Dios miʼ cʼuxbiñonla yicʼot miʼ pensaliñonla

1. MIʼ YɅCʼ TI LOQʼUEL JIÑI QʼUIN

Ñaʼtancu bajcheʼ yilal chumulonla cheʼ maʼañic jiñi Qʼuin. Ñuc i cʼʌjñibal cheʼ an jiñi Qʼuin chaʼan jiñi colem teʼ tac miʼ yʌcʼ i yopol, i ñich, i wut yicʼot i bʌcʼ tac. Cheʼ jaʼel, miʼ coltan jiñi colem teʼ tac chaʼan miʼ cʼʌn jiñi i wiʼ chaʼan miʼ tsʼub jiñi jaʼ am bʌ ti lum i miʼ chʼʌm majlel tiʼ yopol i yaʼi miʼ ticwan.

2. MIʼ YɅQʼUEÑONLA JAʼAL

Jiñi jaʼal jumpʼejlʌch majtañʌl tilem bʌ ti Dios. Cheʼ miʼ chaʼlen jaʼal, jiñi lum miʼ yʌcʼ i wut. Dios miʼ yʌqʼueñonla jaʼal, cabʌl lac pʌcʼʌb, i bʌl lac ñʌcʼ yicʼot miʼ wen tijicñesan lac pusicʼal.

3. MIʼ YɅQʼUEÑONLA I BɅL LAC ÑɅCʼ YICʼOT LAC PISLEL

Yonlel tatʌlob miʼ cʼojoʼtañob bajcheʼ miʼ quej i tajbeñob i bʌl i ñʌcʼ jiñi i familia yicʼot i pislelob. Jiñi i Tʼan Dios miʼ yʌl: «Qʼuelela jini teʼlemut. Maʼanic miʼ chaʼlen pacʼ mi cʼajbal. Maʼanic miʼ tempan i bucʼbal tiʼ yotlel. Laʼ Tat ti panchan miʼ yʌqʼuen i bucʼbal teʼlemut. ¿Mach ba ñumenic laʼ cʼʌjñibal bajcheʼ teʼlemut?» (Mateo 6:25, 26).

«Ñaʼtanla bajcheʼ miʼ colel jini sʌsʌc bʌ i nich pimel am bʌ ti jamil [...], mic subeñetla, mach yoque i tʼojolic i pislel [jiñi rey] Salomón tiʼ pejtelel i ñuclel bajcheʼ jini sʌsʌc bʌ i nich pimel. I tʼojol jax miʼ mel pimel Dios [...], ¿mach ba muqʼuic i yʌqʼueñetla chuqui mi laʼ xoj jatetla mach bʌ anic mi laʼ ñop tiʼ pejtelel laʼ pusicʼal?» (Mateo 6:28-30).

Dios miʼ mejlel i yʌqʼueñonla i bʌl lac ñʌcʼ yicʼot lac pislel, cheʼ jaʼel miʼ mejlel i yʌqʼueñonla anto bʌ yom lac chaʼan. Cheʼ mi lac chaʼlen wersa lac mel chuqui yom Dios miʼ coltañonla chaʼan mi lac taj jiñi i bʌl lac ñʌcʼ, o miʼ mejlel i coltañonla lac taj jumpʼejl eʼtel (troñel) chaʼan mi lac mʌn i cʼʌjñibal bʌ lac chaʼan (Mateo 6:32, 33).

Yom mi lac wen cʼuxbin Dios chaʼan tsiʼ yʌqʼueyonla jiñi Qʼuin, jiñi jaʼal, tsiʼ mele (pʌtʌ) jiñi xmateʼmut tac yicʼot jiñi ñichteʼ tac. Yaʼ ti yambʌ artículo mi caj laj qʼuel bajcheʼ jiñi tsaʼ bʌ i meleyonla an i pejca jiñi wiñicob xʼixicob (quixtañujob).