¿Chuqui yom mi lac mel cheʼ mi lac chajpan lac bʌ chaʼan tempa bʌ?

Mi juntiquil i testigo Jehová woliʼ cʌntesañet chaʼan jini Biblia, yom maʼ ñaxan chajpan muʼ bʌ caj laʼ qʼuel. Chaʼan maʼ ñumen chʼʌmben isujm jini muʼ bʌ caj a pʌsbentel yaʼ ti tempa bʌ, yom maʼ ñaxan chajpan a bʌ. Mi caʼ ñumen taj a coltʌntel mi mucʼʌch a ñaxan chajpan a bʌ chaʼan jini tempa bʌ ti jujumpʼejl semana.

Yajcan baqui yicʼot bajcheʼ ora miʼ mejlel a chajpan a bʌ. ¿Bajcheʼ ora ñumen wen maʼ chajpan a bʌ? ¿Jimba ti sʌcʼajel cheʼ maxto a teche a weʼtel o jin to ti acʼʌlel cheʼ tsaʼix majliyob ti wʌyel a walobilob? Anquese maʼanic cabʌl ora miʼ mejlel a chajpan a bʌ, yom maʼ ñaʼtan jaypʼejl ora mi caj a cʼʌn chaʼan maʼ chajpan a bʌ yicʼot maʼanic chuqui yom miʼ mʌctañet. Sʌclan jumpʼejl a wajñib baʼ ñʌchʼʌl, mach yom juʼucña radio, televisión o teléfono. Cheʼ bʌ mi caj a pejcan jini Biblia ñaxan mele oración, bajcheʼ jini mi caj i coltañet chaʼan maʼanic maʼ pensarin chuqui maʼ cʼojoʼtan, mi cheʼʌch maʼ mel bajcheʼ jini mi caj a ñumen chʼʌmben isujm i Tʼan Dios (Filipenses 4:6, 7).

Sajcʌben i jacʼbal jini cʼajtiya tac chaʼan miʼ mejlel a jacʼ. Teche a pejcan yan tac bʌ jun loqʼuem bʌ ti Biblia, chaʼan tsʼitaʼ a wujilix chuqui mi caj i yʌjlel yaʼi. Chʼʌmben isujm jini título woli bʌ a pejcan o capítulo chaʼan jini libro, ñaʼtan bajcheʼ jini subtítulo miʼ coltañonla chuqui mi yʌl jini temaj, qʼuele tiʼ pejtelel jini dibujo tac yicʼot jini cʼajtiya tac muʼ bʌ i wiʼil mejlel, muʼ bʌ i ñumen tsictesan jini ñuc bʌ i cʼʌjñibal. Pejcan jujumpʼejl párrafo yicʼot sajcʌben i jacʼbal jini cʼajtiya tac. Sajcan jini texto tac yaʼ bʌ tsʼijbubil yicʼot maʼ pejcan, cheʼ jaʼel ñaʼtan bajcheʼ miʼ lajin yicʼot woli bʌ a qʼuel (Hechos 17:11). Cheʼ maʼ tajben i jacʼbal jini cʼajtiya tac, yom maʼ joy ñupʼ cojach jini tʼan wen ñuc bʌ i cʼʌjñibal, chaʼan miʼ coltañet a cʼajtesan i jacʼbal. Ti wiʼil, yaʼ ti tempa bʌ miʼ mejlel a letsan a cʼʌb chaʼan maʼ wʌl bajcheʼ tsaʼ chʼʌmbe isujm, anquese mach cabʌlic muʼ bʌ a wʌl.

Cheʼ maʼ chajpan jini temaj tac muʼ bʌ i qʼuejlel ti jujumpʼejl semana, mi caj a wotsan tsijiʼ tac bʌ cʌntesa ti a «chubʌʼan» (Mateo 13:51, 52).

• ¿Chuqui yom maʼ mel chaʼan maʼ wʌn chajpan a bʌ chaʼan jini tempa bʌ?

• ¿Bajcheʼ yom maʼ chajpan a bʌ chaʼan miʼ mejlel a jacʼ jini cʼajtiya tac muʼ bʌ i mejlel yaʼ ti tempa bʌ?