Laʼ lac yajcan lac mel muʼ bʌ i yʌqʼuen i ñuclel Dios
«Jini cʌntesʌbil bʌ miʼ wen tsajin i bijlel» (PR. 14:15)
1, 2. a) ¿Chuqui yom mi lac ñaʼtan cheʼ bʌ an chuqui mi lac yajcan lac mel? b) ¿Chuqui ti cʼajtiya tac mi caj lac jacʼ?
JUJUMUJCʼ mi lac mel. An mach bʌ wen ñuc taquic, pero an muʼ bʌ i junyajl mejlel i qʼuextan laj cuxtʌlel. ¿Chuqui woli lac taj ti tʼan? Jiñʌch jiñi muʼ bʌ lac yajcan lac mel. Pero mach yʌlʌyic mi wen ñuc o mach wen ñuquic, tiʼ pejtelel ora yom mi lac ñaʼtan la cʌqʼuen i ñuclel Dios cheʼ bʌ mi lac mel iliyi (pejcan 1 Corintios 10:31).
2 ¿Wocol ba maʼ wubin chaʼan an chuqui maʼ yajcan, o mach cheʼiqui? Mi la com lac taj lac ñaʼtʌbal bajcheʼ xñoptʼan, yom mi laj cʌn chuqui jiñi wem bʌ yicʼot mach bʌ weñic, i mi lac yajcan jiñi wem bʌ mi laj qʼuel joñonla i mach jiñic muʼ bʌ i yʌlob yañoʼ bʌ (Rom. 12:1, 2; Heb. 5:14). ¿Chucoch yambʌ yom mi laj cʌn lac yajcan chuqui wem bʌ? ¿Chucoch an i tajol wocol chaʼan mi lac ñaʼtan chuqui mi lac yajcan? ¿Chuqui miʼ mejlel lac mel chaʼan mi la cʌqʼuen i ñuclel Dios ti chuqui mi lac yajcan lac mel?
¿Chucoch añʌch chuqui yom mi lac yajcan lac mel?
3. ¿Chuqui tac mach yomic mi lac chʼʌm ti ñuc cheʼ bʌ an chuqui mi lac yajcan lac mel?
3 Cheʼ bʌ yaʼ ochem jiñi principio tac am bʌ ti Biblia añʌch chuqui yom mi lac yajcan lac mel. Mi maʼañiqui, jiñi lac piʼʌlob ti clase o ti eʼtel mi caj i ñaʼtañob chaʼan mach xucʼuloñicla ti jiñi muʼ bʌ lac ñop o chaʼan ti ora mi lac mel chuqui yomob. Tajol miʼ chaʼleñob lot, miʼ melob trampa o miʼ chaʼleñob xujchʼ i cheʼ jiñi miʼ subeñoñobla chaʼan mi lac tem lac bʌ la quicʼotob o chaʼan maʼañic mi lac subob. Pero mi tsaʼ lac mele jiñi, woli lac tsajcan muʼ bʌ i melob yonlelob (Éx. 23:2). Jiñi xñoptʼan muʼ bʌ i yajcan chuqui tac miʼ yʌqʼuen i ñuclel Dios maʼañic miʼ ñusan ti pʼis chuqui miʼ yʌl jiñi i conciencia cʌntesʌbil bʌ ti Biblia tiʼ caj jach an i bʌqʼuen o chaʼan yom wen miʼ qʼuejlel tiʼ tojlel yambʌlob (Rom. 13:5).
4. ¿Chucoch jiñi yañoʼ bʌ miʼ mejlel i ñop i subeñoñobla chuqui yom mi lac mel?
4 An lac piʼʌlob muʼ bʌ i subeñoñobla chuqui yom mi lac mel, pero mach chaʼañobic i jontolil. Tiʼ pejtelel ora an wem bʌ la camigojob muʼ bʌ i subeñoñobla chaʼan mi lac jacʼbeñob i ticʼojel. Cheʼ jaʼel, jiñi lac familia, anquese mach yaʼix chumulonla la quicʼotob, mucʼʌch i bej ñaʼtañonla i yomob i coltañonla cheʼ bʌ an chuqui ñuc bʌ yom mi lac yajcan lac mel. Jumpʼejl ejemplo, laʼcu lac ñaʼtan chaʼan woli lac ñaʼtan bajcheʼ mi caj lac tsʼʌcʌntel. Yaʼ ti Biblia an jamʌ tsiquil bʌ miʼ yʌjlel chaʼan mach bʌ yomic mi lac chʼʌm, bajcheʼ jiñi chʼichʼ (Hech. 15:28, 29). Pero an yan tac bʌ maʼañic bʌ miʼ jamʌ ajlel, i jujuntiquil xñoptʼan mi caj i ñaʼtan mi mucʼʌch caj i chʼʌm o maʼañic.a Tajol jiñi muʼ bʌ i cʼuxbiñoñobla miʼ subeñonla chuqui yom mi lac mel. Pero yom cʼajal lac chaʼan chaʼan jujuntiquil xñoptʼan chʼʌmʌlix bʌ i chaʼan jaʼ «mi caj i chʼʌm majlel jiñi i cuch» (Gál. 6:4, 5). Jiñi ñumen ñuc bʌ i cʼʌjñibal jiñʌch cheʼ sʌc laj conciencia tiʼ tojlel Dios, mach chaʼañic mi lac mel chuqui yom wiñicob (1 Tim. 1:5).
5. ¿Chuqui mi caj i coltañonla chaʼan maʼañic miʼ cʼuñʼan lac ñopoñel?
5 Añʌch i wocolel cheʼ mach la cujilic chuqui yom mi lac mel. ¿Chucoch mi la cʌl iliyi? Come jiñi xcʌntʼan Santiago tsiʼ yʌlʌ chaʼan jiñi tile bixel bʌ i pusicʼal jujumujcʼ miʼ qʼuextan i bijlel» (Sant. 1:8). Cheʼ bajcheʼ jumpʼejl barco mach bʌ añic i remojlel miʼ ñijcʌntel ti tsʌts bʌ icʼ jaʼal, jiñi lac piʼʌl miʼ mejlel i mel chuqui miʼ yʌlob yambʌlob, iliyi miʼ mejlel i cʼuñʼesʌben i ñopoñel. Cheʼto jaʼel an muʼ bʌ i yʌqʼueñob tiʼ mul yambʌlob chaʼan bajcheʼ yilal tsaʼ ujtiyob (1 Tim. 1:19). ¿Chuqui miʼ mejlel lac mel chaʼan maʼañic miʼ yujtel iliyi? Mi lac chaʼlen wersa chaʼan xucʼulonla ti lac ñopoñel (pejcan Colosenses 2:6, 7). Chaʼan xucʼulonla yom mi laj cʌn lac yajcan lac mel muʼ bʌ i pʌs chaʼan mucʼʌch lac ñop tiʼ Tʼan Dios (2 Tim. 3:14-17). Pero añʌch chuqui tac miʼ mejlel i mʌctañonla chaʼan mi lac yajcan chuqui mi lac mel. ¿Baqui tac bʌ?
¿Chucoch an i tajol wocol chaʼan mi lac yajcan chuqui mi lac mel?
6. ¿Bajcheʼ miʼ mejlel i ticʼlañonla jiñi bʌqʼuen?
6 Junchajp muʼ bʌ i mejlel i ticʼlañonla jin cheʼ mi lac bʌcʼñan chaʼan mi lac ñajʌyel, chaʼan mach weñic miʼ loqʼuel jiñi muʼ bʌ lac mel o chaʼan mi la cubin quisin. Mucʼʌch i chʼʌmbentel i sujm iliyi, come maʼañic majqui yom i mel junchajp muʼ bʌ i yʌqʼuen wocol o muʼ bʌ i yʌqʼuen i ñusan quisin. Junchajp muʼ bʌ caj i coltañonla chaʼan mi lac mʌlben jiñi lac bʌqʼuen jiñʌch cheʼ mi laj cʼuxbin Dios yicʼot jiñi i Tʼan. Jiñi cʼuxbiya mi caj i ñijcañonla chaʼan mi laj qʼuel chuqui miʼ yʌl jiñi Biblia yicʼot jiñi jun tac cheʼ bʌ muʼto caj lac yajcan junchajp ñuc bʌ i cʼʌjñibal. I cheʼ bajcheʼ jiñi, tajol maʼañic mi caj lac taj lac sajtemal. ¿Chucoch? Come jiñi Biblia miʼ cʌntesan yicʼot miʼ yʌqʼuen i ñaʼtʌbal jiñi maxto bʌ añic chuqui wen yujilob (Pr. 1:4, TNM).
7. ¿Chuqui mi laj cʌn tiʼ tojlel David?
7 ¿Yom ba i yʌl jiñi chaʼan tiʼ pejtelel ora mi caj lac yajcan jiñi ñumen wem bʌ bij? Maʼañic come luʼ xmulilonla (Rom. 3:23). Jumpʼejl ejemplo, David juntiquilʌch wiñic wen am bʌ i ñaʼtʌbal yicʼot xucʼul bʌ tsaʼ ajñi, pero tsiʼ taja i sajtemal i tiʼ caj jiñi tsiʼ taja wocol tac i tsiʼ yʌqʼue i taj wocol yambʌ lac piʼʌlob (2 S. 12:9-12). Pero maʼañic tsiʼ cʌyʌ i yajcan i mel chuqui tac miʼ mulan Dios tiʼ caj jach jiñi i sajtemal tac (1 R. 15:4, 5). Cheʼ bajcheʼ ili rey, yom mi laj cʼajtesan chaʼan Jehová miʼ ñajʌtesan lac sajtemal i miʼ ñusan lac mul, yicʼot chaʼan tiʼ pejtelel ora mi caj i coltan jiñi muʼ bʌ i cʼuxbiñob yicʼot miʼ jacʼbeñob i tʼan. Cheʼ bajcheʼ jiñi, maʼañic mi caj la cʌcʼ chaʼan jiñi lac sajtemal tac miʼ mʌctañonla (Sal. 51:1-4, 7-10).
8. ¿Chuqui miʼ pʌsbeñonla tsaʼ bʌ i yʌlʌ Pablo chaʼan jiñi ñujpuñel?
8 ¿Chuqui mi caj i coltañonla chaʼan maʼañic mi lac wen chaʼlen pensar cheʼ bʌ yom mi lac yajcan chuqui mi caj lac mel? Jiñʌch cheʼ mi lac chʼʌmben i sujm chaʼan an i tajol mach junchajpic jach chuqui jiñi wem bʌ. Laʼ laj qʼuel tsaʼ bʌ i yʌlʌ jiñi apóstol Pablo cheʼ bʌ tsiʼ taja ti tʼan chaʼan bʌ jiñi ñujpuñel. Tiʼ tsʼijbu: «Mi an majqui miʼ ñaʼtan chaʼan maʼañic miʼ mejlel i ticʼ i bʌcʼtal cheʼ bej i bajñelto i mach chʌn cʌlʌx peqʼuix i jabilel, ñumen wen cheʼ miʼ ñujpuñel. Mach mulilic. Pero mi an majqui tsaʼix i ñaʼta ti jumpʼejl i pusicʼal i mach cʼʌñʌlic miʼ ñujpuñel miʼ yubin, i mucʼʌch i mejlel i ticʼ chuqui yom yicʼot tsaʼix i yʌlʌ tiʼ pusicʼal chaʼan i bajñel jach mi caj i yajñel, wen chuqui mi caj i mel» (1 Cor. 7:36-38). Cheʼ bajcheʼ mi laj qʼuel, Pablo tsiʼ yʌlʌ chaʼan wen cheʼ maʼañic mi lac ñujpuñel, pero maʼañic tsiʼ yʌlʌ chaʼan jin jach wen jiñi.
9. ¿Yom ba mi lac pensarin chuqui miʼ yʌlob jiñi yambʌlob? Tsictesan.
9 ¿Yom ba mi lac pensarin chuqui miʼ ñaʼtañob jiñi yambʌlob? Tsʼitaʼ yomʌch. Laʼ laj qʼuel chuqui tsiʼ yʌlʌ Pablo cheʼ bʌ tsiʼ taja ti tʼan chaʼan i cʼuxol bʌlñʌcʼʌl tac tajol tsaʼix bʌ aqʼuenti jiñi melbil tac jach bʌ dios. Tsiʼ ñaxan cʌñʌ chaʼan anquese mach lecojic chuqui mi lac yajcan lac mel, an i tajol mucʼʌch i ticʼlan jiñi cʼuñoʼ bʌ conciencia. ¿Chuqui tsiʼ mele Pablo? «Mi jiñi bʌlñʌcʼʌl miʼ yʌcʼ ti yajlel jiñi quermañu, maʼañix baʼ ora mi caj j cʼux weʼel chaʼan maʼañic mi cʌcʼ ti yajlel jiñi quermañu» (1 Cor. 8:4-13). Joñonla jaʼel yom mi lac chʼʌm ti ñuc bajcheʼ yilal mi caj i qʼuel yambʌlob jiñi muʼ bʌ lac mel, pero mach yomic miʼ ñajʌyel lac chaʼan chaʼan jiñi ñumen ñuc bʌ i cʼʌjñibal jiñʌch cheʼ mi lac ñaʼtan bajcheʼ mi caj i ticʼlan bajcheʼ añonla la quicʼot Jehová (pejcan Romanos 14:1-4). ¿Chuqui ti principio tac miʼ mejlel i coltañonla chaʼan mi lac yajcan lac mel muʼ bʌ i yʌqʼuen i ñuclel Dios?
6 muʼ bʌ caj i coltañonla chaʼan mi lac yajcan chuqui wen
10, 11. a) ¿Chuqui mi caj i coltañonla chaʼan maʼañic mi lac mel chuqui jach bajñel la com yaʼ ti la cotot? b) ¿Chuqui yom miʼ cʼajtesan jiñi ancianojob cheʼ bʌ an chuqui mi caj i yajcañob i mel baqui ochem jiñi hermanojob?
10 Mach yomic mi lac mel chuqui jach bajñel la com. Jiñi yom bʌ mi lac ñaxan cʼajtiben lac bʌ jiñʌch: «¿Añʌch ba tic wenta chaʼan mic mel iliyi?». Jiñi rey Salomón tiʼ tsʼijbu: «Jini muʼ bʌ i chañʼesan i bʌ miʼ cajel ti quisin, pero an wen bʌ i ñaʼtʌbal jini muʼ bʌ i peqʼuesan i bʌ» (Pr. 11:2).
11 Jumpʼejl ejemplo, jiñi tatʌlob miʼ mejlel i tsʼitaʼ acʼob ti libre i yalobil chaʼan miʼ yajcañob chuqui miʼ melob. Pero jiñi mach yomic i yʌl chaʼan librejob chaʼan miʼ melob chuqui jach yomob (Col. 3:20). Cheʼ jaʼel, anquese jiñi ñaʼʌl añʌch chuqui miʼ mejlel i mel, mach yomic miʼ ñajʌyel i chaʼan chaʼan jiñi i ñoxiʼal jiñʌch aqʼuebil bʌ tiʼ wenta chaʼan miʼ yajcan chuqui mi caj i mel tiʼ familia (Pr. 1:8; 31:10-18; Efes. 5:23). I jiñi wiñic yom cʼajal i chaʼan chaʼan pʼisbil jach jiñi i yeʼtel, come yom miʼ chuc i bʌ ti Cristo (1 Cor. 11:3). Yaʼ ti congregación, jiñi ancianojob an i tajol añʌch chuqui yom miʼ yajcañob i mel baqui ochemob jiñi hermanojob. Jin chaʼan, yom miʼ wen qʼuelob chaʼan cojach miʼ melob jiñi tsʼijbubil bʌ ti Biblia (1 Cor. 4:6). Cheʼ jaʼel, yom miʼ chaʼleñob wersa chaʼan tiʼ pejtelel ora miʼ jacʼob chuqui miʼ yʌl jiñi xucʼul bʌ xʼeʼtel (Mat. 24:45-47). Mi mach la comic lac ñusan wocol yicʼot chaʼan miʼ ñusañob wocol jiñi yañoʼ bʌ, yom la cujil chaʼan an jach baqui jaxʌl chuqui miʼ mejlel lac mel yicʼot jin jach yom mi lac yajcan lac mel jiñi añʌch bʌ ti lac wenta.
12. a) ¿Chucoch yomʌch mi lac ñaxan mel investigación? b) ¿Chuqui ochem ti jiñi investigación yom bʌ mi lac mel?
12 Wen mele investigación. Salomón tiʼ tsʼijbu: «Jini bʌx bʌ ti eʼtel muʼ bʌ i ñaʼtan chuqui yom i mel miʼ yʌcʼ ti pʼojlel i chubʌʼan. Pero pejtel muʼ bʌ i ñaʼtañob i toʼol tajob i chubʌʼan mi caj i yochelob ti pobre» (Pr. 21:5). Laʼ laj qʼuel jumpʼejl ejemplo. ¿Am ba baʼ subentiyet jumpʼejl negocio? Mach ti orajic yom maʼ waʼ jacʼ tiʼ caj jach maʼ wen mulan. Ñaxan wen chaʼlen ti investigar, cʼajtin ticʼojel tac chaʼan bʌ ili tema yicʼot qʼuele jiñi principio tac muʼ bʌ i mejlel i coltañet (Pr. 20:18). Cheʼ jiñi mele jumpʼejl lista chaʼan jiñi wenlel yicʼot wocol tac muʼ bʌ i mejlel i yʌcʼ. Cʼajtesan chaʼan jiñi xñoptʼan wen am bʌ i ñaʼtʌbal miʼ ñaxan wen ñaʼtan «jaypʼejl mi caj i jisan» (Luc. 14:28). Mach jin jach yom maʼ ñaʼtan chuqui mi caj i yujtel yic’ot jiñi a taqʼuin, ñaʼtan jaʼel bajcheʼ mi caj i ticʼlañet ti bajcheʼ añet a wicʼot Dios. Yomʌch mi la cʌqʼuen i yorajlel yicʼot mi lac chaʼlen wersa chaʼan mi lac mel jiñi investigación, pero mi caj i coltañonla chaʼan maʼañic chuqui mi lac waʼ mel ti ora yicʼot chaʼan maʼañic mi lac wen taj wocol.
13. a) ¿Chuqui miʼ subeñonla Santiago 1:5? b) ¿Chucoch weñʌch cheʼ mi laj cʼajtiben i ñaʼtʌbal Dios?
13 Cʼajtin a ñaʼtʌbal. Chaʼan jiñi muʼ bʌ lac yajcan lac mel miʼ yʌqʼuen i ñuclel Dios, yom mi laj cʼajtiben i coltaya. Santiago tsiʼ yʌlʌ: «Mi an majqui anto yom i ñaʼtʌbal, laʼ i chʌn cʼajtiben Dios, i mi caj i yʌqʼuentel come Dios miʼ wen acʼ tiʼ pejtelel i pusicʼal i maʼañic miʼ sʌclan lac mul» (Sant. 1:5). Mach yomic mi laj quisñin la cʌl chaʼan i cʼʌjñibalʌch lac chaʼan i coltaya Dios chaʼan wen chuqui mi lac mel (Pr. 3:5, 6). Cheʼ jaʼel, cheʼ mi lac bajñel ñop ti chuqui mi lac ñaʼtan miʼ mejlel i pʌyonla majlel ti mach bʌ weñic bij. Cheʼ mi lac suben Jehová chaʼan miʼ yʌqʼueñonla lac ñaʼtʌbal i mi laj qʼuel chuqui miʼ yʌl jiñi Biblia, jiñi chʼujul bʌ espíritu mi caj i coltañonla laj qʼuel chucoch woli lac yajcan junchajp (Heb. 4:12; pejcan Santiago 1:22-25).
14. ¿Chucoch mach yomic mi laj cʌy ti wiʼil chuqui yom mi lac yajcan lac mel?
14 Mach yomic mi laj cʌy ti wiʼil jiñi yom bʌ mi lac yajcan lac mel. I sujmʌch chaʼan mach yomic mi lac waʼ ñaʼtan ti ora, ñaxan yom mi lac chaʼlen ti investigar yicʼot mi laj cʼajtin lac ñaʼtʌbal. Cheʼʌchi, «jini cʌntesʌbil bʌ miʼ wen tsajin i bijlel» (Pr. 14:15). Pero mach weñic jaʼel cheʼ mi laj cʌy ti wiʼil jiñi yom bʌ mi lac mel. Jiñi tile bixel bʌ i pusicʼal miʼ mejlel i sʌclan i tʼan chaʼan maʼañic chuqui miʼ mel (Pr. 22:13). Pero mach yujilic chaʼan cheʼ bajcheʼ iliyi añix chuqui woliʼ yajcan i mel: Woliʼ yʌcʼ chaʼan jiñi yambʌlob miʼ yajcañob chuqui yom miʼ mel.
15, 16. ¿Chuqui yom mi lac mel chaʼan mi lac tsʼʌctesan jiñi tsaʼ bʌ lac ñaʼta?
15 Laʼ lac mel jiñi tsaʼ bʌ lac ñaʼta. Mi mejlel lac jisʌben i cʼʌjñibal pejtelel chuqui tsaʼ lac mele mi maʼañic mi lac tsʼʌctesan jiñi tsaʼ bʌ lac ñaʼta. Salomón tsiʼ yʌlʌ: «Tiʼ pejtelel chuqui maʼ mel, mele bajcheʼ yom melol» (Ec. 9:10). Cheʼ jaʼel, yom mi laj cʼʌn pejtelel chuqui an lac chaʼan chaʼan mi lac taj jiñi la com bʌ. Laʼcu lac ñaʼtan juntiquil publicador yom bʌ ochel ti precursor. ¿Mucʼʌch ba caj i mejlel i tsʼʌctesan i subtʼan? Mucʼʌch, pero cojach mi mucʼʌch i qʼuel chaʼan jiñi i yeʼtel yicʼot ñusaqʼuin tac maʼañic miʼ toʼol jisʌben i pʼʌtʌlel yicʼot i tiempo.
16 An i tajol, anquese weñʌch jiñi tsaʼ bʌ lac yajca wocol mi la cubin chaʼan mi lac mel. Miʼ yujtel iliyi come «jiñi pañimil an tiʼ pʼʌtʌlel Satanás» (1 Juan 5:19). Cheʼʌchi, «woliyonla ti jatsʼ [...] tiʼ contra jiñi yumʌlob ti icʼyochʼan bʌ pañimil, ili jiñobʌch jiñi xibajob ti panchan» (Efes. 6:12). Cheʼ bajcheʼ tsiʼ yʌlʌ Pablo yicʼot Judas, pejtelel jiñi yomoʼ bʌ i yʌqʼuen i ñuclel Dios lajal bajcheʼ woliyob ti guerra (1 Tim. 6:12; Jud. 3).
17. ¿Chuqui yom Jehová chaʼan mi lac mel cheʼ bʌ añix chuqui tsaʼ lac yajca?
17 Yom mi laj qʼuel bajcheʼ yilal miʼ loqʼuel jiñi tsaʼ bʌ lac yajca yicʼot mi an chuqui yom mi laj qʼuextan. An i tajol jiñi muʼ bʌ lac mel mach cheʼic miʼ loqʼuel bajcheʼ tsaʼ lac ñaʼta, come «maʼanic majqui yujil baqui ora mi caj i chujquel ti wocol» (Ec. 9:11, 12). Pero an tsaʼ tac bʌ lac yajca lac mel baqui Jehová miʼ pijtan chaʼan xucʼul mi la cajñel, mach yʌlʌyic chuqui miʼ yujtel. Jumpʼejl ejemplo, jiñi voto tac muʼ bʌ lac mel cheʼ bʌ mi lac ñujpuñel yicʼot mi la cʌcʼ lac bʌ ti Dios maʼañic miʼ mejlel ti qʼuextʌyel. Jehová miʼ pijtan chaʼan mucʼʌch lac tsʼʌctesan jiñi lac tʼan (pejcan Salmo 15:1, 2, 4). I sujmʌch, an yan tac bʌ muʼ bʌ lac yajcan mach bʌ wen ñuquic. Jiñi xñoptʼan am bʌ i ñaʼtʌbal miʼ chʌcʌ qʼuel i maʼañic miʼ yʌcʼ chaʼan jiñi chañʼesa bʌ o jiñi i tsʌtslel i pusicʼal miʼ mʌctan chaʼan an chuqui miʼ qʼuextan o chaʼan miʼ cʌy (Pr. 16:18). Jiñi ñumen ñuc bʌ i cʼʌjñibal i chaʼan jiñʌch cheʼ miʼ yʌqʼuen i ñuclel Dios.
Laʼ laj cʌntesan yambʌlob chaʼan miʼ yajcañob i mel muʼ bʌ i yʌqʼuen i ñuclel Dios
18. ¿Bajcheʼ miʼ mejlel i cʌntesañob i yalobil jiñi tatʌlob chaʼan miʼ yajcañob i mel chuqui wem bʌ?
18 Cabʌl chuqui miʼ mejlel i melob jiñi tatʌlob chaʼan miʼ coltañob i yalobil chaʼan miʼ yajcañob i mel muʼ bʌ i yʌqʼuen i ñuclel Dios. Junchajp bajcheʼ miʼ mejlel i cʌntesañob jiñʌch yicʼot i yejemplo (Luc. 6:40). Tajol miʼ mejlel laʼ tsictesʌben chuqui tsaʼ laʼ ñaxan mele cheʼ bʌ an chuqui mi caj laʼ yajcan laʼ mel. Tajol an chuqui mi caj laʼ wʌqʼuen i bajñel yajcañob. Mi weñʌch chuqui miʼ yajcan i mel, subenla chaʼan tijicñayetla chaʼan jiñi. Pero ¿ixcu mi mach weñic jiñi tsaʼ bʌ i yajca? Ñʌmʌl bʌ i melob jiñi tatʌlob jiñʌch cheʼ miʼ tojʼesʌbeñob i wocol. Pero an i tajol mach jiñic ñumen wem bʌ jiñi. Laʼcu lac ñaʼtan chaʼan juntiquil tatʌl miʼ yʌcʼ chaʼan jiñi i yalobil miʼ locʼsan i licencia chaʼan ñijca carro, pero jiñi chʼiton miʼ yʌqʼuentel jumpʼejl multa. Jiñi tatʌl miʼ mejlel i toj, pero mi tiʼ sube jiñi i yalobil chaʼan miʼ chaʼlen eʼtel chaʼan miʼ taj jiñi taqʼuin, tajol mucʼʌch caj i cʌn i chʼʌm tiʼ wenta chuqui miʼ mel (Rom. 13:4).
19. ¿Chuqui yom mi lac pʌsbeñob jiñi lac estudiantejob, i bajcheʼ ñumen wen mi lac mel?
19 Jesús tsiʼ yʌlʌ chaʼan jiñi xcʌntʼañonbʌla i chaʼan an ti lac wenta mi laj cʌntesan jiñi yambʌ lac piʼʌlob (Mat. 28:20). I junchajp ñuc bʌ i cʼʌjñibal yom bʌ mi lac pʌsben jiñi lac estudiantejob jiñʌch chaʼan miʼ cʌñob i yajcan i mel chuqui wen. Chaʼan miʼ mejlel lac mel jiñi, mach yomic mi lac subeñob chuqui yom miʼ melob ti jujunchajp chuqui miʼ ñusañob. Ñumen wen cheʼ mi laj coltañob i cʼʌn i ñaʼtʌbal yicʼot chaʼan miʼ chʼʌmob ti ñuc jiñi principio tac am bʌ ti Biblia chaʼan miʼ mejlel i yajcañob chuqui mi caj i melob. «Ti jujuntiquilonla mi caj lac waʼtʌl tiʼ tojlel Dios chaʼan miʼ yujtel meloñel ti lac tojlel chaʼan tsaʼ bʌ lac mele» (Rom. 14:12). Tiʼ sujm, cabʌl i sujmlel chucoch yomʌch mi lac chaʼlen wersa chaʼan mi lac yajcan lac mel muʼ bʌ i yʌqʼuen i ñuclel Jehová.
[Nota]
a Chaʼan maʼ ñumen cʌn chaʼan bʌ ili tema, qʼuele jiñi tema «¿Qué opino de las fracciones sanguíneas y de los procedimientos médicos que impliquen el uso de mi sangre?» (Nuestro Ministerio del Reino noviembre, 2006, página 3 cʼʌlʌl 6).
¿Bajcheʼ mi caj a jacʼ?
• ¿Chucoch yom mi laj cʌn lac yajcan chuqui mi caj lac mel?
• ¿Bajcheʼ miʼ ticʼlañonla jiñi bʌqʼuen, i bajcheʼ miʼ mejlel lac mʌlben?
• ¿Chuqui jiñi 6 yom bʌ mi lac mel chaʼan tiʼ pejtelel ora mi lac yajcan lac mel muʼ bʌ i yʌqʼuen i ñuclel Dios?
[Recuadro yicʼot foto]
Muʼ bʌ i mejlel lac mel chaʼan mi lac yajcan chuqui wem bʌ
1 Mach yomic mi lac mel chuqui jach bajñel la com
2 Wen mele investigación
3 Cʼajtin a ñaʼtʌbal
4 Mach yomic mi laj cʌy ti wiʼil jiñi yom bʌ mi lac yajcan lac mel
5 Laʼ lac mel jiñi tsaʼ bʌ lac ñaʼta
6 Yom mi laj qʼuel bajcheʼ yilal miʼ loqʼuel jiñi tsaʼ bʌ lac yajca yicʼot mi an chuqui yom mi laj qʼuextan
[Foto]
Jiñi tile bixel bʌ i pusicʼal lajal bajcheʼ juncojt barco mach bʌ añic i remojlel am bʌ baqui an tsʌts bʌ icʼ jaʼal