wersa chaʼan maʼ wajñel cheʼ bajcheʼ an Tiʼ mandar (Proverbios 15:29; 28:9). Cheʼ maʼ mel oración, yom maʼ mel yicʼot a pecʼlel (Lucas 18:9-14). Yomʌch maʼ mel chuqui maʼ cʼajtin ti oración. Cheʼ bajcheʼ jini maʼ pʌs chaʼan wolʌch a ñop yicʼot chaʼan jini a woración isujmʌch. Cojach bajcheʼ jini Jehová mi caj i jacʼbeñet a woración tac (Hebreos 11:6).