Cheʼ bʌ miʼ chʌmel muʼ bʌ lac wen cʼuxbin

MI CHɅMEN juntiquil muʼ bʌ a wen cʼuxbin, tajol chʼijiyem tsaʼ wubi a bʌ, a bajñel jach, maʼañic chuqui mejlet tsaʼ wubi, an a mul tsaʼ ñaʼta, an a bʌqʼuen, tsaʼ michʼayet. Tajol tsaʼto a cʼajtibe a bʌ mi añʌch i sujmlel cheʼ cuxulet.

Miʼ mejlel a ñop chaʼan jiñi uqʼuel tiʼ tojlel juntiquil tsaʼ bʌ chʌmi mach yomic i yʌl chaʼan mach pʼʌtʌletic. Jiñi miʼ pʌs chaʼan tsaʼʌch a wen cʼuxbi. Pero ¿muʼ ba a mejlel a mero taj a tijicñʌyel?

AM BɅ I MELEYOB CHAʼTIQUIL UXTIQUILOB

Anquese maʼ ñaʼtan chaʼan maʼañic chuqui mi caj i jisan a chʼijiyemlel, tajol miʼ mejlel i coltañet tac iliyi.

CHAʼLEN UQʼUEL

Cheʼ bʌ an majqui miʼ chʌmel, jiñi wiñicob xʼixicob (quixtañujob) mach junlajalic bajcheʼ miʼ yubiñob jiñi i cʼuxel o bajcheʼ jalel miʼ lajmel. Pero jiñi uqʼuel miʼ mejlel i coltañet a locʼsan a chʼijiyemlel. Vanessa, tsaʼix bʌ lac taja ti tʼan, miʼ yʌl: «Tsaʼ c wen chaʼle uqʼuel. Yom mic locʼ c chʼijiyemlel». Sofía, mach pijtʌbilic i chaʼan tsaʼ chʌmi xchʼoc bʌ i yijtsʼin, miʼ yʌl: «Cʼux mi cubin cheʼ bʌ mic ñaʼtan jiñi tsaʼ bʌ ujti. Lajal bajcheʼ miʼ pocob lac lojweñal woli (choncol) bʌ i yocʼmʌn (pʌcʼman). Wen cʼuxʌch pero i cʼʌjñibalʌch chaʼan miʼ lajmel».

ALɅ CHUQUI MAʼ ÑAʼTAN YICʼOT CHUQUI MAʼ WUBIN

I tilelʌch cheʼ an i tajol a wom bajñel ajñel, pero jiñi cʼuxel muʼ bʌ a wubin jumpʼejlʌch al bʌ cuchʌl mach bʌ mejlic a bajñel lʌtʼ. Jared, juntiquil xcolel 17 bʌ i jabilel tsaʼ bʌ chʌmi i tat, miʼ cʼajtesan: «Mic ñaʼtan maʼañic i sujmlel chuqui tac tsaʼ cʌlʌ, pero tsaʼʌch i wen coltayon cheʼ tsaʼ c sube yambʌlob muʼ bʌ cubin». Janice, tsaʼ bʌ lac ñaxan alʌ, miʼ yʌl yambʌ wenlel: «Tsaʼʌch i wen ñuqʼuesa c pusicʼal cheʼ bʌ tsaʼ c chaʼle tʼan quicʼot yambʌlob. Mach c bajñelix tsaʼ cubi c bʌ yicʼot tsaʼʌch i chʼʌmbeyoñob i sujm».

CHʼɅMɅ A COLTɅNTEL

Juntiquil xdoctora miʼ yʌl: «Muʼ bʌ i yʌcʼ i bʌ ti coltʌntel tiʼ familia yicʼot tiʼ yamigojob mach ñoj wocolic miʼ yubin cheʼ bʌ maxto jali i chʌmel jiñi muʼ bʌ i cʼuxbin, i miʼ mejlel i lʌtʼ majlel jiñi i wocol». Suben a wamigojob chuqui tac miʼ mejlel i melob chaʼan miʼ coltañetob. Tajol yomʌch i melob pero mach yujilobic bajcheʼ (Proverbios 17:17).

ÑUMEN LɅCʼTESAN A BɅ TI DIOS

Tina miʼ yʌl: «Cheʼ bʌ jiñi c ñoxiʼal ti ora tsaʼ chʌmi tiʼ caj cáncer, tsaʼ c sʌtʌ jiñi muʼ bʌ c laj suben chuqui mi cubin i jiñix tsaʼ caji c suben Dios. Cheʼ bʌ mic tejchel, mij cʼajtiben chaʼan miʼ yʌqʼueñon c pʼʌtʌlel chaʼan miʼ ñumel c chaʼan jiñi qʼuin. Dios cabʌl bajcheʼ tsiʼ coltayon...». Tarsha, 22 bʌ i jabilel cheʼ bʌ tsaʼ chʌmi i ñaʼ, miʼ yʌl: «Tsiʼ wen coltayon i pejcʌntel jiñi Biblia ti jujumpʼejl qʼuin. Tsiʼ coltayon c ñaʼtan chuqui tac wen».

CHEʼ MAʼ ÑAʼTAN JIÑI CHAʼ CHʼOJYEL

Tina miʼ yʌl: «Ti ñaxan, jiñi pijtaya chaʼan mi caj i chaʼ tejchel jiñi chʌmeñoʼ bʌ maʼañic miʼ coltañon. Cʼʌñʌlʌch yaʼan c ñoxiʼal ti jimbʌ ora i jiñi calobilob yomob i tat jaʼel. Pero waʼli, cheʼ ñumeñix chʌmpʼejl jab, tsʌts mic chuc c bʌ ti jiñi c pijtaya. Jiñʌch muʼ bʌ i wen coltañon. Miʼ yʌqʼueñon c tijicñʌyel yicʼot c ñʌchʼtʌlel cheʼ mic ñaʼtan bajcheʼ yilal miʼ cajel cheʼ bʌ mic chaʼ taj lon c bʌ».

Tajol mach ti orajic miʼ ñumel a chʼijiyemlel, pero miʼ mejlel i coltañet muʼ bʌ i yʌl Vanessa. Miʼ yʌl: «Tajol maʼ ñaʼtan chaʼan maʼañic baʼ ora mi caj i ñumel jiñi i cʼuxel, pero xucʼu xucʼul mi caj a taj a tijicñʌyel».

Cʼajtesan: Anquese tajol maʼañic chuqui miʼ mejlel i jisan jiñi a chʼijiyemlel, añʌch i cʼʌjñibal cheʼ bej cuxulet. Yicʼot i coltaya Dios, muqʼuixto i mejlel a taj a tijicñʌyel a wicʼot a wamigojob yicʼot a tajben i sujmlel a cuxtʌlel. Tsʼitaʼ jachix yom chaʼan Dios miʼ chʼojyesan jiñi chʌmeñobix bʌ. Yom chaʼan maʼ chaʼ mecʼ jiñi muʼ bʌ a wen cʼuxbiñob yicʼot chaʼan miʼ jilel jiñi cʼuxel muʼ bʌ a wubin ili ora.