Jumpʼejl ñuc bʌ majtañʌl

JIÑI sacapunta chucul bʌ i chaʼan Jordan lajal bʌ bajcheʼ alʌ barco mach wen añic i cʼʌjñibal yilal. Pero jumpʼejlʌch i majtan wen utsʼatax bʌ. Miʼ yʌl: «Tsiʼ majta aqʼueyon Russell cheʼ bʌ chʼitoñon to, jiñʌch juntiquil wen i cʌñʌ bʌ c familia». Cheʼ bʌ tsaʼ chʌmi (sajti) Russell, Jordan tsaʼ cʼoti i ñaʼtan chucoch wen ñuc tsaʼ qʼuejli tiʼ tojlel i tatuch yicʼot i tatob, yicʼot bajcheʼ tsiʼ colta i familia cheʼ bʌ tsiʼ ñusayob wocol. Jordan miʼ bej al: «Waʼli cabʌlix chuqui j cʌñʌ tiʼ tojlel, mux c wen qʼuel ti ñuc jiñi c majtan tsaʼ bʌ i yʌqʼueyon».

Ili ejemplo miʼ pʌs chaʼan juntiquil quixtañu tajol mucʼʌch i tsʼitaʼ qʼuel ti ñuc o maʼañic jumpʼejl majtañʌl, pero jiñi mucʼʌch bʌ i qʼuel ti ñuc, wen letsem i tojol mi caj i qʼuel. Jiñi Biblia miʼ taj ti tʼan jumpʼejl majtañʌl wen letsem bʌ i tojol, miʼ yʌl: «Tsiʼ wen cʼuxbi jini añoʼ bʌ ti pañimil Dios. Tsiʼ yʌcʼʌ cojach bʌ i Yalobil. Majqui jach miʼ ñop i Yalobil, maʼanic miʼ sajtel. Miʼ taj i cuxtʌlel mach bʌ anic miʼ jilel» (Juan 3:16).

¡Jumpʼejl majtañʌl muʼ bʌ i mejlel i yʌqʼuen i cuxtʌlel tiʼ pejtelel ora jiñi muʼ bʌ i chʼʌm! ¿Am ba yambʌ majtañʌl ñumen lets bʌ i tojol? An quixtañujob mach bʌ cheʼic miʼ qʼuelob, pero jiñi isujm bʌ xñoptʼañob «wen letsem i tojol» miʼ qʼuelob (Salmo 49:8; 1 Pedro 1:18, 19). Pero ¿chucoch tsiʼ yʌcʼʌ Dios jiñi i Yalobil bajcheʼ majtañʌl tiʼ tojlel jiñi wiñicob xʼixicob (quixtañujob)?

Jiñi apóstol Pablo miʼ tsictesan: «Tsaʼ ochi mulil ti pañimil chaʼan tiʼ mul juntiquil winic i cʼabaʼ Adán. Jini mulil tsiʼ yʌcʼʌ ti chʌmel pejtel winicob xʼixicob. Jini chaʼan mi lac chʌmel ti lac pejtelel, come tsaʼ lac chaʼle mulil ti lac pejtelel» (Romanos 5:12). Jiñi ñaxam bʌ wiñic, Adán, tsaʼ sujti ti xmulil cheʼ bʌ tsiʼ ñusʌbe i tʼan Dios, jin chaʼan tsaʼ chʌmi. Tiʼ mul Adán, pejtel i pʼolbal (jiñi quixtañujob) miʼ chʌmelob jaʼel.

«An i tojol mulil. Jini muʼ bʌ i chaʼleñob mulil wersa miʼ chʌmelob, jiñʌch i tojol. Pero lac majtan chʼoyol bʌ ti Dios jiñʌch laj cuxtilel mach bʌ anic miʼ jilel ti lac Yum Cristo Jesús» (Romanos 6:23). Chaʼan miʼ mejlel i coltʌntel jiñi quixtañujob ti jiñi chʌmel, Dios tsiʼ choco tilel i Yalobil, Jesucristo, chaʼan miʼ yʌcʼ i cuxtʌlel tiʼ tojlel jiñi quixtañujob. Wocolix i yʌlʌ chaʼan Cristo tsiʼ yʌcʼʌ i bʌ, cʌmbil bʌ bajcheʼ «i tojol jiñi mulil», majqui jach miʼ yʌcʼ i ñopoñel (chʼujbiya) ti Jesús mi caj i taj i cuxtʌlel tiʼ pejtelel ora (Romanos 3:24).

Cheʼ bʌ miʼ tajtʌl ti tʼan jiñi bendición tac muʼ bʌ i yʌcʼ Dios tiʼ tojlel Jesucristo chaʼan jiñi muʼ bʌ i melbeñob i yeʼtel (troñel), jiñi apóstol Pablo tsiʼ yʌlʌ: «Wocolix i yʌlʌ Dios chaʼan tsiʼ yʌqʼueñonla lac majtan cʼax letsem bʌ i tojol» (2 Corintios 9:15). Jiñi i tojol mulil jumpʼejlʌch wen ñuc bʌ majtañʌl, maʼañic yambʌ bajcheʼ miʼ mejlel la cʌl. Anquese Dios añʌch i yʌqʼueyonla cabʌl lac majtan, ¿chucoch jiñi i tojol mulil jiñʌch jiñi ñumen ñuc bʌ? ¿Chucoch mach lajalic bajcheʼ yambʌ majtañʌl tac aqʼuebil bʌ i chaʼañonla jiñi Dios?a ¿Bajcheʼ yilal yom mi laj qʼuel? Ili cʼajtiya tac mi caj i jajqʼuel ti jiñi chaʼpʼejl temaj muʼto bʌ caj laj qʼuel.