¿Bajcheʼ miʼ mejlel a locʼsʌben i wenlel cheʼ maʼ pejcan jiñi Biblia?

¿Am baʼ ñaʼta a mel jumpʼejl eʼtel (troñel) wen ñuc bʌ, pero wocol jax tsaʼ wubi chaʼan maʼ meleʼ? Tajol tsaʼ tʼoxo bajcheʼ mi caj a mel chaʼan mach wen wocolic maʼ wubin. Lajal miʼ yujtel jaʼel tiʼ pejcʌntel jiñi Biblia. Tajol mi laj cʼajtiben lac bʌ, ¿baqui mi caj c tech? Ti ili cʌntesʌntel mi caj laj qʼuel chaʼpʼej uxpʼejl ticʼojel muʼ bʌ caj i coltañet chaʼan maʼ ñusan a bʌ tiʼ pejcʌntel jiñi Biblia.

1. ¿Chucoch yomʌch mi lac pejcan jiñi Biblia ti jujumpʼejl qʼuin?

Jiñi muʼ bʌ i pejcan jiñi Biblia ti jujumpʼejl qʼuin, o jiñi i mandar lac Yum, tijicña mi caj i chumtʌl i wen mi caj i loqʼuel pejtelel chuqui miʼ mel (pejcan Salmo 1:​1-3). Chaʼan maʼ tech, miʼ mejlel a pejcan chaʼpʼej uxpʼejl minuto ti jumpʼejl qʼuin. Cheʼ bʌ maʼ ñumen cʌn jiñi i Tʼan Dios, ñumento mi caj a mulan a pejcan.

2. ¿Chuqui miʼ mejlel a mel chaʼan maʼ locʼsʌben i wenlel cheʼ maʼ pejcan jiñi Biblia?

Chaʼan mi lac locʼsʌben i wenlel muʼ bʌ lac pejcan yaʼ ti Biblia yom mi la cʌqʼuen i yorajlel chaʼan mi lac ñaʼtan muʼ bʌ lac pejcan. Ili libro mach cojach yom mi lac pejcan, yom mi lac ñaʼtan chuqui miʼ yʌl jaʼel (Josué 1:8). Cheʼ bʌ woli (choncol) a pejcan, melben a bʌ ili cʼajtiya tac: «¿Chuqui miʼ cʌntesañon tiʼ tojlel Jehová ili versículo tac? ¿Bajcheʼ miʼ mejlel j cʌcʼ ti ñuc tij cuxtʌlel? ¿Bajcheʼ miʼ mejlel j cʼʌn chaʼan mij coltan yambʌlob?».

3. ¿Bajcheʼ miʼ mejlel a tajben i yorajlel chaʼan maʼ pejcan jiñi Biblia?

¿Wocol ba maʼ wubin chaʼan maʼ tajben i yorajlel chaʼan maʼ pejcan jiñi Biblia? Mach a bajñel jach. Chaʼlen wersa chaʼan maʼ cʼʌn ti wen jiñi i yorajlel am bʌ a chaʼan (Efesios 5:​16). Aqʼuen i yorajlel chaʼan maʼ pejcan jiñi Biblia. An muʼ bʌ i pejcañob ti sʌcʼan. An muʼ bʌ i pejcañob cheʼ bʌ miʼ cʼajob i yo, tajol cheʼ bʌ miʼ cʼuxob i waj. I an muʼ bʌ i pejcañob cheʼ ti acʼʌlel, cheʼ bʌ muqʼuix i cajelob ti wʌyel. ¿Bajcheʼ ora maʼ mejlel a pejcan jatet?

LAʼ LAC ÑUMEN ÑAʼTAN

4. Cʌñʌ a ñusan a bʌ cheʼ bʌ maʼ pejcan jiñi Biblia

Tajol wocol mi la cubin chaʼan mi lac tech lac pejcan jiñi Biblia. Pero lajal bajcheʼ jumpʼejl bʌlñʌcʼʌl maʼañic bʌ mi lac mulan laj cʼux ti ñaxan cʼunteʼ cʼunteʼ mi lac tech lac mulan, cheʼ mi lac chaʼlen wersa lac pejcan jaʼel jiñi Biblia mi caj i cʼotel lac mulan. Pejcanla 1 Pedro 2:2 i tem alʌla iliyi:

• Cheʼ muqʼuic a pejcan jiñi Biblia ti jujumpʼejl qʼuin, ¿muʼ ba caj a ñumen mulan a pejcan maʼ wʌl?

Qʼuelela jiñi VIDEO chaʼan mi laʼ cʌn chaʼtiqui uxtiquil xcolelob tsaʼ bʌ cʼotiyob i mulan i pejcañob jiñi Biblia. Cheʼ jiñi tem alʌla iliyi:

VIDEO: Xcolelob tsaʼ bʌ cʼotiyob i cʼuxbin jiñi i Tʼan Dios (5:​33)

• Ti jiñi video, ¿chuqui ti wocol tsiʼ ñusayob jiñi xcolelob?

• ¿Chuqui tsiʼ coltayob chaʼan miʼ mejlelob i pejcan jiñi Biblia ti jujumpʼejl qʼuin?

• ¿Chuqui tsiʼ meleyob chaʼan ñumento miʼ ñusañob i bʌ cheʼ miʼ pejcañob jiñi Biblia?

Chaʼan maʼ tech, mele iliyi:

• Yajcan jumpʼejl wem bʌ traducción yicʼot muʼ bʌ i cʼʌn mach bʌ wocolic tʼan tac. Ñopo a cʼʌn jiñi Traducción del Nuevo Mundo mi an ti jiñi tʼan a wujil bʌ.

• Teche a pejcan jiñi relato tac muʼ bʌ a wen mulan. Chaʼan maʼ ñaʼtan chuqui miʼ mejlel a mel, qʼuele jiñi recuadro «Coltʌntel chaʼan maʼ tech a pejcan a Biblia».

• Tsʼijbun baqui jaxʌl woli a pejcan majlel jiñi a Biblia. Cʼʌñʌ jiñi recuadro «¿Baqui jaxʌl woli c pejcan majlel jiñi c Biblia?», muʼ bʌ i tilel ti ili libro.

• Cʼʌñʌ jiñi aplicación JW Library^®. Mi tsaʼ chaʼle ti instalar ti a teléfono o ti a tableta, miʼ mejlel a pejcan yicʼot a ñʌchʼtan jiñi Biblia jin jach baqui añet.

• Cʼʌñʌ jiñi eʼtijib tac muʼ bʌ i tilel yaʼ ti Traducción del Nuevo Mundo. Yaʼi mi caj a taj mapa tac, recuadro tac yicʼot jumpʼejl glosario muʼ bʌ caj i coltañet a ñumen mulan a pejcan jiñi Biblia.

5. Chajpan a bʌ chaʼan jiñi estudio

Pejcanla Salmo 119:​34 i tem alʌla iliyi:

• ¿Chucoch yomʌch maʼ mel oración cheʼ bʌ muʼto caj a pejcan jiñi Biblia o cheʼ mi caj a chajpan a bʌ chaʼan jiñi estudio?

¿Bajcheʼ miʼ mejlel a locʼsʌben i wenlel ili estudio? Cheʼ bʌ maʼ chajpan a bʌ chaʼan jiñi cʌntesʌntel tac chaʼan ili estudio, ñopo a mel iliyi:

1. Pejcan pejtelel jiñi párrafo muʼ bʌ i tilel ti jiñi ñaxan tac bʌ parte chaʼan jiñi cʌntesʌntel tac.

2. Sʌclan jiñi texto tac, pejcan i qʼuele bajcheʼ miʼ taj i bʌ yicʼot jiñi woli bʌ a cʌn majlel.

3. Sʌpʌ jiñi tʼan tac ñuc bʌ i cʼʌjñibal muʼ bʌ i jacʼ jiñi cʼajtiya tac. Ili mi caj i coltañet cheʼ bʌ woletix ti estudio a wicʼot jiñi woli bʌ i cʌntesañet.

¿A wujilix ba?

Jiñi i testigojonbʌlon Jehová an lon j cʼʌñʌ cabʌl Biblia, pero mic mulan lon j cʼʌn jiñi Traducción del Nuevo Mundo come toj chuqui miʼ yʌl yicʼot mach wocolic miʼ chʼʌmbentel i sujm, cheʼ jaʼel miʼ chʼʌm tilel i cʼabaʼ Dios (qʼuele jiñi tema muʼ bʌ i tilel ti jw.org: «¿Añoʼ ba i bajñel Biblia jiñi i testigojob Jehová?»).

TSAʼ BɅ LAJ CɅÑɅ

Chaʼan maʼ ñumen locʼsʌben i wenlel cheʼ maʼ pejcan jiñi Biblia aqʼuen i yorajlel chaʼan maʼ pejcan, cʼajtiben i coltaya Dios chaʼan maʼ chʼʌmben i sujm yicʼot chajpan a bʌ chaʼan jiñi estudio.

¿Chuqui tsaʼ cʌñʌ?

• ¿Chuqui miʼ mejlel a mel chaʼan maʼ ñumen mulan a pejcan jiñi Biblia?

• ¿Bajcheʼ ora miʼ mejlel a pejcan jiñi Biblia?

• ¿Chucoch ñuc i cʼʌjñibal cheʼ maʼ chajpan a bʌ chaʼan jiñi estudio?

CɅÑɅ YAN TAC BɅ

Qʼuele chuqui tac miʼ mejlel i coltañet chaʼan maʼ ñumen locʼsben i wenlel cheʼ maʼ pejcan jiñi Biblia.

«Ñusan a bʌ cheʼ maʼ pejcan jiñi Biblia» (Tema am bʌ ti Lac Tsictesʌbentel)

Qʼuele uxchajp muʼ bʌ i mejlel a mel chaʼan maʼ pejcan jiñi Biblia.

«¿Bajcheʼ miʼ mejlel i coltañon jiñi Biblia? Parte 1: Sʌclan ñuc tac bʌ i cʼʌjñibal yaʼ ti Biblia» (Tema am bʌ ti jw.org)

Qʼuele chuqui miʼ mejlel a mel chaʼan maʼ ñusan a bʌ tiʼ pejcʌntel jiñi Biblia.

«¿Bajcheʼ miʼ mejlel i coltañon jiñi Biblia? Parte 2: Cʌñʌ a ñusan a bʌ tiʼ pejcʌntel jiñi Biblia» (Tema am bʌ ti jw.org)

Qʼuele chuqui miʼ yʌlob chaʼtiqui uxtiquilob añix bʌ ora i cajelob i pejcan jiñi Biblia.

¿Bajcheʼ miʼ mejlel lac pejcan jiñi Biblia yicʼot lac locʼsʌben i wenlel? (2:​06)