Miʼ mejlel a yajcan bajcheʼ a wom ajñel ti talto bʌ qʼuin

Añix cheʼ bʌ 3 mil 500 jab, Jehová tiʼ sube jiñi muʼ bʌ i chʼujutesañob chuqui yom miʼ melob (chaʼleñob) chaʼan wen miʼ yajñelob ti talto bʌ qʼuin: «Tsaʼix c pʌsbeyetla i bijlel laʼ cuxtʌlel baʼan bendición, yicʼot i bijlel chʌmel baʼan wocol. Jini chaʼan yajcan a cuxtʌlel chaʼan chʌn cuxulet, yicʼot a walobilob» (Deuteronomio 30:19).

Mi yomob chaʼan wen miʼ yajñelob ti talto bʌ qʼuin, yom miʼ yajcañob i mel chuqui wem bʌ. I joñonla añʌch chuqui yom mi lac yajcan jaʼel. Jiñi Biblia miʼ subeñonla bajcheʼ yom mi lac yajcan chaʼan wen mi la cajñel: «Cʼuxbin lac Yum Dios. Chʌn nichʼtʌben i tʼan» (Deuteronomio 30:20).

¿BAJCHEʼ MIʼ MEJLEL A CʼUXBIN JEHOVÁ YICʼOT A ÑɅCHʼTɅBEN I TʼAN?

CɅÑɅ MUʼ BɅ I YɅL JIÑI BIBLIA. Chaʼan miʼ mejlel a cʼuxbin Jehová, yom maʼ ñaxan cʌn chuqui miʼ yʌl jiñi Biblia tiʼ tojlel. Cheʼ bʌ maʼ mel iliyi, mi caj a qʼuel chaʼan wen an i cʼuxbiya yicʼot chaʼan yom chaʼan maʼ taj a wenlel. Yom jaʼel chaʼan maʼ melben oración come Dios mucʼʌch i ñaʼtañet (1 Pedro 5:7). Mi mucʼʌch a chaʼlen wersa chaʼan maʼ cʌn, jiñi Biblia miʼ yʌl chaʼan mi caj i lʌcʼtesan i bʌ ti a tojlel (Santiago 4:8).

JACʼɅ CHUQUI MAʼ CɅN. Chaʼan maʼ ñʌchʼtʌben i tʼan Dios yom maʼ jacʼ jiñi i ticʼojel tac muʼ bʌ a taj yaʼ ti Biblia. Cheʼ bʌ maʼ mel, mi caj i yujtel muʼ bʌ i yʌl Josué 1:8: «Mi caj a chaʼlen xʌmbal ti utsʼat. Pejtelel muʼ bʌ a mel mi caj i loqʼuel ti utsʼat».