¿Muʼ ba a wʌcʼ wem bʌ ejemplo ti bajcheʼ maʼ chaʼlen tʼan?

1. ¿Majqui tsiʼ yʌcʼʌ chaʼan mi lac mejlel ti tʼan?

JEHOVÁ miʼ cʼuxbiñonla, jin chaʼan tsiʼ yʌcʼʌ chaʼan mi lac mejlel ti tʼan. Jin chaʼan, cheʼ bʌ tsaʼ mejli jiñi ñaxam bʌ wiñic, Adán, tsaʼ mejli i pejcan jiñi i Tat am bʌ ti panchan. Cheʼ jaʼel, tsiʼ bajñel ñaʼta tsijib tʼan tac. Jiñi tsiʼ colta chaʼan miʼ mel (chaʼlen) jiñi eʼtel (troñel) tsaʼ bʌ aqʼuenti, cheʼ miʼ yotsʌben i cʼabaʼ jiñi añimal tac (Gn. 2:19). I wen tijicña tsiʼ yubi cheʼ bʌ cojaxto tsiʼ pejca Eva: Jiñi utsʼatax bʌ i yijñam (Gn. 2:22, 23).

2. ¿Chucoch mi la cʌl chaʼan mach weñic bajcheʼ tsiʼ cʼʌñʌyob i yej ti wajali yicʼot bajcheʼ woliʼ cʼʌñob ti ili ora?

² Pero mach jalic tsaʼ ñumi, i mach weñic bajcheʼ tsaʼ caji ti cʼʌjñel jiñi majtañʌl. Satanás tsiʼ loti Eva, i tiʼ caj jiñi xmulilonla (Gn. 3:1-4). Adán mach weñic bajcheʼ tsiʼ cʼʌñʌ i yej cheʼ bʌ tsiʼ yʌqʼue tiʼ mul Eva yicʼot Jehová jiñi i sajtemal tac (Gn. 3:12). Caín tsiʼ loti Jehová cheʼ bʌ tiʼ tsʌnsa Abel, jiñi i yijtsʼin (Gn. 4:9). Ti wiʼil, juntiquil i pʼolbal Caín i cʼabaʼ Lamec tsiʼ mele jumpʼejl poema muʼ bʌ i pʌs bajcheʼ yilal jiñi jontolil ti jimbʌ ora (Gn. 4:23, 24). ¿I chuqui mi laj qʼuel ili ora? Jiñi políticojob maʼañobix i quisin miʼ chaʼleñob tsucu tʼan baqui an yambʌ lac piʼʌlob. I wocol mi la cubin chaʼan mi lac taj jumpʼejl película baqui maʼañic miʼ chaʼleñob tsucu tʼan. Ili jiñʌch muʼ bʌ i cʼʌjñel yaʼ ti escuela tac yicʼot ti la queʼtel. Pejtelel ili miʼ pʌs chaʼan ñoj asiyemix ili pañimil.

3. ¿Chuqui miʼ mejlel ti ujtel mi maʼañic mi laj cʌntan lac bʌ, i chuqui mi caj laj qʼuel ti ili estudio?

³ Mi maʼañic mi laj cʌntan lac bʌ, mi lac mejlel ti ñʌmʼan la cubin tsucu tʼan tac i muʼto i mejlel lac tech la cʌl jaʼel. Jiñi xñoptʼañonbʌla la com lac tijicñesan Jehová, jin chaʼan mach cojach maʼañic mi la cʌl tsucu tʼan, mi lac chaʼlen wersa chaʼan wen mi laj cʼʌn jiñi la quej: Chaʼan mi la cʌqʼuen i ñuclel Jehová. Ti ili estudio, mi caj laj qʼuel bajcheʼ miʼ mejlel lac mel cheʼ bʌ mi lac chaʼlen subtʼan, cheʼ bʌ mi la cajñel ti tempa bʌ yicʼot cheʼ bʌ mi lac chaʼlen tʼan la quicʼot yambʌlob. Pero laʼ lac ñaxan qʼuel chucoch Jehová miʼ qʼuel ti ñuc chuqui mi la cʌl.

JEHOVÁ MIʼ QʼUEL TI ÑUC CHUQUI MI LA CɅL

4. Cheʼ bajcheʼ miʼ yʌl Malaquías 3:16, ¿chucoch Jehová miʼ qʼuel ti ñuc chuqui mi la cʌl?

⁴ (Pejcan Malaquías 3:16). ¿Chucoch Jehová miʼ tsʼijbun ti jumpʼejl libro i cʼabaʼ jiñi muʼ bʌ i pʌsob ti bajcheʼ miʼ chaʼleñob tʼan chaʼan mucʼʌch i bʌcʼñañob yicʼot miʼ wen ñaʼtʌbeñob jiñi i cʼabaʼ? Jiñi muʼ bʌ la cʌl miʼ pʌs chuqui an ti lac pusicʼal. Jesús tsiʼ yʌlʌ: «Ti la quej miʼ loqʼuel chuqui tac an ti lac pusicʼal» (Mat. 12:34). Jin chaʼan, jiñi lac tʼan miʼ pʌs bajcheʼ cʼamel mi laj cʼuxbin Jehová. I Jehová yom chaʼan jiñi muʼ bʌ i cʼuxbiñob miʼ chumtʌlob tiʼ pejtelel ora ti jiñi tsijiʼ bʌ Pañimil.

5. a) ¿Bajcheʼ miʼ taj i bʌ jiñi muʼ bʌ la cʌl yicʼot jiñi lac chʼujutesaya ti Jehová? b) Cheʼ bajcheʼ mi laj qʼuel ti jiñi foto tac, ¿chuqui jiñi mach bʌ yomic mi lac mel chaʼan Jehová tijicña chaʼan bajcheʼ mi lac chaʼlen tʼan?

⁵ Jehová miʼ chʼʌm ti ñuc chuqui mi la cʌl chaʼan miʼ ñaʼtan mi mucʼʌch caj i chʼʌm jiñi lac chʼujutesaya o maʼañic (Sant. 1:26). Cabʌl lac piʼʌlob maʼañic bʌ miʼ chʼujutesañob Jehová, jontolob (mañajob) cheʼ bʌ miʼ chaʼleñob tʼan, michʼob jax yicʼot chanchan jax miʼ melob i bʌ (2 Tim. 3:1-5). Mach la comic sujtel bajcheʼob. La com chaʼan Jehová tijicña chaʼan bajcheʼ mi lac chaʼlen tʼan. Pero ¿tijicña ba mi caj i yubin tiʼ tojlel juntiquil uts bʌ miʼ mel i bʌ ti tempa bʌ yicʼot ti subtʼan pero cheʼ bʌ i bajñelix jontol bajcheʼ miʼ pejcan i familia i mach yicʼotic cʼuxbiya? (1 Ped. 3:7).

6. ¿Chuqui tsaʼ ujti chaʼan bajcheʼ miʼ chaʼlen tʼan Kimberly?

⁶ Mi weñʌch bajcheʼ mi lac chaʼlen tʼan, tsiquil mi caj i cʌytʌl majqui «jini muʼ bʌ i melben i yeʼtel Dios o [...] jini mach bʌ anic miʼ mel» (Mal. 3:18). Ili yom i yʌl chaʼan tsiquil chaʼan mi lac melben i yeʼtel Jehová. Laʼ laj qʼuel tsaʼ bʌ ujti tiʼ tojlel juntiquil hermana i cʼabaʼ Kimberly.b Ti jumpʼejl bʌ qʼuin tsiʼ taja i mel i tarea yicʼot juntiquil i piʼʌl ti clase, jiñi i piʼʌl ti clase tsiʼ qʼuele chaʼan Kimberly mach lajalic bajcheʼ jiñi yañoʼ bʌ. Maʼañic miʼ yʌl yambʌlob, wen uts tiʼ pejtelel ora i maʼañic miʼ chaʼlen tsucu tʼan. Jiñi i piʼʌl ti clase tsiʼ mulaj i ñaʼtan chucoch cheʼ yilal bajcheʼ jiñi, i ti wiʼil tsaʼ caji ti estudio. ¡Jehová wen tijicña miʼ yubin i bʌ cheʼ jiñi yambʌlob miʼ mulañob i cʌn jiñi i sujmlel chaʼan bajcheʼ mi lac chaʼlen tʼan!

7. ¿Chuqui a wom a taj chaʼan bajcheʼ maʼ chaʼlen tʼan?

⁷ Ti lac pejtelel la com chaʼan jiñi bajcheʼ mi lac chaʼlen tʼan mi la cʌqʼuen i ñuclel Jehová yicʼot chaʼan miʼ coltañonla ti sujtel tiʼ yamigo jiñi hermanojob. Jin chaʼan, laʼ laj qʼuel chuqui tac miʼ mejlel lac mel chaʼan chʌn wem bʌ ejemplojonla chaʼan bajcheʼ mucʼonla ti tʼan.

ACʼɅ WEM BɅ EJEMPLO TI JIÑI SUBTʼAN

8. ¿Bajcheʼ miʼ mejlel lac lajin i yejemplo Jesús ti subtʼan?

⁸ Yom utset yicʼot wen jach bajcheʼ maʼ jacʼ cheʼ bʌ mach weñic bajcheʼ maʼ pejcʌntel. Cheʼ bʌ Jesús tsajñi ila ti Lum, tsaʼ subenti chaʼan «juntiquil xwoʼlel yicʼot xjap vino», chaʼan woli (choncol) i melben i yeʼtel jiñi Diablo, chaʼan maʼañic miʼ qʼuel ti ñuc jiñi sábado yicʼot chaʼan miʼ chaʼlen tʼan tiʼ contra Dios (Mat. 11:19; 26:65; Luc. 11:15; Juan 9:16). Pero Jesús maʼañic baʼ ora mach weñic bajcheʼ tsiʼ jacʼʌ. Mi an majqui tsʌts bʌ miʼ pejcañonla, laʼ lac mel bajcheʼ Jesús i mach yomic mi laj qʼuextan (1 Ped. 2:21-23). I sujmʌch, an i tajol wocol chaʼan mi lac ticʼ lac bʌ (Sant. 3:2). ¿Chuqui mi caj i coltañonla?

9. ¿Bajcheʼ miʼ mejlel laj cʌntan muʼ bʌ la cʌl cheʼ bʌ woliyonla ti subtʼan?

⁹ Mi an majqui mach weñic bajcheʼ miʼ jacʼbeñet ti subtʼan, mach a wʌcʼ a ñaʼtʌbal ti jiñi mach bʌ weñic. Juntiquil hermano i cʼabaʼ Sam miʼ yʌl: «Mic ñop c ñaʼtan chaʼan jiñi lac piʼʌl yomʌch miʼ ñʌchʼtan jiñi i sujmlel i chaʼan mucʼʌch i mejlel i qʼuextan i bʌ». Cheʼ jaʼel, tajol jiñi lac piʼʌl tsaʼ michʼa tiʼ caj mach weñic bajcheʼ ora tsaʼ cʼotiyonla. Cheʼ bʌ mi lac taj juntiquil michʼ bʌ, laʼ lac mel muʼ bʌ i mel jiñi hermana Lucía: Laʼ lac pejcan Jehová chaʼan miʼ coltañonla chaʼan maʼañic mi lac michʼan yicʼot chaʼan maʼañic mi la cʌl mach bʌ weñic.

10. Cheʼ bajcheʼ miʼ yʌl 1 Timoteo 4:13, ¿chuqui jiñi la com bʌ?

¹⁰ Chaʼlen wersa chaʼan maʼ sujtel ti wem bʌ xcʌntesa. Timoteo wen yujilix subtʼan, pero yomixto miʼ bej weñʼesan i bʌ bajcheʼ xcʌntesa (pejcan 1 Timoteo 4:13). ¿Bajcheʼ mi lac mejlel ti sujtel ti ñumen wem bʌ xcʌntesa? Yom mi lac chajpan lac bʌ ti wen. Chaʼan mi lac mel, miʼ mejlel laj cʼʌn jiñi folleto Sujten ti ñumen wem bʌ xcʌntesa yicʼot xpejcaya jun, yicʼot jiñi sección «Sujten ti wem bʌ xcʌntesa» am bʌ yaʼ ti Jun chaʼan lac tempa bʌ I Subtʼan yicʼot i Melbal jiñi xÑoptʼan. ¿Woli (yʌquel) ba a cʼʌn ti wen pejtelel iliyi? Mi mucʼʌch a chajpan a bʌ ti wen, maʼañic mi caj a wen chaʼlen bʌqʼuen yicʼot ñumen wen bajcheʼ mi caj a chaʼlen tʼan.

11. ¿Chuqui an i meleyob chaʼtiqui uxtiquil hermanojob chaʼan miʼ sujtelob ti ñumen wem bʌ xcʌntesa?

¹¹ Yambʌ muʼ bʌ i mejlel lac mel chaʼan mi lac sujtel ti ñumen wem bʌ xcʌntesa jiñʌch cheʼ mi laj qʼuel chuqui miʼ mel jiñi yambʌ hermanojob ti congregación i mi lac lajiñob. Sam, tsaʼ bʌ ajli ti párrafo 9, miʼ qʼuel chuqui miʼ mel jiñi hermanojob wem bʌ xcʌntesajob. Jin chaʼan, miʼ wen ñʌchʼtañob i miʼ chaʼlen wersa i lajin bajcheʼ miʼ chaʼleñob cʌntesa. Juntiquil hermana i cʼabaʼ Talía miʼ wen qʼuel bajcheʼ miʼ ñusañob i discurso jiñi hermanojob wem bʌ bajcheʼ miʼ ñusañob. Cheʼ bajcheʼ jiñi, an i cʌñʌ i yʌl jiñi tema tac muʼ bʌ i wen alob jiñi lac piʼʌlob ti subtʼan.

ACʼɅ WEM BɅ EJEMPLO TI TEMPA BɅ

12. ¿Chuqui jiñi wocol bʌ miʼ yubiñob chaʼtiqui uxtiquil hermanojob yaʼ ti tempa bʌ?

¹² Ti lac pejtelel mi lac mejlel ti coltaya yaʼ ti tempa bʌ cheʼ bʌ mi lac chaʼlen cʼay yicʼot mi la cʌcʼ wem bʌ laj comentario (Sal. 22:22). An wocol bʌ miʼ yubiñob chaʼan miʼ chaʼleñob cʼay yicʼot chaʼan miʼ yʌcʼob i comentario. ¿Cheʼ ba maʼ wujtel jatet? Mi caj a mulan a ñaʼtan chuqui an i colta yañoʼ bʌ chaʼan maʼañix miʼ wen chaʼleñob bʌqʼuen.

13. ¿Chuqui miʼ mejlel i coltañet chaʼan yicʼot a tijicñʌyel maʼ chaʼlen cʼay ti tempa bʌ?

¹³ Chaʼlen cʼay yicʼot a tijicñʌyel. Cʼajtesan chucoch ñuc i cʼʌjñibal mi lac chaʼlen cʼay ti tempa bʌ, chaʼañʌch mi la cʌqʼuen i ñuclel Jehová. Laʼ laj qʼuel muʼ bʌ i mel juntiquil hermana i cʼabaʼ Sara. Anquese miʼ ñaʼtan chaʼan mach wen yujilic cʼay, yomʌch i yʌqʼuen i ñuclel Jehová. Jin chaʼan, cheʼ bʌ miʼ chajpan i bʌ chaʼan jiñi tempa bʌ, mach muqʼuic jach i ñusan ti pʼis jiñi cʼay tac. Miʼ chaʼlen ti ensayar i miʼ ñop i qʼuel bajcheʼ miʼ taj i bʌ jiñi cʼay yicʼot jiñi i temajlel jiñi tempa bʌ. Miʼ yʌl: «Pejtelel iliyi miʼ coltañon chaʼan jin mi cʌcʼ ti ñuc jiñi muʼ bʌ i yʌjlel i mach jiñic mi cujil cʼay o maʼañic».

14. ¿Chuqui miʼ mejlel i coltañet chaʼan maʼ wʌcʼ a comentario ti tempa bʌ mi a wujil bʌqʼuen?

¹⁴ Ñʌmtesan a bʌ a wʌcʼ a comentario. Tiʼ sujm, jiñʌch wocol bʌ miʼ yubiñob cabʌl hermanojob. Talía, tsaʼ bʌ ajli ti párrafo 11, miʼ yʌl: «Mic wen chaʼlen bʌqʼuen cheʼ bʌ mic chaʼlen tʼan baqui an cabʌl lac piʼʌlob, anquese mach tsiquilic cheʼ bʌ mic chaʼlen tʼan. Jin chaʼan, wen wocol mi cubin chaʼan mi cʌcʼ j comentario». Pero jiñi maʼañic miʼ mʌctan. Cheʼ bʌ miʼ chajpan i bʌ chaʼan jiñi tempa bʌ, yujil chaʼan yom pʼots jach jiñi ñaxam bʌ comentario. Miʼ yʌl: «Weñʌch cheʼ cheʼʌch mic mel bajcheʼ jiñi, come jiñʌch yom bʌ jiñi muʼ bʌ i ñusan jiñi estudio».

15. ¿Chuqui yom mi laj cʼajtesan chaʼan jiñi comentario tac?

¹⁵ An i tajol jinto jiñi hermanojob mach bʌ yujilobic bʌqʼuen yicʼot mach wocolic miʼ yubiñob chaʼan miʼ chaʼleñob tʼan maʼañic miʼ yʌcʼob i comentario. ¿Chucoch? Juntiquil hermana i cʼabaʼ Juliet miʼ yʌl: «An i tajol wocol mi cubin chaʼan mi cʌcʼ j comentario come mic ñaʼtan chaʼan mach ñoj weñic i mach cheʼic bajcheʼ i chaʼan jiñi yambʌlob». ¿Cheʼ ba maʼ wujtel jaʼel? Cʼajtesan chaʼan Jehová yom chaʼan mi lac mel ti wen cheʼ bajcheʼ cʼamel mi lac mejlel.c Jehová miʼ qʼuel ti ñuc cheʼ mi lac chaʼlen wersa chaʼan mi la cʌcʼ laj comentario anquese an i tajol mi lac chaʼlen bʌqʼuen.

ACʼɅ WEM BɅ EJEMPLO CHEʼ BɅ MAʼ CHAʼLEN TʼAN

16. ¿Baqui tac bʌ tʼan mach yomic mi la cʌl?

¹⁶ Mach yomic mi la cʌl «tʼan tac muʼ bʌ i low yambʌlob» (Efes. 4:31). Cheʼ bajcheʼ tsaʼix laj qʼuele, juntiquil xñoptʼan mach yomic miʼ chaʼlen tsucu tʼan. Pero tajol maʼañic mi laj cʌn chaʼan mi lac low yambʌlob ti lac tʼan, i yom tsajalonla (mi laj cʌntan lac bʌ). Jumpʼejl ejemplo, mach yomic mi la cʌl mach tac bʌ weñic tiʼ tojlel jiñi lac piʼʌlob chʼoyoloʼ bʌ ti yambʌ país o yambʌloʼ bʌ i cultura. I mach yomic mi la cʌl muʼ bʌ i mejlel i low yambʌlob o cʼux bʌ miʼ yubiñob. Juntiquil hermano miʼ yʌl: «An i tajol an cʌlʌ mach bʌ weñic come tsaʼ c ñaʼta chaʼan tseʼentic o chaʼan maʼañic majqui mi caj c low, pero tiʼ sujm añʌch cʼux bʌ tsiʼ yubi. Añix c tojʼesa c bʌ come jiñi quijñam miʼ subeñon tic bajñelil baqui ora tsaʼ cʌlʌ mach bʌ weñic tiʼ tojlel o tiʼ tojlel yambʌlob».

17. Cheʼ bajcheʼ miʼ yʌl Efesios 4:29, ¿bajcheʼ miʼ mejlel laj coltan yicʼot lac ñuqʼuesʌben i pusicʼal yañoʼ bʌ?

¹⁷ Alʌ chuqui tac miʼ mejlel i coltan yicʼot i ñuqʼuesʌben i pusicʼal yañoʼ bʌ. Mach yomic mi lac chaʼlen wulwul tʼan yicʼot la cʌl yañoʼ bʌ, laʼ lac chaʼlen wersa lac subeñob chaʼan weñʌch chuqui tac miʼ melob (pejcan Efesios 4:29). Mach la comic sujtel bajcheʼ jiñi israelitajob. Anquese cabʌl chucoch yom tijicñayob, tiʼ pejtelel ora tsiʼ chaʼleyob wulwul tʼan, i jiñi miʼ mejlel i cʌñob yañoʼ bʌ. Tiʼ caj tsaʼ bʌ i yʌlʌyob jiñi 10 wiñicob tsajñi bʌ i qʼuelob jiñi lum, pejtelel jiñi israelitajob «tsaʼ caji i contrajiñob Moisés» (Nm. 13:31-14:4). Pero cheʼ bʌ mi lac subeñob chuqui tac wem bʌ jiñi yambʌlob, mucʼʌch laj coltañob. Laʼcu lac ñaʼtan tiʼ tojlel i yixicʼal (yixicpʼeñal) Jefté. Cheʼ jiñi i yamigajob tiʼ subeyob chuqui tac wem bʌ yicʼot tsiʼ ñuqʼuesʌbeyob i pusicʼal tsaʼʌch i colta chaʼan miʼ bej melben i yeʼtel Jehová (Jue. 11:40, TNM). Sara, tsaʼ bʌ ajli ti párrafo 13, miʼ yʌl: «Cheʼ bʌ mi lac subeñob chuqui wem bʌ jiñi hermanojob, mi la cʌqʼueñob i yubin chaʼan Jehová mucʼʌch i cʼuxbiñob yicʼot chaʼan ñucob i cʼʌjñibal tiʼ yorganización». Chaʼlen wersa chaʼan maʼ suben yambʌlob chaʼan weñʌch chuqui woliʼ melob.

18. Cheʼ bajcheʼ miʼ yʌl Salmo 15:1, 2, TNM, ¿chucoch yomʌch mi la cʌl chuqui i sujm tiʼ pejtelel ora, i chuqui ochem yaʼi?

¹⁸ Alʌ chuqui i sujm bʌ tiʼ pejtelel ora. Mi maʼañic mi lac mel, Jehová mach tijicñayic yicʼotonla come miʼ tsʼaʼlen pejtelel lot (Pr. 6:16, 17). Anquese jiñi lac piʼʌlob ñʌmʌlobix ti lot, joñonla la com lac lajiben i ñaʼtʌbal Jehová (pejcan Salmo 15:1, 2, TNM).d I sujmʌch, maʼañic mi caj lac yilol chaʼlen lot, pero mach weñic jaʼel cheʼ an chuqui mi lac muc chaʼan jiñi yambʌlob miʼ ñaʼtañob chuqui mach bʌ i sujmic.

19. ¿Chuqui jiñi yambʌ mach bʌ yomic mi lac mel?

¹⁹ Mach a wʌl ñumel yambʌlob (Pr. 25:23; 2 Tes. 3:11). Juliet, tsaʼ bʌ lac taja ti tʼan ti párrafo 15, miʼ yʌl chaʼan miʼ ticʼlan cheʼ bʌ an majqui miʼ yʌl yambʌlob. Miʼ yʌl: «Cheʼ bʌ an majqui miʼ yʌl yambʌlob, mic wen ubin c chʼijyemlel i maʼañix mic ñop tiʼ tojlel. ¿Bajcheʼ mic ñaʼtan mi maʼañic mi caj i yʌlon ñumel jaʼel?». Mi tsaʼ qʼuele chaʼan an majqui wolix i tech i yʌl yambʌlob, qʼuexe a tʼan i alʌ chuqui wem bʌ (Col. 4:6).

20. ¿Chuqui a wom a mel jatet?

²⁰ Chumulonla ti jumpʼejl Pañimil baqui yonlel lac piʼʌlob mach weñic bajcheʼ miʼ chaʼleñob tʼan. Jin chaʼan, yom mi lac chaʼlen wersa chaʼan mi lac chaʼlen tʼan cheʼ bajcheʼ miʼ mulan Jehová. Laʼ laj cʼajtesan chaʼan jumpʼejlʌch majtañʌl tsaʼ bʌ i yʌqʼueyonla, i miʼ qʼuel ti ñuc chuqui mi la cʌl. Jehová mi caj i yʌqʼueñonla i bendición mi mucʼʌch lac chaʼlen wersa chaʼan mi la cʌqʼuen i ñuclel ti chuqui mi la cʌl ti subtʼan, ti tempa bʌ yicʼot cheʼ bʌ mi lac chaʼlen tʼan la quicʼot yañoʼ bʌ. Cheʼ bʌ muqʼuix i jisʌntel ili jontol bʌ pañimil, mach wen wocolix mi caj la cubin chaʼan mi la cʌqʼuen i ñuclel Jehová ti chuqui mi la cʌl (Jud. 15). Cheʼ bʌ wolito lac pijtan jiñi, laʼ lac chaʼlen wersa chaʼan mi lac mel cheʼ bajcheʼ tsiʼ yʌlʌ jiñi salmista: «Qʼuele ti utsʼat jini tʼan woli bʌ c subeñet [...] c Yum» (Sal. 19:14).