¿A wujilix ba?

¿Chucoch tsiʼ yʌcʼʌ tsʌts bʌ ticʼojel Jesús cheʼ jiñi judíojob miʼ lon acʼob i tʼan?

YAʼ tiʼ Mandar Moisés miʼ yʌl chaʼan añʌch baqui ora yom mi la cʌcʼ lac tʼan. Pero cheʼ tiʼ yorajlel Jesús, jiñi judíojob tsiʼ ñʌmtesayob i bʌ chaʼan miʼ yʌcʼob i tʼan tiʼ pejtelel chuqui miʼ yʌlob. Cheʼʌch miʼ ñop i yʌcʼob ti ñaʼtʌntel chaʼan isujmʌch chuqui miʼ yʌlob. Pero Jesús chaʼyajl tsiʼ yʌcʼʌ tsʌts bʌ ticʼojel tiʼ caj jiñi, i tsiʼ yʌlʌ: «Cheʼ maʼ chaʼlen tʼan, mi isujmʌch, ‹isujm cu›, cheʼet. Cheʼ mach isujmic, ‹mach isujmic›, cheʼet» (Mt. 5:33-37; 23:16-22).

Jumpʼejl diccionario muʼ bʌ i tsajin i chaʼan bʌ Dios miʼ yʌl chaʼan jiñi Talmud miʼ coltañonla laj qʼuel chaʼan jiñi judíojob ñʌmʌl i yʌcʼob i tʼan chaʼan tiʼ pejtelel chuqui miʼ yʌlob isujmʌch miʼ ñaʼtʌntel. Jiñi Talmud miʼ wen tsictesan baqui tac bʌ acʼ tʼan yom miʼ tsʼʌctesañob yicʼot baqui bʌ miʼ mejlel i jemob.

Mach cojach Jesús tsaʼ bʌ i yʌcʼʌ tsʌts bʌ ticʼojel tiʼ caj i costumbrejob. Juntiquil judío yujil bʌ chaʼan historia i cʼabaʼ Flavio Josefo tsiʼ yʌlʌ chaʼan tiʼ tojlel junmojt judíojob: «Maʼañic miʼ toʼol acʼob i tʼan come ñumen tsʌtsʌch miʼ ñaʼtañob bajcheʼ jiñi lot. Miʼ yʌlob chaʼan pejtelel quixtañu maʼañic bʌ miʼ ñopbentel i tʼan anquese muʼto i lon acʼ i tʼan tiʼ tojlel Dios chaʼan isujmʌch, mucʼʌch caj i tojob i mul». Jumpʼejl libro i chaʼan judíojob cʌmbil bʌ bajcheʼ Eclesiástico o Sabiduría de Jesús Ben Sirá miʼ yʌl jaʼel: «Juntiquil muʼ bʌ i wen acʼ i tʼan ti chuqui miʼ yʌl ñumen cabʌl i mul» (23:11). Jin chaʼan, Jesús tsiʼ yʌcʼʌ tsʌts bʌ ticʼojel chaʼan yomʌch mi lac wen qʼuel ti ñuc cheʼ mi lac cʌcʼ lac tʼan ti chuqui mi la cʌl. Miʼ sujmʌch woliyonla ti tʼan, mach wersajic yom mi la cʌcʼ lac tʼan chaʼan mi lac ñopbentel chuqui mi la cʌl.