¿Bajcheʼ yom mi laj coltan jiñi muʼ bʌ la cʌqʼuen estudio chaʼan miʼ chʼʌmjaʼ? (parte 2)

1. ¿Chucoch cheʼ bʌ mi lac sutqʼuin ti xcʌntʼan yambʌlob miʼ mejlel i coltañob?

CHEʼ bʌ mi lac sutqʼuin ti xcʌntʼan yambʌlob miʼ coltañob i taj i cuxtʌlel. ¿Chucoch? Come ti Mateo 28:19-20 Jesús tsiʼ yʌlʌ: «Cucula», «sutqʼuiñob ti xcʌntʼañob winicob xʼixicob», «aqʼuenla chʼʌmjaʼ». I la cujil chaʼan ñuc i cʼʌjñibal jiñi chʼʌmjaʼ chaʼan jiñi lac piʼʌlob miʼ tajob i coltʌntel. Jiñi yom bʌ i chʼʌmjaʼ yom an i ñopoñel chaʼan cojach mi caj i coltan cheʼ bʌ Jesús tsiʼ yʌcʼʌ i bʌ chaʼañonla yicʼot cheʼ tsaʼ chaʼ tejchi. Jin chaʼan, jiñi apóstol Pedro tiʼ sube jiñi xñoptʼañob: «Mi laj coltʌntel wʌle ti chʼʌm jaʼ» chaʼan ‹tsaʼix tejchi chʼojyel Jesucristo› (1 P. 3:21). Jin chaʼan, cheʼ bʌ an majqui miʼ chʼʌmjaʼ miʼ mejlel i cʼotel i taj jiñi i cuxtʌlel maʼañic bʌ i jilibal.

2. Cheʼ bajcheʼ miʼ yʌl 2 Timoteo 4:1, 2, ¿chuqui yom mi lac mel jiñi xcʌntesajonbʌla?

² Yom wem bʌ xcʌntesajonla chaʼan mi lac sutqʼuin ti xcʌntʼan yambʌlob (pejcan 2 Timoteo 4:1, 2). ¿Chucoch? Come Jesús tiʼ subeyonla: «Cucula», «sutqʼuiñob ti xcʌntʼañob winicob xʼixicob» yicʼot «cʌntesanla». Jiñi apóstol Pablo tiʼ sube Timoteo chaʼan maʼañic miʼ cʌy i mel jiñi eʼtel (troñel) i tiʼ sube: «Come cheʼ jini mi caj a coltan a bʌ yicʼot jini muʼ bʌ i yubiñob a tʼan». Jin chaʼan, maʼañic miʼ toj sajtel lac pusicʼal cheʼ bʌ Pablo tsiʼ yʌqʼue ili ticʼojel: «Chʌn chaʼlen cʌntesa ti toj» (1 Ti. 4: 16). La com chaʼan ñumen wen mi lac chaʼlen cʌntesa come ñuc i cʼʌjñibal chaʼan mi lac sutqʼuin ti xcʌntʼan yambʌlob.

3. ¿Chuqui mi caj laj qʼuel ti ili estudio?

³ Ti jujumpʼejl semana, cabʌl lac piʼʌlob mi laj cʌntesañob chaʼan jiñi Biblia. Pero cheʼ bajcheʼ tsaʼ laj qʼuele yaʼ ti yambʌ estudio, la com laj cʌn bajcheʼ miʼ mejlel lac ñumen coltañob chaʼan miʼ qʼuextañob i melbal (chaʼlibal) yicʼot miʼ chʼʌmob jaʼ. Ti ili estudio, mi caj laj qʼuel joʼchajp yom bʌ mi lac mel jiñi xcʌntesajonbʌla chaʼan mi laj coltan jiñi muʼ bʌ la cʌqʼueñob estudio chaʼan miʼ chʼʌmob jaʼ.

LAʼ LA CɅCʼ CHAʼAN JIÑI BIBLIA MIʼ CHAʼLEN CɅNTESA

4. ¿Chucoch yom mi lac tic lac bʌ jiñi xcʌntesajonbʌla cheʼ bʌ an majqui mi caj la cʌqʼuen estudio? (Qʼuele jaʼel jiñi nota).

⁴ Ti lac pejtelel mi lac mulan laj cʌntesan jiñi wiñicob xʼixicob (quixtañujob) tiʼ chaʼan bʌ Biblia. Jin chaʼan, an qʼuiñil miʼ mejlel lac mulan la cʌlʌx al i chaʼan bʌ Biblia. Juntiquil hermano muʼ bʌ i ñusan jiñi Estudio i chaʼan Lac Tsictesʌbentel, jiñi Cʌntesʌntel chaʼan i tʼan Dios ti congregación o cheʼ bʌ joñonla mi la cʌcʼ estudio, mach yomic mi la cʌlʌx chaʼlen tʼan. Laʼ la cʌcʼ chaʼan jiñi Biblia jiñʌch miʼ cʌntesan jiñi quixtañujob. Jin chaʼan, jiñi xcʌntesajonbʌla yom mi lac ticʼ lac bʌ chaʼan maʼañic mi lac ñop lac luʼ tsictesan jiñi la cujil bʌ chaʼan jumpʼejl temaj o chaʼan jumpʼejl texto (Jn. 16:12).b Ñaʼtancu, ¿bajcheʼ cʼamel a cʌñʌ i chaʼan bʌ Biblia cheʼ bʌ tsaʼ chʼʌmʌ jaʼ yicʼot a cʌñʌyix bʌ ili ora? Tajol ti jimbʌ ora a cʌñʌ jaxto jiñi ñaxan tac bʌ cʌntesʌntel am bʌ ti Biblia (He. 6:1). Mi tsaʼto ñumi cabʌl jab chaʼan maʼ cʌn jiñi a wujilix bʌ ili ora mach a ñop a cʌntesʌben ti ora jiñi a cʌñʌyix bʌ chaʼan jiñi Biblia jiñi muʼ bʌ a wʌqʼuen estudio.

5. a) Cheʼ bajcheʼ miʼ yʌl 1 Tesalonicenses 2:13, ¿chuqui la com chaʼan miʼ chʼʌmben i sujm jiñi muʼ bʌ la cʌqʼuen estudio? b) ¿Chuqui yom mi lac mel chaʼan miʼ tsictesʌbeñonla jiñi woli bʌ i cʌn?

⁵ La com chaʼan jiñi muʼ bʌ la cʌqʼuen estudio miʼ chʼʌmben i sujm chaʼan jiñi woli (choncol) bʌ i cʌn tilemʌch tiʼ Tʼan Dios (pejcan 1 Tesalonicenses 2:13). Jin chaʼan, laʼ lac suben chaʼan miʼ yʌl jiñi woli bʌ i cʌn. Laʼ laj cʼajtiben chaʼan miʼ tsictesʌbeñonla chaʼpʼej uxpʼejl texto, chaʼan mach joñonla tiʼ pejtelel ora mi lac tsictesan. Laʼ laj coltan i qʼuel bajcheʼ miʼ mejlel i cʼʌn tiʼ cuxtʌlel jiñi muʼ bʌ i yʌl jiñi Biblia. Laʼ lac melben cʼajtiya tac muʼ bʌ i coltan chaʼan miʼ yʌl chuqui miʼ ñaʼtan yicʼot chuqui miʼ yʌqʼuen i yubin jiñi texto tac muʼ bʌ i pejcan (Lc. 10:25-28). Jumpʼejl ejemplo, miʼ mejlel laj cʼajtiben: «¿Muʼ baʼ taj a qʼuel jumpʼejl i melbal Jehová ti ili texto?», «¿Bajcheʼ miʼ mejlel i coltañet ili texto?», «¿Chuqui miʼ yʌqʼueñet a wubin jiñi tsaʼ bʌ a pejca?» (Pr. 20:5, TNM). Ñumen ñuc bʌ i cʼʌjñibal jiñʌch cheʼ miʼ cʼotel i cʼuxbin jiñi i sujmlel yicʼot cheʼ miʼ cʼʌn tiʼ cuxtʌlel i mach jiñic cheʼ cabʌl chuqui yom miʼ cʌn.

6. ¿Chucoch yomʌch mi lac pʌyob majlel jiñi hermanojob añobix bʌ i ñaʼtʌbal ti pʌs estudio?

⁶ ¿Muʼ ba lac pʌyob majlel jiñi hermanojob añobix bʌ cabʌl i ñaʼtʌbal cheʼ bʌ mi caj lac pʌs estudio? Mi cheʼʌchi, laʼ laj cʼajtibeñob bajcheʼ yilal tsiʼ qʼuele cheʼ bʌ tsaʼ lac chaʼle pʌs estudio yicʼot mi tsaʼ laj cʼʌcʌ chaʼan jiñi Biblia jiñʌch miʼ chaʼlen cʌntesa. Yom an lac pecʼlel chaʼan mi lac sujtel ti wem bʌ xcʌntesa (laja yicʼot Hechos 18:24-26). Cheʼ jaʼel, miʼ mejlel laj cʼajtiben mi tsiʼ qʼuele chaʼan wolʌch i chʼʌmben i sujm jiñi woli (yʌquel) bʌ i cʌn jiñi muʼ bʌ la cʌqʼuen estudio. Mi tsaʼ loqʼuiyonla majlel jumpʼejl o chaʼpʼejl semana miʼ mejlel lac suben jiñi tsaʼ bʌ lac pʌyʌ majlel chaʼan miʼ majlel i yʌqʼuen estudio. Cheʼ jiñi, mi caj i bej chʼʌm estudio i mi caj i qʼuel chaʼan ñucʌch i cʼʌjñibal. Mach yomic mi lac ñaʼtan chaʼan lac bajñel chaʼan jach jiñi estudio yicʼot chaʼan maʼañic majqui yambʌ miʼ mejlel i yʌqʼuen estudio come la com chuqui wen tiʼ tojlel yicʼot chaʼan miʼ bej cʌn majlel i chaʼan bʌ Biblia.

LAʼ LAC PɅS CHAʼAN MI LAJ CʼUXBIN YICʼOT MI LAC ÑOP JIÑI MUʼ BɅ LA CɅCʼ TI CɅÑOL

7. ¿Chuqui mi caj i coltan jiñi muʼ bʌ la cʌqʼuen estudio chaʼan miʼ cʼotel i mulan jiñi woli bʌ i cʌn majlel?

⁷ Yom miʼ qʼuel jiñi muʼ bʌ la cʌqʼuen estudio chaʼan mi laj cʼuxbin jiñi cʌntesa tac bʌ am bʌ ti Biblia yicʼot chaʼan mi lac ñop chaʼan i sujmlelʌch tac (1 Ts. 1:5, TNM). Cheʼ bajcheʼ jiñi, miʼ mejlel i cʼotel i mulan jiñi woli bʌ i cʌn majlel. Tajol miʼ mejlel lac suben bajcheʼ an i coltayonla jiñi principio tac am bʌ ti Biblia. Jiñʌch muʼ bʌ caj i coltan i qʼuel chaʼan miʼ mejlel i coltan jaʼel.

8. ¿Chuqui miʼ mejlel lac mel chaʼan jiñi quixtañu miʼ ñumen mulan jiñi estudio, i chucoch?

⁸ Cheʼ bʌ woli la cʌqʼuen estudio, laʼ lac suben chaʼan an hermanojob tsaʼ bʌ i ñusayob jiñi wocol tac woli bʌ i ñusan jaʼel. ¿Mejl ba i coltan jiñi i ejemplo juntiquil hermano yaʼ ti congregación? Mi mejlʌch, laʼ lac suben chaʼan miʼ majlel i yʌcʼonla la cʌqʼuen estudio. Cheʼ jaʼel, miʼ mejlel lac suben jiñi ujtem bʌ tiʼ tojlel jiñi hermanojob muʼ bʌ lac taj ti jiñi artículo tac: «Jiñi Biblia tsiʼ qʼuextʌbeyob i pensar» an tac bʌ ti jw.org.c Jiñi artículo yicʼot jiñi video tac mi caj i yʌqʼuen i qʼuel chaʼan mucʼʌch i mejlel i coltan cheʼ miʼ jacʼ jiñi principio tac am bʌ ti Biblia.

9. ¿Chuqui miʼ mejlel lac mel chaʼan jiñi muʼ bʌ la cʌqʼuen estudio miʼ suben i familia yicʼot i yamigojob jiñi woli bʌ i cʌn majlel?

⁹ Mi ñujpuñemix i jiñi i piʼʌl maʼañic miʼ chʼʌm estudio, laʼ lac suben chaʼan miʼ lʌcʼtesan i bʌ chaʼan miʼ ñʌchʼtan jaʼel jiñi estudio. Cheʼ jaʼel, laʼ lac suben jiñi woli bʌ la cʌqʼuen estudio chaʼan laʼ i suben i familia yicʼot i yamigojob jiñi woli bʌ i cʌn majlel (Jn. 1:40-45). Tajol miʼ mejlel lac suben: «¿Bajcheʼ miʼ mejlel a tsictesʌben a familia iliyi?» o «¿Chuqui ti texto miʼ mejlel a cʼʌn chaʼan maʼ tsictesʌben juntiquil a wamigo iliyi?». Cheʼ bajcheʼ iliyi, mi caj lac chajpan chaʼan miʼ sujtel ti xcʌntesa. I cheʼ baqui ora muqʼuix i mejlel ti ochel bajcheʼ xsubtʼan maxto bʌ chʼʌmʌlic i chaʼan jaʼ, muqʼuix caj i mejlel i chaʼlen subtʼan yicʼot jiñi congregación. Miʼ mejlel laj cʼajtiben mi an majqui i cʌñʌ yom bʌ i chʼʌm estudio. Mi tiʼ subeyonla chaʼan añʌch, mach la cʌcʼ ti ñumel chaʼpʼej uxpʼejl qʼuin chaʼan mi lac pejcan i laʼ laj cʼajtiben mi yom i chʼʌm estudio. Laʼ lac pʌsben jiñi video ¿Chuqui jiñi estudio loqʼuem bʌ ti Biblia?d

LAʼ LAC SUBEN I TAJ I YAMIGOJOB YAʼ TI CONGREGACIÓN

10. Cheʼ bajcheʼ miʼ yʌl 1 Tesalonicenses 2:7, 8, ¿chuqui miʼ mejlel lac mel chaʼan mi lac lajin jiñi wem bʌ i melbal Pablo?

¹⁰ Jiñi xcʌntesajonbʌla yom mi lac pʌs chaʼan lac wentajobʌch tiʼ sujm jiñi muʼ bʌ la cʌqʼueñob estudio. Jiñi muʼ bʌ la cʌqʼueñob estudio miʼ mejlel i sujtelob ti hermanojob yaʼ ti congregación (pejcan 1 Tesalonicenses 2:7, 8). Wocolʌch miʼ yubiñob chaʼan miʼ cʌyob jiñi mach bʌ weñic i yamigojob yicʼot chaʼan miʼ qʼuextañob i melbal chaʼan miʼ melbeñob i yeʼtel Jehová. Jin chaʼan, laʼ laj coltañob i taj i yamigojob yaʼ ti congregación. Mi mucʼʌch lac tem ajñel yicʼotob ti baqui tac jach bʌ qʼuin i mach cojic jach cheʼ bʌ mi la cʌqʼueñob estudio, mi caj lac pʌsbeñob chaʼan i yamigojoñʌchla. Mi caj lac pʌs chaʼan lac wentajobʌch jiñi muʼ bʌ la cʌqʼueñob estudio cheʼ bʌ mi lac pejcañob tiʼ celular, mi lac chocbeñob majlel mensaje tac o mi lac ñumel lac julaʼtañob.

11. ¿Chuqui la com chaʼan miʼ tajob yaʼ ti congregación jiñi muʼ bʌ la cʌqʼueñob estudio, i chucoch?

¹¹ An jumpʼejl tʼan cʌmbil bʌ yaʼ ti África muʼ bʌ i yʌl: «Chaʼan miʼ cosʌntel juntiquil alʌl ñuc i cʼʌjñibal jumpʼejl tejclum». Cheʼ jaʼel miʼ mejlel la cʌl: «Chaʼan mi lac sutqʼuin ti xcʌntʼan juntiquil quixtañu ñuc i cʼʌjñibal jumpʼejl congregación». Jin chaʼan, jiñi wem bʌ xcʌntesajonbʌla mi la cʌqʼueñob i cʌn jiñi muʼ bʌ la cʌqʼueñob estudio jiñi hermanojob añoʼ bʌ ti congregación mejl bʌ i coltañob. Cheʼ bajcheʼ iliyi, jiñi hermanojob miʼ mejlel i coltañob chaʼan miʼ sujtelob tiʼ wem bʌ i yamigojob Jehová yicʼot miʼ mejlel i ñuqʼuesʌbeñob i pusicʼal cheʼ baʼ ora miʼ ñusañob wocol. La com la cʌqʼueñob i yubin jiñi muʼ bʌ la cʌqʼueñob estudio chaʼan añobʌch i cʼʌjñibal yaʼ ti congregación yicʼot chaʼan mi laj qʼuelob bajcheʼ lac familia tiʼ chaʼan bʌ Dios. Mi mucʼʌch laj coltañob chaʼan miʼ cʼotel i mulañob jiñi i yorganización Jehová, mach wocolic mi caj i yubiñob chaʼan miʼ cʌyob jiñi mach bʌ weñic i yamigojob (Pr. 13:20). Mi jiñi i yamigojob miʼ cʌyob i pejcañob, yujilob chaʼan miʼ mejlel i tajob i sujm bʌ i yamigojob yaʼ ti congregación (Mr. 10:29, 30; 1 P. 4:4).

LAʼ LAC SUBEN I YɅQʼUEN I CUXTɅLEL DIOS YICʼOT MIʼ CHʼɅMJAʼ

12. ¿Chucoch yom mi lac suben jiñi muʼ bʌ la cʌqʼueñob estudio chaʼan ñuc i cʼʌjñibal cheʼ bʌ miʼ yʌqʼueñob i cuxtʌlel Dios yicʼot miʼ chʼʌmob jaʼ?

¹² Mach lac bʌcʼñan lac suben jiñi muʼ bʌ la cʌqʼuen estudio chaʼan ñucʌch i cʼʌjñibal cheʼ bʌ miʼ yʌqʼuen i cuxtʌlel Dios yicʼot miʼ chʼʌmeʼ jaʼ. Come la com bʌ jiñʌch chaʼan mi laj coltan jiñi quixtañujob chaʼan miʼ chʼʌmob jaʼ yicʼot miʼ melbeñob i yeʼtel Jehová. Mi jiñi quixtañu cabʌlix uw maʼañic miʼ cʌy i chʼʌm estudio i añix i teche majlel ti tempa bʌ tac, yom miʼ chʼʌmben i sujm chaʼan woli la cʌqʼuen estudio come la com laj coltan chaʼan miʼ sujtel tiʼ testigo Jehová.

13. ¿Chuqui tac miʼ mel jiñi muʼ bʌ la cʌqʼuen estudio chaʼan miʼ cʼotel i chʼʌmjaʼ?

¹³ Jiñi quixtañu uts bʌ i pusicʼal cabʌl chuqui miʼ mel chaʼan miʼ cʼotel i chʼʌmjaʼ. Ñaxan, miʼ cʼotel i cʌn Jehová, miʼ tech i cʼuxbin yicʼot miʼ ñop (Jn. 3:16; 17:3). Cheʼ jiñi, miʼ sujtel tiʼ yamigo Jehová yicʼot miʼ sujtesan tiʼ yamigojob jiñi hermanojob (He. 10:24, 25; Stg. 4:8). Ti wiʼil, miʼ cʌy i mel mach tac bʌ weñic bʌ weñic i miʼ cʌy i mul (Hch. 3:19). I jiñi i ñopoñel ti Dios miʼ ñijcʌben i pusicʼal chaʼan miʼ suben i sujmlel jiñi yambʌlob (2 Co. 4:13). Ti wiʼil, miʼ yʌqʼuen i cuxtʌlel Dios yicʼot miʼ chʼʌmjaʼ (1 P. 3:21; 4:2). Cheʼ miʼ cʼotel i mel jiñi, wen tijicñayonla ti jimbʌ qʼuin. Mi jiñi muʼ bʌ la cʌqʼuen estudio xucʼu xucʼul miʼ qʼuextan majlel i cuxtʌlel, laʼ lac suben chaʼan weñʌch bajcheʼ woliʼ mel yicʼot chaʼan laʼ i chʌn chaʼlen wersa.

LAʼ LAC CHɅCɅ QʼUEL MAJLEL CHUQUI TAC WOLIʼ QʼUEXTAN TIʼ CUXTɅLEL

14. ¿Bajcheʼ miʼ mejlel laj qʼuel jiñi xcʌntesajonbʌla mi yomʌch i melben i yeʼtel Jehová jiñi muʼ bʌ la cʌqʼuen estudio?

¹⁴ Yom la cujil pijt chaʼan mi laj coltan jiñi muʼ bʌ la cʌqʼuen estudio chaʼan miʼ yʌqʼuen i cuxtʌlel ti Dios yicʼot miʼ chʼʌmjaʼ. Pero tal i yorajlel chaʼan yomʌch mi laj qʼuel mi yomʌch i melben i yeʼtel Jehová o maʼañic. ¿Muʼ ba i chaʼlen wersa chaʼan miʼ jacʼben i mandar tac Jesús? ¿O mucʼ jach ba i chʼʌm estudio come miʼ mulan i cʌn chuqui miʼ yʌl jiñi Biblia?

15. ¿Chuqui tac miʼ pʌs chaʼan juntiquil muʼ bʌ la cʌqʼuen estudio wolʌch i qʼuextan majlel i cuxtʌlel?

¹⁵ Laʼ lac chʌcʌ qʼuel majlel chuqui tac woliʼ qʼuextan tiʼ cuxtʌlel jiñi woli bʌ la cʌqʼuen estudio. Jumpʼejl ejemplo, ¿muʼ ba i yʌl chuqui miʼ yubin tiʼ tojlel Jehová? ¿Muʼ ba i mel oración? (Sal. 116:1, 2). ¿Muʼ ba i mulan i pejcan jiñi Biblia? (Sal. 119:97). ¿Muʼ ba i wen ajñel ti tempa bʌ? (Sal. 22:22). ¿Añix ba chuqui an i qʼuexta tiʼ cuxtʌlel chaʼan miʼ pʌs chaʼan wolʌch i mel jiñi woli bʌ i cʌn majlel? (Sal. 119:112). ¿Tsaʼix ba i teche i suben jiñi i familia yicʼot jiñi i yamigojob chuqui woliʼ cʌn majlel? (Sal. 9:1). I ñumen ñuc bʌ i cʼʌjñibal, ¿yomʌch ba sujtel tiʼ testigo Jehová? (Sal. 40:8). Mi maʼañic woliʼ mel ili tac, laʼ lac chaʼlen wersa laj qʼuel chucoch maʼañic woliʼ mel majlel, i cheʼ jiñi laʼ lac pejcan ti uts pero ti toj bʌ tʼan.e

16. ¿Jalaqui yomix mi laj cʌy la cʌqʼuen estudio juntiquil quixtañu?

¹⁶ Cheʼ jaʼel, laʼ lac chʌcʌ qʼuel majlel mi yomʌch mi lac bej aqʼuen estudio juntiquil quixtañu. Laʼ laj cʼajtiben lac bʌ: «¿Muʼ ba i chajpan i bʌ cheʼ bʌ mi caj laj cʼotel la cʌqʼuen estudio? ¿Yomʌch ba cʼotel yaʼ ti tempa bʌ tac? ¿Tsaʼix ba i cʌyʌ i mel mach tac bʌ weñic? ¿Tsaʼix ba i cʌyʌ majlel ti jiñi i ñopbal mach bʌ i sujmic?». Mi maʼañic woliʼ mel majlel ili tac, i mi lac bej aqʼuen estudio lajal bajcheʼ woli lac chaʼlen wersa laj cʌntesan juntiquil quixtañu chaʼan miʼ cʌn ñuxijel, pero mach yomic ochel ti jaʼ. Mi jiñi muʼ bʌ la cʌqʼuen estudio maʼañic miʼ qʼuel ti ñuc jiñi woli bʌ i cʌn majlel yicʼot mach yomic i qʼuextan i melbal, ¿anto ba i cʼʌjñibal mi lac bej aqʼuen estudio?

17. Cheʼ bajcheʼ miʼ yʌl 1 Timoteo 4:16, ¿chuqui yom mi lac mel jiñi xcʌntesajonbʌla chaʼan mi lac chʌcʌ qʼuel bajcheʼ woliyonla ti cʌntesa?

¹⁷ Wen ñuc i cʼʌjñibal mi laj qʼuel cheʼ mi lac sutqʼuesan ti xcʌntʼan yambʌlob. Jin chaʼan, mi la com laj coltan jiñi muʼ bʌ la cʌqʼueñob estudio chaʼan miʼ cʼotel i chʼʌmob jaʼ, ¿chuqui mi caj lac mel? Mi caj la cʌcʼ chaʼan jiñi Biblia jiñʌch miʼ chaʼlen cʌntesa yicʼot mi caj lac pʌs chaʼan mucʼʌch laj cʼuxbin jiñi cʌntesa tac am bʌ ti Biblia yicʼot chaʼan mi lac ñop chaʼan i sujmlelʌch tac. Mi caj lac ñuqʼuesʌbeñob i pusicʼal jiñi muʼ bʌ la cʌqʼueñob estudio chaʼan miʼ sʌclañob i yamigojob yaʼ ti congregación. Mi caj lac subeñob chaʼan ñuc i cʼʌjñibal cheʼ bʌ miʼ yʌqʼueñob i cuxtʌlel Dios yicʼot miʼ chʼʌmob jaʼ. I mi caj lac chʌcʌ qʼuel mi wolʌch i qʼuextan majlel i melbal. (Qʼuele jiñi recuadro «¿Chuqui yom mi lac mel jiñi xcʌntesajonbʌla?»). ¡Wen tijicña mi la cubin lac bʌ cheʼ bʌ mi lac mel ili eʼtel muʼ bʌ mejlel i coltan jiñi quixtañujob! Jin chaʼan, laʼ lac chaʼlen wersa chaʼan mi laj coltan jiñi muʼ bʌ la cʌqʼueñob estudio chaʼan miʼ cʼotel i chʼʌmob jaʼ.