¡Mach comic chʌmel tsaʼ cʌlʌ!

BAJCHEʼ QUILAL TI WAJALI

Tsaʼ quila pañimil ti Paddington, jumpʼejl alʌ tejclum am bʌ yaʼ ti Londres (Inglaterra). Chumul quicʼot c ñaʼ yicʼot uxtiquil c chich. Jiñi c tat an jach qʼuiñil yaʼan, i an qʼuiñil maʼañic miʼ cʼotel come miʼ wen jap lembal.

Cheʼ bʌ chutonto, jiñi c mamá tsiʼ cʌntesayon c mel oración cheʼ bʌ mij cajel ti wʌyel. An jumpʼejl c Biblia wen chut bʌ i cojach miʼ chʼʌm tilel jiñi Salmos i joñoñix mic bajñel locʼben i músicajlel chaʼan miʼ mejlel j cʼʌyin. Ti jumpʼejl bʌ qʼuin tsaʼ c pejca jumpʼejl tʼan ti jumpʼejl libro baqui miʼ yʌl: «Mi caj i cʼotel i yorajlel baqui maʼañic mi caj laj qʼuel i yijcʼʌlel». Jiñi tsaʼ bʌ c pejca maʼañic tsiʼ yʌcʼʌyon ti wʌyel, mic ñaʼtan chuqui muʼ bʌ i cajel ti talto bʌ qʼuin. Mic suben c bʌ: «¿Anto ba yambʌ chuqui wem bʌ? ¿Chuqui mic mel ilayi?». ¡Mach comic chʌmel tsaʼ cʌlʌ!

Tsaʼ caji c mulan chaʼan bʌ xibajob. Jin chaʼan, tsaʼ caji c chaʼlen wersa chaʼan miʼ mejlel c pejcan jiñi chʌmeñoʼ bʌ i tsajñi quicʼot camigojob ti escuela yaʼ ti panteón. Cheʼ jaʼel, mi lon c tempan lon c bʌ chaʼan mi lon j qʼuel película tac chaʼan bʌ terror. Wen bʌbʌqʼueñʌch yilal, pero utsʼatʌch ti qʼuelol.

An jaxto 10 c jabilel, pero mach weñix chuqui woli c mel. Tsaʼ caji c wen ñuqʼueʼ cʼujts i tsaʼ caji c wen mulan, ti wiʼil tsaʼ c teche c ñucʼ marihuana. I cheʼ bʌ 11 c jabilel tsaʼ caji c tech c jap lembal anquese maʼañic mic wen mulan bajcheʼ yubil, pero mucʼʌch c mulan cheʼ miʼ yʌqʼuesañon. Mic wen mulan jiñi música yicʼot mic wen mulan son, i cheʼ bʌ mic mejlel, mic majlel ti qʼuiñijel tac yicʼot ti discoteca tac. Cheʼ ti acʼʌlel mic mucu loqʼuel ti cotot, i cheʼ ti sʌcʼan mic mucu ochel i maʼañic majqui miʼ qʼuelon. Lʌcʼʌ tiʼ pejtelel ora, wen lujbon i maʼañic mic majlel ti escuela. I cheʼ bʌ mucʼʌch c majlel ti clase, mic tsʼitaʼ jap c lembal cheʼ bʌ mi caj cochel ti yambʌ clase.

Ti jiñi cojix bʌ jab añon ti jiñi escuela, jiñi j calificación mach yoque weñic. Jiñi c mamá mach yujilic bajcheʼ ñoj yilal c melbal, tsiʼ wen aqʼue i chʼijyemlel i tsaʼ wen michʼa yicʼoton. Tsaʼ c wen aʼle lon c bʌ i tsaʼ junyajl loqʼuiyon majlel ti otot. Tsaʼ jumucʼ chumleyon quicʼot Tony, jiñi c novio, juntiquil rastafari. Wen yujil xujchʼ, miʼ chon droga i cʌmbil chaʼan wen jontol jaʼel. Ti wiʼil embarazada tsaʼ cʌyleyon i an jaxto 16 c jabilel pero añix juntiquil calobil.

BAJCHEʼQUI JIÑI BIBLIA TSIʼ QʼUEXTɅBE I PENSAR

Tsaʼ j cʌñʌ jiñi Testigojob cheʼ bʌ añon ti albergue baqui an xʼixicob añoʼ bʌ i yalobil, pero maʼañobic bʌ i ñoxiʼal. Tsaʼ mejliyon ti chumtʌl yaʼi tiʼ coltaya jiñi añoʼ bʌ i yeʼtel. Chaʼtiquil Testigojob miʼ tilel i julaʼtañob yambʌ ñaʼʌlob. Pero jumpʼejl bʌ qʼuin tsaʼ majliyon baqui woliyob ti tʼan chaʼan mic pʌsbeñob chaʼan mach i sujmic woli bʌ i yʌl jiñi Testigojob. Pero mach wocolic bajcheʼ tsiʼ jacʼʌyob jiñi j cʼajtiya tac i tsiʼ cʼʌñʌyob jiñi Biblia. Tsaʼ c mulaj cheʼ wen jach bajcheʼ miʼ qʼueloñob yicʼot cheʼ wen utsob. I jin chaʼan tsaʼ c jacʼʌ jumpʼejl estudio.

Mach jalic tsaʼ ñumi an chuqui tsaʼ j cʌñʌ yaʼ ti Biblia tsaʼ bʌ i qʼuexta j cuxtʌlel. Cʼʌlʌl cheʼ bʌ chutonto mic bʌcʼñan chʌmel, pero tsaʼ cʼoti j cʌn tsaʼ bʌ i yʌlʌ Jesús chaʼan jiñi chaʼ tejchel (Juan 5:28, 29). Cheʼ jaʼel tsaʼ j cʌñʌ chaʼan i wentajoñʌch Dios (1 Pedro 5:7). Jiñi muʼ bʌ i yʌl Jeremías 29:11 tsaʼ cʼoti tic pusicʼal. Miʼ yʌl: «Come cujil chuqui com c melbeñetla, cheʼen lac Yum. Com ñʌchʼʌletla. Mach comic miʼ tajetla wocol. Com cʌqʼueñetla chuqui utsʼat woli bʌ laʼ pijtan». Tsaʼ caji c ñop chaʼan mucʼʌch c mejlel ti chumtʌl ti Paraíso wʌʼ ti Lum (Salmo 37:29).

Jiñi testigojob tsiʼ wen pʌsʌyob i cʼuxbiya tic tojlel. Cheʼ bʌ cojaxto tsajñon ti tempa bʌ tsaʼ j qʼuele chaʼan wen utsʼatax ajñel yicʼotob yicʼot wen utsob tiʼ pejtelelob (Juan 13:34, 35). ¡Machʌch lajalic bajcheʼ jiñi iglesia baqui ajñemon! Jiñi Testigojob mach lecojic tsiʼ qʼueleyob chaʼan bajcheʼ añon. Tsaʼ i yʌqʼueyob i yorajlel chaʼan miʼ yajñelob yicʼoton, tsiʼ wen cʼuxbiyoñob i cabʌl jax bajcheʼ tsiʼ coltayoñob. I tsaʼ cubi c bʌ chaʼan añon ti jumpʼejl colem bʌ familia.

Cheʼ bʌ tsaʼ caji c pejcan jiñi Biblia, tsaʼ cʼoti j cʌn chaʼan yom mij qʼuextan c melbal, chaʼan cheʼ yom mic chumtʌl cheʼ bajcheʼ miʼ yʌl i mandar Dios. Wocol tsaʼ cubin chaʼan mij cʌy c ñucʼ cʼujts. Cheʼ jaʼel, tsaʼ cʼoti j qʼuel chaʼan an música muʼ bʌ i yʌqʼueñon c mulan chaʼan mic ñuqʼueʼ marihuana, i jin chaʼan tsaʼ caji c ñʌchʼtan yan tac bʌ música. Tsaʼ j cʌyʌ majlel ti qʼuiñijel tac yicʼot ti discoteca tac come cujil chaʼan yaʼi miʼ mejlel i yʌcʼon ti jap lembal. Tsaʼ c sʌcla yambʌ camigojob cujil bʌ chaʼan miʼ mejlel i coltañoñob (Proverbios 13:20).

Ti jiñi bʌ ora jaʼel, Tony woliʼ chʼʌm estudio yicʼot jiñi Testigojob. Cheʼ bʌ tsaʼ caji i jacʼbeñob majlel i cʼajtiya yicʼot jiñi Biblia, Tony tsaʼ caji i ñumen ñop chaʼan jiñi woli bʌ cʌn jiñʌch i sujmlel. Tsiʼ wen qʼuexta i melbal: Tsiʼ cʌyʌ jiñi jontol bʌ i yamigojob, tsiʼ cʌyʌ xujchʼ yicʼot tsiʼ cʌyʌ i ñucʼ marihuana. Chaʼan miʼ mejlel c melben lon i yeʼtel Jehová bajcheʼ yom, yom mi lon c ñujpuñel yicʼot miʼ mejlel lon c cʌqʼuen i chumlib lon calobil. Jin chaʼan ti 1982 tsaʼ ñujpuñiyon lojon.

Cʼajal c chaʼan chaʼan yaʼ ti Lac Tsictesʌbentel yicʼot ti ¡Jamʌx a wut!a mic sʌclan experiencia tac am bʌ mejlem i qʼuextañob i melbal cheʼ bajcheʼ com. Jiñi experiencia tac tsaʼ bʌ c pejca, tsiʼ wen coltayon, tsiʼ yʌqʼueyon c pʼʌtʌlel chaʼan mic bej chaʼlen wersa i maʼañic mic lujbʼan. Tic chʌn cʼajtibe Jehová chaʼan maʼañic miʼ lujbʼan yicʼoton. Tony yicʼot joñon, tsaʼ c chaʼle lon chʼʌmjaʼ bajcheʼ Testigo ti julio chaʼan 1982.

WENLEL TAC TAJBIL BɅ C CHAʼAN

Maʼan tic sʌtʌ j cuxtʌlel, wocolix i yʌlʌ cheʼ tsaʼ sujtiyon tiʼ yamiga Jehová. Tony yicʼot joñon, an lon j qʼuele bajcheʼ Jehová an i coltayon lojon cheʼ bʌ mi lon c ñusan wocol tac, cheʼ jaʼel mi lon c ñop tiʼ tojlel come an lon j qʼuele chaʼan maʼañic miʼ bajñel cʌyon lojon (Salmo 55:22).

An yʌqʼueyon lon tijicñʌyel cheʼ añʌch mejlem lon j coltan jiñi chaʼtiquil lon calobilob chaʼan miʼ sujtelob tiʼ yamigo Jehová. Tijicña mi cubin jaʼel cheʼ bʌ mij qʼuel chaʼan jiñi butsob woliʼ cʌñob majlel Jehová jaʼel.

Muqʼuix c mejlel ti wʌyel, maʼañix mic wen cʼojoʼtan chaʼan jiñi talto bʌ qʼuin yicʼot chaʼan jiñi chʌmel. Tony yicʼot joñon, wen cabʌl jax chuqui mi lon c mel come jujumpʼejl semana mi lon c julaʼtan jiñi congregación tac chaʼan jiñi Testigojob chaʼan mic ñuqʼuesʌben lon i pusicʼal jiñi hermanojob. I mi lon c tem chaʼlen subtʼan yicʼotob, i com lojon chaʼan jiñi quixtañujob mi ñopob ti Jesús i cheʼ bajcheʼ jiñi miʼ mejlelob ti chumtʌl tiʼ pejtelel ora.