¿Chucoch tsac mele lojon jini Traducción del Nuevo Mundo?

Ti wajali jini i testigojob Jehová tsiʼ chaʼleyob ti imprimir, tsiʼ cʼʌñʌyob yicʼot tsiʼ pucuyob yan tac bʌ Biblia. Pero tsac ñaʼta lojon chaʼan yomʌch miʼ chaʼ tsʼijbuntel jini Biblia chaʼan miʼ mejlel i tajob i coltʌntel winicob xʼixicob chaʼan «miʼ cʌñob i sujmlel» come jiñʌch yom bʌ Dios (1 Timoteo 2:3, 4). Jin chaʼan, ti 1950 joñon lojon tsaʼ caji c locʼ lojon majlel ti parte tac jini Biblia melbilix bʌ bajcheʼ miʼ chaʼleñob tʼan pejtelel winicob xʼixicob ti ili ora, Traducción del Nuevo Mundo. Ili Biblia melbil bajcheʼ mi yʌl jini jun tsʼijbubil bʌ wajali yicʼot maʼanic chuqui tsaʼ qʼuextʌbenti, tsaʼ mejli ñumen ti 120 tʼan tac.

Cʼʌñʌlʌch jumpʼejl Biblia mach bʌ wocolic miʼ ñaʼtʌntel. Jini tʼan tac miʼ qʼuextʌyel come mach lajalix miʼ pejcʌntel bajcheʼ wajali, cabʌl tʼan tac maʼanix miʼ chʼʌmbentel isujm o wocol ti ñaʼtʌntel. Cheʼ jaʼel, tsaʼ tajle jun tac tsaʼ bʌ tsʼijbunti wajali ñumen wem bʌ ti chʼʌmbentel isujm yicʼot tsaʼ cʼoti ti ñumen chʼʌmbentel isujm jini Biblia am bʌ ti tʼan hebreo, arameo yicʼot ti griego.

Cʼʌñʌlʌch jumpʼejl Biblia maʼanic bʌ miʼ qʼuextʌben i tʼan Dios. Jini muʼ bʌ i tsʼijbuñob Biblia ti yan tac bʌ tʼan, mach yomic miʼ qʼuextʌbeñob i sujmlel, yom miʼ melob bajcheʼ mi yʌl jini jun tsaʼ bʌ tsʼijbunti wajali. Ti cabʌl Biblia tac, i cʼabaʼ Dios, Jehová, maʼanic tsiʼ tsʼijbuyob yaʼ ti Chʼujul bʌ Tsʼijbujel.

Cʼʌñʌlʌch jumpʼejl Biblia muʼ bʌ i yʌcʼ ti cʌjñel majqui tsiʼ yʌcʼʌ ti tsʼijbuntel (2 Samuel 23:2). Yaʼ ti Traducción del Nuevo Mundo, tsaʼ chaʼ tsʼijbubenti ochel i cʼabaʼ Jehová, come yaʼ ti jun tsaʼ bʌ tsʼijbunti wajali miʼ tajtʌl ñumen ti 7,000 cheʼ bajcheʼ maʼ qʼuel yaʼ ti entʌl (Salmo 83:18). Wocolix yʌlʌyob jini tsaʼ bʌ i wen sajcʌbeyob i sujmlel, come mi lac wen taj lac tijicñʌyel cheʼ mi lac pejcan jini Biblia, come toj jamʌl miʼ pʌsben i pensar Dios. Mi an a chaʼan jini Biblia Traducción del Nuevo Mundo o yambʌ Biblia, mic subeñet lojon chaʼan yom maʼ ñʌmʼan a pejcʌben i Tʼan Jehová ti jujumpʼejl qʼuin (Josué 1:8; Salmo 1:2, 3).

• ¿Chucoch tsac ñaʼta lojon chaʼan cʼʌñʌlʌch miʼ chaʼ tsʼijbuntel jini Biblia?

• ¿Chuqui yom miʼ melob ti jujumpʼejl qʼuin jini yomoʼ bʌ i mel chuqui miʼ cʼajtin Dios?