Cheʼ bʌ jiñi a piʼʌl miʼ lotiñet yicʼot yambʌ

María, chʼoyol bʌ ti España, miʼ yʌl: «Cheʼ bʌ jiñi c ñoxiʼal tiʼ subeyon chaʼan mi caj i cʌyon tiʼ caj juntiquil ñumen xchʼocto bʌ, comix chʌmel (sajtel) tsaʼ cubi. Mach cheʼix yom... Cabʌl chuqui tsaʼ c mele (chaʼle) tiʼ tojlel».

Bill, chʼoyol bʌ ti España, miʼ yʌl: «Mach pijtʌbilic c chaʼan cheʼ bʌ jiñi quijñam tsiʼ cʌyʌyon. Ti jimbʌ qʼuin an chuqui tsaʼ chʌmi tic tojlel tsaʼ cubi. Tsaʼ jili pejtelel ñaʼtʌbil bʌ lon c mel yicʼot com bʌ lon c taj. An qʼuiñil mic ñaʼtan chaʼan weñix añon, pero mic chaʼ wen ubin c chʼijiyemlel».

CHEʼ bʌ juntiquil quixtañu miʼ lotin i ñoxiʼal o i yijñam miʼ wen aqʼuen i chʼijiyemlel. I sujm chaʼan añʌch muʼ bʌ i ñusʌbeñob i mul i piʼʌl i miʼ chaʼ tojʼesañob i ñujpuñel.a Pero jiñi mach bʌ añic i mul mucʼʌch caj i chʌn ubin i cʼuxel anquese miʼ jilel jiñi i ñujpuñel o maʼañic. ¿Chuqui miʼ mejlel i coltañet a ñusan i cʼuxel a pusicʼal?

TEXTO TAC MUʼ BɅ I MEJLEL I COLTAÑET

Jiñi maʼañobic bʌ i mul an i tajayob i ñuqʼuesʌntel i pusicʼal ti Biblia anquese cabʌlʌch i cʼuxelob i pusicʼal. Cheʼ bʌ miʼ pejcañob, qʼuelbil i chaʼañob chaʼan Dios miʼ qʼuelbeñob i yaʼlel i wut yicʼot miʼ chʼʌmbeñob i sujm i wocol (Malaquías 2:13-16).

«Cheʼ woliyon ti tsic pusicʼal chaʼan cabʌl chuqui mic ñaʼtan, maʼ ñuqʼuesʌbeñon c pusicʼal» (Salmo 94:19).

Bill miʼ cʼajtesan: «Cheʼ bʌ mic pejcan tac ili versículo, Jehová woli (choncol) i ñuqʼuesan c pusicʼal mi cubin, cheʼ bajcheʼ miʼ mel juntiquil tatʌl yujil bʌ pʼuntaya».

«Maʼ pʌsben i xucʼtilel a pusicʼal jini xucʼul bʌ i pusicʼal» (Salmo 18:25).

Carmen, cabʌl bʌ uw tsaʼ lotinti, miʼ yʌl: «Jiñi c ñoxiʼal maʼañic tsiʼ pʌsʌ i xucʼtʌlel, pero cujil chaʼan Jehová xucʼulʌch yicʼot maʼañic baʼ ora mi caj i cʌyon».

«Mach mi laʼ chaʼlen tsic pusicʼal pero tiʼ pejtelel chuqui tac miʼ yujtel subenla Dios chuqui tac yom ti oración. Chʌn cʼajtibenla. [...] Cheʼ jini, i ñʌchʼtʌlel laʼ pusicʼal chʼoyol bʌ ti Dios mi caj i cʌntan laʼ pusicʼal» (Filipenses 4:6, 7).

Sasha miʼ yʌl: «Mach junsujtelic jach tsaʼ c pejca ili texto. Cheʼ mic ñumen chaʼlen oración, mic ñumen taj i ñʌchʼtʌlel Dios tij cuxtʌlel».

Pejtelel jiñi tsaʼ bʌ lac tajayob ti tʼan tsiʼ ñaʼtayob chaʼan mach lʌjtʼix i chaʼañob, pero tsiʼ ñopoyob ti Jehová i jiñi Biblia tsiʼ pʼʌtʼesayob. Bill tsiʼ yʌlʌ ili tʼan tac: «Jiñi c ñopoñel (chʼujbiya) tsiʼ yʌqʼue i sujmlel j cuxtʌlel cheʼ bʌ maʼañic chuqui mi caj i tojʼan yilal. Anquese tsaʼ jumucʼ ajñiyon ‹ti icʼyochʼan bʌ i yebal jajp wits›, Dios tsaʼ chʌn ajñi yicʼoton» (Salmo 23:4).

a Mi a wom a bej cʌn mi juntiquil quixtañu yom miʼ ñusʌben i mul i piʼʌl chaʼan tiʼ loti yicʼot yambʌ, qʼuele jiñi temaj tac «Cheʼ bʌ jiñi a piʼʌl miʼ lotiñet yicʼot yambʌ» am bʌ yaʼ ti ¡Despertad! 22 i chaʼan abril, 1999 i yopol 3-4, 5-8 yicʼot 9-11.

Am bʌ i meleyob chaʼtiquil uxtiquilob

Miʼ wen ñaʼtañob texto tac muʼ bʌ i coltañob

Bill miʼ yʌl: «Tsaʼ c pejca jiñi libro i chaʼan Job, cheʼ jiñi i chaʼan Salmo, i tsaʼ c sʌpʌ jiñi texto tac woli bʌ i tajon ti tʼan yilal. Tsaʼ j qʼuele chaʼan jiñi muʼ bʌ i tajtʌlob ti tʼan yaʼi tsaʼʌch i yubiyob wocol yicʼot i cʼojol jaʼel».

Miʼ tijicñesañob i bʌ ti música

Carmen miʼ yʌl: «Mic ñʌchʼtan música cheʼ bʌ maʼañic mic mejlel ti wʌyel ti acʼʌlel. Jiñi miʼ wen tijicñesañon». Daniel miʼ yʌl: «Tsaʼ c ñopo c ñijcan jiñi guitarra, i tsaʼ j qʼuele chaʼan jiñi música miʼ yʌqʼueñon c ñʌchʼtʌlel».

Miʼ yʌlob bajcheʼ yubil miʼ yubiñob

Daniel miʼ cʼajtesan: «Mach ñʌmʌloñic j cʌl bajcheʼ yubil mi cubin, pero añobʌch wem bʌ camigojob i ti jujumpʼejl qʼuin mic sʌclañob. Tsaʼ c chaʼle tʼan yicʼotob i tsaʼ c tsʼijbubeyob carta tac jaʼel. Jiñi tsiʼ wen coltayon». Sasha miʼ yʌl: «Tsaʼʌch wen cʼʌjñibʌyi c chaʼan i coltaya c familia. Jiñi c ñaʼ tsiʼ wen coltayon. Tsaʼʌch i ñʌchʼtayon cheʼ bʌ an chuqui com cʌl. Jiñi c tat tsiʼ coltayon chaʼan maʼañic mic chaʼlen bʌqʼuen yicʼot chaʼan cʼunteʼ cʼunteʼ mi cubin c tijicñʌyel».

Miʼ chaʼleñob oración tiʼ pejtelel ora

Carmen miʼ yʌl: «Tiʼ pejtelel ora mic chaʼlen oración. Dios yaʼʌch an yicʼoton tsaʼ cubi, woliʼ ñʌchʼtañon yicʼot i coltañon. Cheʼ bʌ wocol wolic ñusan, tsaʼ c ñumen lʌcʼtesa c bʌ tiʼ tojlel».