¿Muʼ ba i yubin Dios bajcheʼ mi la cubin lac bʌ?

¿CHUQUI MI LAJ CɅN TIʼ MELBAL DIOS?

Cheʼ la cujil i yubintel chuqui miʼ ñusan yambʌlob yom i yʌl chaʼan miʼ mejlel laj cʌn, mi lac tʼox chʼʌmeʼ yicʼot mi lac chʼʌmben isujm bajcheʼ miʼ yubiñob i bʌ. Rick Hanson, juntiquil doctor wen chajpʌbil bʌ chaʼan miʼ qʼuel i cʼocʼlel lac jol, miʼ yʌl chaʼan tilemix ti lac tojlel cheʼ miʼ mejlel la cubin chuqui miʼ ñusan yambʌlob.

ÑAʼTANCU ILIYI: ¿Chucoch la cujil ubintel chuqui miʼ ñusan yambʌlob, pero jiñi añimal tac maʼañic miʼ mejlel? Jiñi Biblia miʼ subeñonla chaʼan Dios tsiʼ meleyonla (pʌtʌyonla) tiʼ yejtal (Génesis 1:26). Jiñi miʼ yʌcʼ ti ñaʼtʌntel chaʼan miʼ mejlel lac lajin yicʼot miʼ mejlel lac pʌs lac melbal (chaʼleya) bajcheʼ i chaʼan. Jin chaʼan, cheʼ bʌ juntiquil quixtañu yujil i yubintel chuqui miʼ ñusan yambʌlob, woli (choncol) i pʌs bajcheʼ miʼ yubin i bʌ Jehová, jiñi tsaʼ bʌ i Meleyonla am bʌ i pʼuntaya (Proverbios 14:31, TNM).

JIÑI BIBLIA MIʼ CɅNTESAÑONLA CHAʼAN DIOS MIʼ YUBIN BAJCHEʼ MI LA CUBIN LAC BɅ

Dios yujil ubintel jiñi wocol tac muʼ bʌ lac ñusan, i maʼañic miʼ mulan cheʼ mi lac ñusan wocol. Cheʼ mi lac ñaʼtan jiñi wocol tsaʼ bʌ i ñusa jiñi israelob cheʼ bʌ tsaʼ cʌjchiyob majlel ti Egipto yicʼot cheʼ tsiʼ chaʼleyob xʌmbal 40 jab yaʼ ti tiquin bʌ lum, jiñi Biblia miʼ yʌl: «Tiʼ pejtelel i wocol c tat lojon tsaʼ wubi wocol» (Isaías 63:9). Dios mach cojach tsiʼ ñaʼta jiñi wocol tac woli (yʌquel) bʌ i ñusañob, tsaʼʌch i yubi bajcheʼ miʼ yubiñob i bʌ. Dios miʼ yʌl: «Jini muʼ bʌ i ticʼlañetla miʼ ticʼlan Dios jaʼel» (Zacarías 2:8). Jin chaʼan, cheʼ an majqui miʼ ticʼlañonla, cheʼʌch bajcheʼ Dios woliʼ ticʼlʌntel.

Anquese jiñi lac pusicʼal miʼ ticʼlañonla o mi lac ñaʼtan chaʼan mach yomic miʼ pʌsbeñonla i pʼuntaya Dios, jiñi Biblia miʼ subeñonla chaʼan «ñumen ñuc Dios bajcheʼ lac pusicʼal. Yujil pejtelel chuqui an» (1 Juan 3:19, 20). Jiñi ñumen i cʌñʌyonbʌla jiñʌch Dios. Miʼ ñaʼtan chuqui mi lac ñusan, muʼ bʌ lac pensalin yicʼot bajcheʼ yubil mi la cubin lac bʌ, miʼ yubin jaʼel bajcheʼ woli la cubin.

Jiñi Biblia miʼ subeñonla:

• «Cheʼ jini mi caj a pejcañon. Mi caj c jacʼbeñet. Mi caj a cʼajtibeñon a coltʌntel. Mi caj c subeñet: ‹Wʌʼʌch añon›» (ISAÍAS 58:9).

• «Come cujil chuqui com c melbeñetla, cheʼen lac Yum. Com ñʌchʼʌletla. Mach comic miʼ tajetla wocol. Com cʌqʼueñetla chuqui utsʼat woli bʌ laʼ pijtan. Cheʼ jini mi caj laʼ pejcañon. Mi caj laʼ tilel laʼ pejcañon ti oración. Joñon mi caj cubibeñetla laʼ tʼan» (JEREMÍAS 29:11, 12).

• «Tempan i yaʼlel c wut ti limetej. ¿Mach ba otsʌbilic ti a wenta i yaʼlel c wut?» (SALMO 56:8).

DIOS I CɅÑɅYONLA, MIʼ CHʼɅMBEN ISUJM YICʼOT MIʼ YUBIN BAJCHEʼ MI LA CUBIN LAC BɅ

Cheʼ la cujil chaʼan Dios miʼ chʼʌmben isujm woli bʌ lac ñusan, ¿muʼ ba mejlel i coltañonla lac ñusan wocol tac? Laʼ laj qʼuel tsaʼ bʌ ujti tiʼ tojlel María.

«Wen cʼux tsaʼ cubi cheʼ bʌ tsaʼ j qʼuele bajcheʼ tsiʼ chaʼle wersa jiñi calobil am bʌ 18 i jabilel chaʼan miʼ mʌlben (jotben) jiñi cáncer, pero maʼañic tsaʼ mʌjli i chaʼan. Mach tojic chuqui miʼ yujtel ti laj cuxtʌlel tsaʼ j qʼuele, i wen tsʌts jax. Tsaʼ michʼayon quicʼot Jehová come maʼañic tsiʼ colta calobil.

Tsaʼ cʼoti c ñaʼtan chaʼan Jehová maʼañic miʼ cʼuxbiñon. Cheʼ bʌ tsaʼ ñumi wʌcpʼejl jab, tsaʼ c sube juntiquil wen uts bʌ camiga yaʼ ti congregación chaʼan bajcheʼ yubil mi cubin c bʌ. Tsiʼ ñaxan wen ñʌchʼtayon i maʼañic tsiʼ waʼchoco c tʼan, cheʼ jiñi tsiʼ cʼajtesʌbeyon jumpʼejl texto tsaʼ bʌ cʼoti tic pusicʼal: Jiñʌch 1 Juan 3:19, 20, muʼ bʌ i yʌl chaʼan ‹ñumen ñuc Dios bajcheʼ lac pusicʼal. Yujil pejtelel chuqui an›. Cheʼ jiñi, tiʼ tsictesʌbeyon chaʼan Jehová miʼ chʼʌmben isujm jiñi wocol tac muʼ bʌ lac ñusan.

Anquese tsiʼ subeyon jiñi, maʼañic tsaʼ loqʼui jiñi c michʼajel ti Jehová. Jin chaʼan, tsaʼ c pejca Salmo 94:19, muʼ bʌ i yʌl: ‹Cheʼ woliyon ti tsic pusicʼal chaʼan cabʌl chuqui mic ñaʼtan, maʼ ñuqʼuesʌbeñon c pusicʼal›. Jiñʌch jiñi com bʌ c ñʌchʼtan. Cheʼ jiñi, tsaʼ c sube Jehová jiñi c chʼijiyemlel come tsaʼ c ñopo chaʼan mucʼʌch i ñʌchʼtañon yicʼot miʼ chʼʌmben isujm bajcheʼ mi cubin c bʌ. Jiñi tsiʼ wen aqʼueyon c ñʌchʼtʌlel».

¡Miʼ wen ñuqʼuesan lac pusicʼal cheʼ mi lac ñaʼtan chaʼan Jehová miʼ chʼʌmben isujm chuqui mi lac ñusan yicʼot miʼ yubin bajcheʼ yubil mi la cubin lac bʌ! Pero ¿chucoch an cabʌl wocol? ¿Choncol ba i yʌqʼueñonla lac xotʼ lac mul? ¿Muʼ ba caj i jisan ti jumpʼejl bʌ qʼuin jiñi wocol tac? ili cʼajtiya tac, mi caj la cʌqʼuen i jacʼbal yaʼ ti yan tac bʌ temaj.