Weñoʼ bʌ rey yicʼot jontoloʼ bʌ

CHEʼ bʌ Salomón tsaʼix i cʌyʌ Jehová, Israel tsaʼ tʼoxle i yumʌntel ti chaʼmojt, cheʼʌch bajcheʼ tsiʼ wʌn alʌ Jehová. Jini Rehoboam tsaʼ bʌ i chʼʌmʌ i corona, tsiʼ wen ticʼla jini tejclum jini chaʼan tsiʼ tʌtsʼʌyob i bʌ jini lujunmojt tejclum am bʌ ti norte. Jini chaʼmojt tejclum chʌn xucʼul bʌ tsaʼ ajñiyob ti yumʌntel David yaʼ ti Jerusalén jiñobʌch tsaʼ bʌ sujtiyob i yumʌntel ti Judá am bʌ ti sur.

Chaʼan tsiʼ ñusayob tʼan yicʼot chaʼan maʼanic tsiʼ ñopoyob Dios jini yumʌlob, mi juntiquilic ili chaʼmojt tejclum tsiʼ yubiyob i ñʌchʼtilel yicʼot maʼanic tsaʼ pʼojli i chubʌʼan. Pero jini ñumen leco jax bʌ tsiʼ mele jiñʌch i yumʌntel Israel am bʌ ti norte, come ti tejchibal i yumʌntel tsaʼ caji pʼolob chʼujutesaya mach bʌ isujmic. Anquese Dios tsiʼ choco majlel xʼaltʼañob cheʼ bajcheʼ Elías yicʼot Eliseo —iliyobi an tsaʼ bʌ i chaʼ techeyob chʼojyel—, maʼanic tsiʼ jacʼʌyob. Ti wiʼil, Dios tsiʼ yʌqʼue ti cʼʌb Asiria chaʼan miʼ chʼʌm Israel.

Cheʼ tsaʼ ñumi 100 jabil tiʼ wiʼil jini i yumʌntel Judá am bʌ ti sur yicʼot jaʼel tsiʼ yubiyob wocol ti Dios. Jini xʼaltʼañob i chaʼan Dios tsiʼ subeyob jini reyob, pero tsʼitaʼob jach tsaʼ bʌ i jacʼʌyob yicʼot tsiʼ chaʼleyob wersa chaʼan miʼ tojʼesañob jini tejclum. Cheʼ bajcheʼ, jini rey Josías tsaʼ caji i jisan i chʼujutesʌntel jini diosteʼ tac yicʼot tsiʼ chaʼ teche i chʼujutesʌntel Jehová yaʼ tiʼ templo. Cheʼ woli jini eʼtel, tsaʼ tajle i juñilel baʼ tsʼijbubil i Mandar Moisés. Wen tijicña tsaʼ yubi Josías tsaʼ caji i ñumen sub chaʼan miʼ tsʼaʼleñob i chʼujutesʌntel diosteʼ tac.

Chʼijiyem jax ti ubintel, come jini tsaʼ bʌ tiliyob ti qʼuexol Josías mach cheʼix tsiʼ chʌn meleyob. Jini chaʼan Jehová tsiʼ yʌqʼue ti cʼʌb jini añoʼ bʌ ti Babilonia chaʼan miʼ chʼʌmob Judá yicʼot chaʼan miʼ jisan Jerusalén yicʼot i templo. Jini mach bʌ anic tsaʼ chʌmiyob tsaʼ cʌjchiyob majlel ti Babilonia, yicʼot Dios albilix i chaʼan, chaʼan mi caj i ñumel lujumpʼejl i chʌncʼal (70) jab cheʼ miʼ chaʼ sujtelob ti lumal. Cheʼ baʼ ora jini, Judá jochol tsaʼ ajni.

Jinto mi tilel jini Rey albilix bʌ —jini Mesías—, mi juntiquilic i pʼolbal David mi caj i chʼʌmben i yumʌntel. Cheʼ jaʼel , yonlel jini reyob tilemoʼ bʌ tiʼ pʼolbal David tsiʼ pʌsʌyob tiʼ melbal chaʼan winicob ti pañimil mach melbilobic chaʼan miʼ chaʼleñob yumʌntel. Ti isujm, cojach jini Mesías mi caj i mejlel ti yumʌntel. Jini chaʼan Jehová tsiʼ sube jini cojix bʌ reyob: «Locʼsan a corona [...] maʼanix mi caj i chʌn ñaʼtʌntel jinto cheʼ miʼ tilel jini Toj bʌ Winic yajcʌbil bʌ, muʼ bʌ caj i chʼʌm ti wenta» (Ezequiel 21:26, 27).

(Loqʼuem ti 1 Reyes, 2 Reyes, jini capítulo 10 cʼʌlʌl ti 36 chaʼan 2 Crónicas yicʼot Jeremías 25:8-11.)