Laʼ laj cʼʌn ti subtʼan jiñi jw.org: «Sujten tiʼ yamigo Jehová»
Ti jiñi pájina «Jun tac loqʼuem bʌ ti Biblia» am bʌ ti jw.org/ctu an jumpʼejl sección i chaʼan bʌ jiñi alobob muʼ bʌ i yʌl «Sujten tiʼ yamigo Jehová», yaʼi miʼ tilel video tac. Cheʼ jaʼel, miʼ tilel ti español cʼay tac yicʼot yan tac muʼ bʌ i mejlel lac mel. ¿Añix ba laj cʼʌñʌ ti subtʼan ili sección? Mi woli a cʌntesan tiʼ chaʼan bʌ Biblia juntiquil tatʌl am bʌ i yalobilob, ¿chucoch maʼañic maʼ pʌsbeñob ili sección? Tajol iliyi mi caj i ñijcʌben i pusicʼal chaʼan miʼ qʼuel yan tac bʌ sección am bʌ yaʼ ti lac pájina.
Cheʼ bʌ woli ti pujquel jiñi tratado Noticias del Reino número 38, juntiquil hermano tsiʼ cʌñʌ juntiquil xʼixic, tsiʼ yʌqʼue jiñi tratado i ti jiñi jach bʌ ora tsiʼ pejca. Jiñi xʼixic an cabʌl i yalobil tsaʼ bʌ i mulayob i wen qʼuelob jiñi tratado. Jiñi hermano tiʼ tsʼitaʼ tsictesʌbeyob jiñi temaj yicʼot tsiʼ pʌsbeyob jiñi pájina am bʌ ti Internet muʼ bʌ i chʼʌm tilel tiʼ pat jiñi tratado. Jiñi xʼixic tsiʼ pʌsʌ chaʼan yomʌch i cʌn majlel, jin chaʼan jiñi hermano tsiʼ cʼʌñʌ i celular chaʼan miʼ pʌsben jiñi xʼixic yicʼot i yalobilob jumpʼejl video i chaʼan bʌ Caleb.
Juntiquil hermana tiʼ sube i piʼʌl ti eʼtel am bʌ i yalobilob jiñi lac pájina am bʌ ti Internet yicʼot jiñi cʌntesʌntel tac wen ñuc bʌ i cʼʌjñibal chaʼan bʌ jiñi familia tac muʼ bʌ i chʼʌm tilel yaʼi. Jiñi xʼixic tiʼ sʌcla jiñi pájina yicʼot i yalobilob. Ti wiʼil, jiñi xʼixic tsiʼ yʌlʌ chaʼan i yalobilob miʼ cʼʌyob tiʼ yotot jiñi cʼay muʼ bʌ i yʌl «Predica la palabra» am bʌ ti español, muʼ bʌ lac taj yaʼ ti sección «Sujten tiʼ yamigo Jehová».
¿Chucoch maʼañic mi la cochel ti ili pájina yicʼot mi lac chaʼlen ti descargar ti lac celular jiñi video tac, cʼay tac o yan tac bʌ muʼ bʌ i mejlel lac mel? Mi cheʼʌch maʼ mel bajcheʼ jiñi, woliyʌch a chajpan a bʌ chaʼan maʼ cʼʌn ili sección chaʼan jiñi pájina jw.org/ctu ti a subtʼan. ¡Jiñʌch wen ñuc bʌ la queʼtijib muʼ bʌ i coltañonla chaʼan mi lac melben i yeʼtel lac Yum tiʼ pejtelel laj cuxtʌlel cheʼ bajcheʼ xʼeʼtel i chaʼan! (Hch 20:19).