I MELBAL JIÑI XÑOPTʼAN
Laʼ la cʌcʼ laj coltaya tiʼ mandar Jehová
Jehová Dios jiñʌch miʼ yʌcʼ jiñi mandar tac. Jumpʼejl ejemplo, tsiʼ yʌcʼʌ mandar chaʼan cojach juntiquil wiñic yicʼot juntiquil xʼixic miʼ mejlel ti ñujpuñel (Mt. 19:4-6, 9). Miʼ tsʼaʼlen tiʼ pejtelel jiñi tsʼiʼlel (1 Co. 6:9, 10). Cheʼ jaʼel, tsiʼ yʌcʼʌ principio tac chaʼan bajcheʼ yilal yom miʼ xoj i pislel i wiñicob, muʼ bʌ i yʌcʼ ti cʌjñel chaʼan yʌñʌl bajcheʼ yambʌ quixtañujob (Dt. 22:5; 1 Ti. 2:9, 10).
Ili ora, yonlel quixtañujob maʼañic miʼ jacʼbeñob i mandar Jehová (Ro. 1:18-32). Miʼ xojob i pislel, miʼ chʼʌlob i bʌ yicʼot leco jax i melbalob cheʼʌch bajcheʼ miʼ qʼuextʌyel majlel ti’ melol tac jiñi pisil. Miʼ qʼuelob i bʌ ti ñuc chaʼan bibiʼ jax i melbalob i miʼ wajleñob jiñi mach bʌ cheʼic i melbalob bajcheʼ jiñi (1 P. 4:3, 4).
Jiñi i testigojonbʌla Jehová yom mi la cʌcʼ laj coltaya chaʼan jiñi mandar tac tsaʼ bʌ i yʌcʼʌ Jehová (Ro. 12:9). ¿Bajcheʼ miʼ mejlel lac mel? Jiñʌch cheʼ mi lac tsictesan ti wen jiñi muʼ bʌ i mulan Dios cheʼ jaʼel mi lac chumtan bajcheʼ miʼ yʌl i mandar. Jumpʼejl ejemplo, cheʼ bʌ miʼ lac ñaʼtan bajcheʼ yilal bʌ lac pislel mi lac xoj yicʼot chaʼan mi lac chʼʌl lac bʌ, yom mi laj cʼajtiben lac bʌ iliyi: «¿Majqui i mandar woli c jacʼben, i chaʼan ba Jehová o i chaʼan ili pañimil? Cheʼ bajcheʼ yilalon, ¿muʼ ba j cʌjñel chaʼan woli c melben i yeʼtel Dios?». Cheʼ bʌ mi laj qʼuel programa o película tac, yom mi lac ñaʼtan mi weñʌch miʼ qʼuel Jehová jiñi muʼ bʌ i chʼʌm tilel o miʼ mejlel i cʼuñʼesañonla (Sal. 101:3). ¿Bajcheʼ miʼ mejlel i ticʼlan lac familia o yambʌlob jiñi muʼ bʌ laj qʼuel? (1 Co. 10:31-33).
¿Chucoch ñuc i cʼʌjñibal cheʼ mi la cʌcʼ laj coltaya ti jiñi mandar tsaʼ bʌ i yʌcʼʌ Jehová? Come Jesucristo mach jalix mi caj i jisan jiñi tejclum tac yicʼot tiʼ pejtelel jontolil i cojach muʼ bʌ i jacʼbeñob i mandar Dios cuxul mi caj i yajñelob (Ez. 9:4-7; 1 Jn. 2:15-17). Jin chaʼan, laʼ lac chaʼlen wersa lac pʌs wem bʌ lac melbal i jiñi muʼ bʌ i qʼuelob miʼ yʌqʼueñob i ñuclel Dios (1 P. 2:11, 12).
Cheʼ bajcheʼ yilal mic xoj c pislel yicʼot mic chʼʌl bʌ, ¿chuqui miʼ yʌl chaʼan jiñi ñopol bʌ c chaʼan?
CHEʼ BɅ TSAʼIX LAʼ QʼUELE JIÑI VIDEO SUJTEN TIʼ YAMIGO JEHOVÁ: JIÑI WIÑIC YICʼOT XʼIXIC, JACʼɅLA ILIYI:
¿Chucoch yom mi lac jacʼben i mandar Jehová?
¿Chucoch jiñi tatʌlob yom miʼ cʌntesañob i yalobil tiʼ mandar Jehová?
¿Bajcheʼ miʼ mejlel jiñi xcolelob yicʼot jiñi añobix bʌ i jabilel i coltan yambʌlob chaʼan miʼ tajob i yutslel Dios?