Jiñi xpejcaya juñob miʼ cʼajtibeñob i bʌ

¿Majqui woliʼ taj ti tʼan jiñi Salmo 144:12-15, jim ba jiñi i tejclum Dios o jiñi jontoloʼ bʌ chʼoyoloʼ bʌ ti yambʌ tejclum muʼ bʌ i yʌjlel ti versículo 11?

Jiñi tʼan muʼ bʌ i cʼʌjñel ti Hebreo mach junsujmic jach chuqui miʼ yʌqʼueñonla lac ñaʼtan. Jin chaʼan, mi ca laj qʼuel chaʼchajp muʼ bʌ caj i coltañonla lac ñaʼtan i sujmlel:

1. Ñaʼtan muʼ bʌ i bej al majlel jiñi Salmo. Jiñi bendición tac muʼ bʌ i yʌjlel majlel yaʼ ti versículo 12 cʼʌlʌl ti 14 jiñʌch miʼ taj ti tʼan jiñi tojoʼ bʌ, jiñi woli bʌ i cʼajtiñob i cojlel yicʼot i pʌjyelob loqʼuel tiʼ cʼʌb jiñi jontoloʼ bʌ (versículo 11). Iliyi cheʼʌch miʼ yʌqʼueñonla lac ñaʼtan jaʼel jiñi versículo 15, yaʼ baqui chaʼyajl miʼ cʼʌjñel jiñi tʼan «tijicña» chaʼan miʼ yʌjlel jumpʼejl tejclum, yom i yʌl, jiñi wiñicob xʼixicob ‹i chaʼañoʼ bʌ Dios›, Jehová.

2. Jiñi muʼ bʌ i chʼʌmbentel isujm miʼ taj i bʌ yicʼot yambʌ texto tac muʼ bʌ i yʌl jiñi bendición tac chaʼan jiñi xucʼul bʌ i tejclum Dios. Ili salmo miʼ yʌl jiñi pijtaya am bʌ i chaʼan David chaʼan Dios mi caj i yʌqʼuen i tijicñʌyel i tejclum yicʼot cabʌl i chubʌʼañob cheʼ tsaʼix cojliyob loqʼuel tiʼ contrajob (Lv. 26: 9, 10; Dt. 7: 13; Sal. 128: 1-6). Jumpʼejl ejemplo, Deuteronomio 28:4 miʼ yʌl: «Utsʼat mi caj i p’ojlelob a walobilob, yicʼot i wut a pʌcʼʌb, yicʼot i yal pejtelel a wʌlacʼ, wacax yicʼot tiñʌmeʼ». Cheʼ bʌ tsiʼ chaʼle yumʌntel Salomón, jiñi i yalobil David, jiñi tejclum tsiʼ wen taja tijicñʌyel yicʼot cabʌl i chubʌʼañob. Iliyi tsiʼ pʌsʌ chaʼan cheʼʌch miʼ cajel cheʼ miʼ chaʼlen yumʌntel jiñi Mesías (1 R. 4: 20, 21; Sal. 72: 1-20).

Jin chaʼan, muʼ bʌ i chʼʌmbentel isujm yaʼ ti Salmo 144 ñumen tsiquil miʼ pʌs jiñi pijtaya am bʌ i chaʼan jiñi i wiñicob Jehová, chaʼan jiñi jontoloʼ bʌ mi caj i jisʌnt elob yicʼot chaʼan jiñi tojoʼ bʌ mi caj i yajñelob ti ñʌchʼtʌlel i cabʌl wenlel mi caj i tajob (Sal. 37: 10, 11).