CɅNTESɅNTEL 37
¿Chuqui miʼ yʌl jiñi Biblia chaʼan jiñi eʼtel yicʼot jiñi taqʼuin?
¿Am baʼ wen chaʼle pensar chaʼan maʼañic a weʼtel (troñel) o a taqʼuin? Mi cheʼʌchi, tajol wocol an la cubi chaʼan mi lac taj chuqui i cʼʌjñibal bʌ lac chaʼan yicʼot chaʼan mi lac chʼujutesan Jehová. Jiñi Biblia miʼ yʌqʼueñonla wem bʌ ticʼojel muʼ bʌ mejlel i coltañonla.
1. ¿Chuqui miʼ yʌl jiñi Biblia chaʼan jiñi eʼtel?
Dios yom chaʼan mi la cubin lac tijicñʌyel ti la queʼtel. Jiñi Biblia miʼ yʌl: «Yom miʼ ñucʼan lac pusicʼal ti la queʼtel. ¿Am ba yambʌ tijicña bʌ?» (Eclesiastés 2:24). Jehová miʼ chaʼlen tsʌts bʌ eʼtel. Cheʼ mi lac lajin i wen la cujil eʼtel, woli (choncol) lac mel muʼ bʌ i mulan yicʼot mi la cubin lac tijicñʌyel.
Jiñi eʼtel ñucʌch i cʼʌjñibal, pero mach yomic mi lac ñumen qʼuel ti ñuc cheʼ bajcheʼ i chʼujutesʌntel Jehová (Juan 6:27). Jehová miʼ yʌcʼ i tʼan chaʼan mi caj i yʌqʼueñonla chuqui i cʼʌjñibal lac chaʼan cheʼ jiñʌch ñaxan mi la cʌcʼ ti laj cuxtʌlel i melol i yeʼtel.
2. ¿Bajcheʼ yom mi laj qʼuel jiñi taqʼuin?
Jiñi Biblia miʼ yʌl chaʼan jiñi taqʼuin an i cʼʌjñibal, pero cheʼ jaʼel miʼ yʌl chaʼan mach jiñic jach i cʼʌjñibal lac chaʼan chaʼan mi lac taj lac tijicñʌyel (Eclesiastés 7:11, 12). Jin chaʼan, jiñi Biblia miʼ yʌl chaʼan mach yomic mi laj cʌlʌx mulan jiñi taqʼuin, i jin chaʼan miʼ yʌqʼueñonla ili ticʼojel: «Yom tijicñayetla yicʼot jiñi am bʌ laʼ chaʼan» (pejcan Hebreos 13:5). Cheʼ tijicñayonla chaʼan chuqui an lac chaʼan maʼañic mi caj laj cʌlʌx sʌclan taqʼuin, cheʼ jaʼel maʼañic mi caj lac wen chaʼlen bet (Proverbios 22:7). Cheʼ jaʼel, maʼañic mi lac chaʼlen alas chaʼan mi lac taj taqʼuin yicʼot maʼañic mi lac chaʼlen wersa chaʼan mi lac sujtel ti rico.
3. ¿Bajcheʼ miʼ mejlel laj cʼʌn ti wen jiñi lac taqʼuin?
Jehová juntiquilʌch Dios muʼ bʌ i tʼox chuqui an i chaʼan, i joñonla mi lac lajin cheʼ mi lac pʌs lac pʼejwlel yicʼot mi lac tʼoxben chuqui an lac chaʼan jiñi yambʌlob (1 Timoteo 6:18). Junchajp bajcheʼ miʼ mejlel laj cʼʌn ti wen jiñi taqʼuin jiñʌch cheʼ mi laj coltan jiñi congregación yicʼot jiñi i cʼʌjñibal bʌ i chaʼañob, ñumento jiñi la quermañujob. Jehová mach jiñic miʼ qʼuel jaypʼejl mi la cʌcʼ, jiñʌch chucoch mi lac mel. Mi ti jumpʼejl lac pusicʼal mi la cʌcʼ, mi caj la cubin lac tijicñʌyel yicʼot mi caj i yubin i tijicñʌyel Jehová (pejcan Hechos 20:35).
LAʼ LAC ÑUMEN ÑAʼTAN
Laʼ laj qʼuel bajcheʼ miʼ coltañonla cheʼ pʼisbil jach bajcheʼ mi laj qʼuel jiñi eʼtel yicʼot cheʼ tijicñayonla chaʼan chuqui am bʌ lac chaʼan.
4. Pʌsʌ chaʼan wem bʌ xʼeʼtelet chaʼan maʼ wʌqʼuen i ñuclel Jehová
Mi la camigo Jehová mi caj i coltañonla chaʼan bajcheʼ yilal yom mi laj qʼuel jiñi la queʼtel. Qʼuelela jiñi VIDEO i tem alʌla iliyi:
¿Bajcheʼ yilal i melbal Jason i bajcheʼ yilal miʼ qʼuel i yeʼtel? ¿Baqui bʌ maʼ ñumen mulan?
¿Chuqui tsiʼ mele chaʼan wen jach miʼ qʼuel jiñi i yeʼtel?
Pejcanla Colosenses 3:23, 24 i tem alʌla iliyi:
¿Chucoch ñuc i cʼʌjñibal cheʼ mi lac chaʼlen eʼtel tiʼ pejtelel lac pusicʼal yicʼot lac pʼʌtʌlel?
Jiñi eʼtel ñucʌch i cʼʌjñibal, pero mach yomic mi lac ñumen qʼuel ti ñuc cheʼ bajcheʼ i chʼujutesʌntel Jehová.
5. Cheʼ tijicñayonla chaʼan chuqui am bʌ lac chaʼan miʼ coltañonla
Cabʌl lac piʼʌlob miʼ chaʼleñob wersa i tempañob i taqʼuin cheʼ bajcheʼ cʼamel miʼ mejlelob, pero jiñi Biblia qʼuexelʌch chuqui miʼ yʌl. Pejcanla 1 Timoteo 6:6-8 i tem alʌla iliyi:
¿Chuqui ti ticʼojel miʼ yʌcʼ jiñi Biblia?
Tijicñayonla anquese tsʼitaʼ jach chuqui an lac chaʼan. Qʼuelela jiñi VIDEO i tem alʌla iliyi:
¿Chucoch tijicñayob ili familia anquese tsʼitaʼob jach i taqʼuin?
¿Ixcu mi cabʌlix chuqui an lac chaʼan i ñumen la comto? Jesús tsiʼ yʌlʌ jumpʼejl relato chaʼan miʼ tsictesan chaʼan añʌch i wocolel. Pejcanla Lucas 12:15-21 i tem alʌla iliyi:
¿Chuqui maʼ cʌn ti ili relato tsaʼ bʌ i yʌlʌ Jesús? (Qʼuelela jiñi versículo 15).
Pejcanla Proverbios 10:22 i lajala yicʼot 1 Timoteo 6:10. Cheʼ jiñi tem alʌla iliyi:
¿Baqui bʌ jiñi ñumen ñuc bʌ i cʼʌjñibal, jin cheʼ la camigo Jehová, o cheʼ an cabʌl lac taqʼuin? ¿Chucoch?
¿Chuqui ti wocol miʼ mejlel lac taj cheʼ an cabʌl lac taqʼuin?
6. Jehová mi caj i yʌqʼueñonla chuqui i cʼʌjñibal lac chaʼan
Cheʼ bʌ maʼañic la queʼtel o lac taqʼuin miʼ mejlel i coltañonla laj qʼuel bajcheʼ cʼamel mi lac ñop Jehová. Qʼuelela jiñi VIDEO chaʼan mi laʼ ñaʼtan chuqui miʼ mejlel laʼ mel cheʼ woli laʼ ñusan jiñi wocol. I cheʼ jiñi tem alʌla iliyi:
¿Chuqui ti wocol tsiʼ ñusa jiñi hermano?
¿Chuqui tsiʼ mele chaʼan miʼ loqʼuel ti jiñi wocol?
Pejcanla Mateo 6:25-34 i tem alʌla iliyi:
Cheʼ ñaxan mi la cʌcʼ Jehová ti laj cuxtʌlel, ¿chuqui miʼ yʌl chaʼan mi caj i mel ti lac tojlel?
AN MUʼ BɅ I YɅLOB: «Yom mic wen chaʼlen eʼtel chaʼan mic mʌcʼlan c familia. Maʼañic mic mejlel ti majlel ti tempa bʌ tiʼ pejtelel ora».
¿Chuqui ti texto miʼ yʌqʼueñet a ñop chaʼan cheʼ ñaxan maʼ wʌcʼ i chaʼan bʌ Jehová jiñʌch ñumen wem bʌ?
TSAʼ BɅ LAJ CɅÑɅ
Jiñi eʼtel yicʼot taqʼuin i cʼʌjñibalʌch lac chaʼan, pero mach yomic miʼ mʌctañonla chaʼan mi lac melben i yeʼtel Jehová.
¿Chuqui tsaʼ cʌñʌ?
¿Chuqui miʼ mejlel i coltañet chaʼan wen jach maʼ qʼuel jiñi a weʼtel?
¿Bajcheʼ miʼ coltañonla cheʼ tijicñayonla chaʼan chuqui am bʌ lac chaʼan?
Mi Jehová miʼ yʌcʼ i tʼan chaʼan mi caj i yʌqʼuen chuqui i cʼʌjñibal i chaʼan i wiñicob, ¿bajcheʼ miʼ mejlel a pʌs chaʼan mucʼʌch a ñop?
CɅÑɅ YAN TAC BɅ
Qʼuele chuqui miʼ yʌl jiñi Biblia chaʼan jiñi taqʼuin.
«¿Jimba tiʼ caj jiñi taqʼuin cheʼ an cabʌl chuqui mach bʌ weñic?» (Tema am bʌ ti jw.org)
Qʼuele bajcheʼ miʼ mejlel laj cʼʌn jiñi taqʼuin chaʼan mi la cʌqʼuen i tijicñʌyel Jehová.
«¿Chuqui miʼ yʌl jiñi Biblia chaʼan baqui ora miʼ mejlel la cʌcʼ lac taqʼuin?» (Tema am bʌ ti jw.org)
¿Am ba i wocolel cheʼ mi lac chaʼlen alas chaʼan taqʼuin?
«Muʼ bʌ i yʌl jiñi Biblia: Jiñi alas chaʼan taqʼuin» (¡Jamʌx a wut!, marzo i chaʼan 2015)
Qʼuele chuqui tsiʼ ñijcʌbe i pusicʼal juntiquil muʼ bʌ i chaʼlen alas chaʼan taqʼuin yicʼot muʼ bʌ i chaʼlen xujchʼ chaʼan miʼ qʼuextan i melbal.
«Tsaʼ c wen mulaj jiñi carrera tac chaʼan caballo» (Lac Tsictesʌbentel, 1 i chaʼan noviembre, 2011)