Ti lac pejtelel la com chaʼan wen mi la cajñel ti talto bʌ qʼuin

Pero cabʌl muʼ bʌ i ñaʼtañob chaʼan wocol ti tajtʌl jiñi. An i qʼueleyob chaʼan ti ora miʼ mejlel ti qʼuextʌyel chuqui an. Tiʼ caj jiñi wocol tac bajcheʼ jiñi pandemia chaʼan COVID-19 cabʌl lac piʼʌlob ñumen wocol bajcheʼ chumulob, an pʼumpʼuñiyel i cabʌlob chʌmeñoʼ bʌ (sajtemoʼ bʌ). Jin chaʼan, cabʌl muʼ bʌ i ñaʼtañob chaʼan maʼañic baʼ ora tijicña mi caj lac chumtʌl.

Tiʼ caj pejtelel iliyi, jiñi lac piʼʌlob joybajcʼ miʼ sʌclañob chuqui miʼ mejlel i coltañob. An muʼ bʌ i ñopob ti jiñi destino o ti jiñi suerte. Cabʌlob muʼ bʌ i ñaʼtañob chaʼan jiñi escuela yicʼot jiñi taqʼuin mi caj i yʌqʼueñob chuqui yomob. I yambʌlob miʼ ñaʼtañob chaʼan jasʌl cheʼ mach jontolobic (mañajobic) chaʼan tijicña miʼ yajñelob.

Pero, pejtelel iliyi, ¿mucʼʌch ba i mejlel i yʌqʼueñet jiñi a wom bʌ ti talto bʌ qʼuin? Chaʼan maʼ cʌn, ñaʼtancu iliyi:

• ¿Am ba baqui cʌyʌl chuqui mi caj i yujtel ti a tojlel?

• ¿Muʼ ba i mejlel i yʌqʼueñet wem bʌ a cuxtʌlel jiñi escuela yicʼot jiñi taqʼuin?

• ¿Jasʌl ba cheʼ mach jontoletic chaʼan wen maʼ wajñel ti talto bʌ qʼuin?

• ¿Am ba baqui miʼ mejlel a taj a coltʌntel chaʼan wen maʼ wajñel ti talto bʌ qʼuin?

Ili revista mi caj i coltañet a tajben i jacʼbal.