¿Jala miʼ caj i tilel i jilibal pañimil? Tsaʼ bʌ i yʌlʌ Jesús

ÑATANCU ILI CHAʼCHAJP TSAʼ BɅ I YɅLɅ JESÚS:

«Yom chʌn yʌxʌl laʼ wo come mach laʼ wujilic chuqui ti qʼuin yicʼot bajcheʼ ora mi caj i tilel jiñi i Yalobil wiñic» (MATEO 25:13).

«Yom chʌn yʌxʌl laʼ wo, yom chʌn cañal laʼ wut come mach laʼ wujilic jala mi caj i yujtel tac iliyi» (MARCOS 13:33).

Jin chaʼan maʼañic mi juntiquil quixtañu yujil bʌ jala miʼ caj i jilel ili jontol bʌ pañimil. Pero Dios yujilix «chuqui ti qʼuin yicʼot bajcheʼ hora» mi caj i jilel (Mateo 24:36). ¿Yom ba i yʌl iliyi chaʼan machʌch mejlic lac ñaʼtan jala mi caj i tilel i jilibal? Mach cheʼiqui. Jesús tiʼ sube jiñi xcʌntʼañob i chaʼan chaʼan miʼ qʼuelob chuqui muʼ bʌ i yʌcʼ ti cʌñol chaʼan lʌcʼʌlix i jilibal.

JIÑI SEÑAL

Ili miʼ yʌcʼ ti cʌñol chaʼan «lʌcʼʌlix i yorajlel i jilibal pañimil». Jesús tsiʼ yʌlʌ: «Come mi caj i contrajin i bʌ jumpʼejl tejclum yicʼot yambʌ, jumpʼejl yumʌntel yicʼot yambʌ, miʼ cajel wiʼñal yicʼot yujquel lum ti cabʌl tejclum» (Mateo 24:3, 7). Cheʼ jaʼel tsiʼ yʌlʌ chaʼan miʼ cajel «baqui jach bʌ cʼamʌjel» (Lucas 21:11). ¿Muʼ baʼ qʼuel bajcheʼ woliʼ tsʼʌctiyel ili profecía tsaʼ bʌ i yʌlʌ Jesús?

Ili ora yonlel lac piʼʌlob miʼ wen ilañob wocol tiʼ caj jiñi guerra, wiʼñal, yujquel lum yicʼot cʼamʌjel tac muʼ bʌ i wen ticʼlañonla. Jumpʼejl ejemplo, ti 2004 jumpʼejl tsʌts bʌ yujquel lum yaʼ ti océano Índico tsiʼ teche jumpʼejl tsʌts bʌ tsunami tsaʼ bʌ i tsʌnsa 225 mil lac piʼʌlob. Ti uxpʼejl jab, jiñi COVID-19 tiʼ tsʌnsa cheʼ bʌ 6.9 millón lac piʼʌlob tiʼ pejtelel Pañimil. Jesús tsiʼ yʌlʌ chaʼan ili woli (choncol) bʌ i yujtel tac miʼ pʌs chaʼan lʌcʼʌlix i jilibal pañimil.

«COJIX BɅ QʼUIN»

Jiñi Biblia miʼ yʌl chaʼan cheʼ lʌcʼʌlix i jilibal ili pañimil mi caj i cʼotel i yorajlel cʌmbil bajcheʼ «cojix bʌ qʼuin» (2 Pedro 3:3, 4). Cheʼ bajcheʼ miʼ yʌl 2 Timoteo 3:1-5, ti jiñi cojix bʌ qʼuin tac, jiñi wen tac bʌ melbalʌl mi caj i jilel (qʼuele jiñi recuadro «Cheʼ yoque lʌcʼʌlix i jilibal jiñi pañimil»). ¿Muʼ baʼ qʼuel ili ora chaʼan cabʌlob muʼ bʌ i bajñel qʼuelob i bʌ ti ñuc, jontolob (mañajob), miʼ cʼuxbiñob taqʼuin yicʼot miʼ ticʼlan yambʌlob? Ili jiñʌch yambʌ muʼ bʌ i pʌsbeñonla chaʼan lʌcʼʌlix añonla tiʼ jilibal ili pañimil.

¿Bajcheʼ cʼamel mi caj i jalʼan jiñi cojix bʌ qʼuin? Jiñi Biblia miʼ yʌl chaʼan tsʼitaʼ jach. Cheʼ jiñi, Dios mi caj i «jisañob jiñi woli bʌ i jisañob pañimil» (Apocalipsis 11:15-18; 12:12).

TSʼITAʼ JAX YOM CHAʼAN JIÑI PAÑIMIL MIʼ SUJTEL TI JUMPʼEJL PARAÍSO

Dios añix i yorajlel i chaʼan chaʼan miʼ jisan ili jontol bʌ pañimil (Mateo 24:36). Pero Dios «mach yomic chaʼan mi juntiquilic miʼ jisʌntel» (2 Pedro 3:9). Jin chaʼan, muʼto i yʌqʼueñonla i yorajlel ti lac pejtelel chaʼan mi laj cʌn yicʼot mi lac jacʼben i tʼan. ¿Chucoch? Come yom chaʼan cuxulonla yicʼot chaʼan mi lac chumtʌl ti jiñi tsijiʼ bʌ pañimil muʼ bʌ i cajel cheʼ bʌ jumpʼejlix paraíso.

Jesús tsiʼ yʌlʌ chaʼan jiñi wen tʼan chaʼan i Yumʌntel Dios mi caj i sujbel «tiʼ pejtelel pañimil» (Mateo 24:14). Jin chaʼan, ili cʌntesa tac am bʌ i chajpa Dios i cʼʌjñibalʌch chaʼan miʼ mejlel laj cʌn chuqui yom mi lac mel (chaʼlen) chaʼan mi lac mejlel ti chumtʌl ti jiñi tsijiʼ bʌ pañimil. Jiñi i testigojob Jehová tiʼ pejtelel Pañimil cʌbʌl hora miʼ chaʼleñob subtʼan yicʼot miʼ yʌcʼob ti cʌñol jiñi pijtaya muʼ bʌ i yʌl jiñi Biblia. Jesús tsiʼ yʌlʌ chaʼan ili subtʼan mi caj i mejlel tiʼ pejtelel pañimil cheʼ lʌcʼʌlix tal i jilibal.

Jiñi yumʌlob wʌʼ ti pañimil mach jalix yom chaʼan miʼ jisʌntelob. Pero muʼ bʌ i yʌqʼueñonla lac tijicñʌyel jiñʌch cheʼ mi lac mejlel ti chumtʌl ti jiñi Paraíso chajpʌbil bʌ i chaʼan Dios chaʼan miʼ yʌqʼueñonla. Ti jiñi yambʌ artículo mi caj i yʌl chuqui yom mi lac mel chaʼan mi lac chumtʌl ti jiñi tsijiʼ bʌ pañimil.