Jiñi Biblia miʼ chʼʌm tilel wen tac bʌ ticʼojel

Cheʼ mi lac ñaʼtan lac mel chuqui wem bʌ, pero cojach mi lac chʼʌm ti ñuc jiñi laj conciencia o muʼ bʌ i yʌl yañoʼ bʌ, maʼañic mi caj i mejlel lac ñaʼtan mi weñʌch mi caj i loqʼuel. Jiñi Biblia miʼ yʌl chucoch cheʼ miʼ yujtel bajcheʼ jiñi, i miʼ subeñonla bajcheʼ miʼ mejlel lac taj lac tijicñʌyel. Jiñi Biblia miʼ chʼʌm tilel wen tac bʌ ticʼojel muʼ bʌ i mejlel i coltañonla.

MUʼ BɅ MEJLEL I CɅNTESAÑONLA JIÑɅCH DIOS

Jehováa Dios miʼ subeñonla yaʼ ti Biblia chaʼan i cʼʌjñibal lac chaʼan i coltaya. Maʼañic tsaʼ mejliyonla (pʌjtiyonla) chaʼan mi lac bajñel mel chuqui la com (Jeremías 10:23). Jin chaʼan, tsiʼ cʌyʌ yaʼ ti Biblia ticʼojel tac muʼ bʌ i mejlel i coltañonla chaʼan mi lac chʼʌm decisión tac. Miʼ wen cʼuxbiñonla i mach yomic chaʼan mi lac mel mach bʌ weñic muʼ bʌ i mejlel i ticʼlañonla ti wiʼil (Deuteronomio 5:29; 1 Juan 4:8). Cheʼ jaʼel, come jiñʌch tsaʼ bʌ i meleyonla yicʼot wen i cʌñʌyonla, jin chaʼan miʼ mejlel i yʌqʼueñonla wem bʌ ticʼojel tac (Salmo 100:3; 104:24). Pero Dios maʼañic miʼ xicʼ jiñi lac piʼʌlob chaʼan miʼ jacʼbeñob i mandar tac.

Jehová tsiʼ yʌqʼue Adán yicʼot Eva pejtelel chuqui i cʼʌjñibal bʌ i chaʼañob chaʼan tijicña miʼ yajñelob (Génesis 1:28, 29; 2:8, 15). Cheʼ jaʼel, tsiʼ yʌqʼueyob mandar tac mach bʌ wocolic ti jacʼol, pero tsiʼ yʌqʼueyob tiʼ wenta chaʼan jin miʼ ñaʼtañob mi mucʼʌch caj i jacʼob o maʼañic (Génesis 2:9, 16, 17). Pero Adán yicʼot Eva tsiʼ bajñel ñaʼtayob chuqui yom i melob i mach jiñic bajcheʼ miʼ yʌl Jehová (Génesis 3:6). ¿Ñumen wem ba añonla cheʼ mi lac bajñel mel chuqui la com? Maʼañic. Cheʼ bajcheʼ mi laj qʼuel, ila ti pañimil maʼañic ñʌchʼtʌlel yicʼot tijicñʌyel come maʼañic miʼ jacʼbentel i mandar Dios (Eclesiastés 8:9).

Jiñi Biblia miʼ chʼʌm tilel ticʼojel tac muʼ bʌ i coltañonla lac mel chuqui wem bʌ, mach yʌlʌyic baqui tilemonla (2 Timoteo 3:16, 17; qʼuele jiñi recuadro «Jumpʼejl libro muʼ bʌ i coltan pejtelel lac piʼʌlob»). Mi caj laj qʼuel bajcheʼ Dios miʼ cʼʌn jiñi Biblia chaʼan miʼ cʌntesañonla.

Qʼuele chucoch weñʌch cheʼ mi la cʌl chaʼan jiñi Biblia i tʼañʌch Dios (1 Tesalonicenses 2:13). Cucu ti jw.org i qʼuele jiñi video ¿Majqui tsiʼ yʌcʼʌ ti tsʼijbuntel jiñi Biblia?

AM MUʼ BɅ I YɅLOB CHAʼAN JIÑI BIBLIA MAʼAÑIC MIʼ COLTAÑONLA

An muʼ bʌ i yʌlob chaʼan jiñi Biblia maʼañic miʼ chʼʌm tilel ticʼojel tac muʼ bʌ i coltañonla. Qʼuele chuqui am bʌ i yʌlʌyob:

An muʼ bʌ i yʌlob: «Jiñi Biblia miʼ jatsʼ i bʌ ti tʼan».

I sujmlel: Mi cheʼ jach mi lac pam qʼuel, tajol añʌch relato tac muʼ bʌ i jatsʼ i bʌ yilal. Pero cheʼ mi lac chʼʌm ti ñuc i contexto tac, bajcheʼ yilal chumul lac piʼʌlob ti wajali, i costumbrejob, i chuqui tac miʼ ñaʼtañob jiñi tsaʼ bʌ i tsʼijbuyob yicʼot yan tac bʌ, mi laj qʼuel chaʼan junlajalʌch chuqui miʼ yʌl jiñi Biblia.

Mi a wom a qʼuel ejemplo tac, cucu ti jw.org i pejcan jiñi artículo «¿Se contradice la Biblia?».

An muʼ bʌ i yʌlob: «Jiñi muʼ bʌ i pejcañob jiñi Biblia miʼ melob jaʼel mach tac bʌ weñic. Jin chaʼan, mach i sujmix miʼ coltañonla».

I sujmlel: Jiñi Biblia mach i mulic cheʼ an lac piʼʌlob maʼañic bʌ miʼ jacʼob jiñi ticʼojel tac i miʼ melob mach bʌ weñic. Cheʼ jaʼel, tsiʼ wʌn alʌ chaʼan cabʌl lac piʼʌlob i jinto jaʼel jiñi añoʼ bʌ i ñopbal mi caj i melob mach bʌ weñic, i tiʼ caj jiñi mi caj i yʌjlel chaʼan maʼañic i cʼʌjñibal jiñi Biblia (2 Pedro 2:1, 2).

Mi a wom a qʼuel chaʼan jiñi muʼ bʌ i chaʼleñob cʌntesan ti ñopbalʌl tac mach cheʼic miʼ melob bajcheʼ miʼ yʌl jiñi Biblia, cucu ti jw.org i pejcan jiñi artículo «¿Chaʼan ba miʼ locʼsʌntel taqʼuin jiñi ñopbalʌl?».

An muʼ bʌ i yʌlob: «Jiñi muʼ bʌ i pejcañob jiñi Biblia maʼañic miʼ qʼuelob ti ñuc yañoʼ bʌ tiʼ caj mach lajalobic bajcheʼob».

I sujmlel: Jiñi Biblia miʼ subeñonla chaʼan mi laj qʼuel ti ñuc pejtelel lac piʼʌlob. Pero miʼ yʌl jaʼel chaʼan añʌch melbalʌl tac mach bʌ yomic an lac chaʼan:

Cheʼ ñumen ñuc mi la cubin lac bʌ bajcheʼ yañoʼ bʌ (Filipenses 2:3).
Cheʼ maʼañic mi laj qʼuel ti ñuc jiñi yʌñʌl bʌ i ñopbalob (1 Pedro 2:17).
Cheʼ mi lac xicʼ yañoʼ bʌ chaʼan cheʼ miʼ ñaʼtañob bajcheʼ joñonla (Mateo 10:14).

• Jiñi Biblia miʼ pʌs chaʼan Dios wen chuqui miʼ mel tiʼ tojlel lac piʼʌlob, i cheʼʌch yom mi lac mel jaʼel (Romanos 9:14).

Mi a womto a ñumen cʌn, cucu ti jw.org i pejcan jiñi artículo «¿Nos ayuda la Biblia a ser tolerantes?».

DIOS MIʼ CʼɅN JIÑI BIBLIA CHAʼAN MIʼ SUBEÑONLA YOM BɅ MI LAC MEL

Jiñi Biblia miʼ subeñonla chuqui tac an i mele Dios tiʼ tojlel jiñi lac piʼʌlob cʼʌlʌl ti wajali. Cheʼ mi lac pejcan jiñi Biblia miʼ mejlel laj cʌn chuqui jiñi wem bʌ miʼ qʼuel Dios yicʼot mach bʌ weñic, muʼ bʌ mejlel i coltañonla o miʼ ticʼlañonla (Salmo 19:7, 11). I cheʼ bajcheʼ jiñi miʼ mejlel lac taj ticʼojel tac maʼañic bʌ miʼ jilel i cʼʌjñibal yicʼot muʼ bʌ i coltañonla ti jujumpʼejl qʼuin.

Laʼ laj qʼuel jumpʼejl ejemplo ti Proverbios 13:20: «Jini muʼ bʌ i piʼleñob majlel jini weñoʼ bʌ i pusicʼal mucʼʌch i tajob i ñaʼtʌbal. Jini muʼ bʌ i piʼleñob majlel jini mach bʌ weñobic i pusicʼal miʼ yutsi pʼojlel i mul». Ili ticʼojel wen i cʼʌjñibal ili ora cheʼ bajcheʼ ti wajali. Jiñi Biblia miʼ chʼʌm tilel cabʌl ticʼojel tac muʼ bʌ i coltañonla (qʼuele jiñi recuadro «Jiñi ticʼojel tac am bʌ ti Biblia mucʼʌch i coltañonla ili ora»).

Tajol maʼ cʼajtiben i bʌ: «¿Bajcheʼ miʼ mejlel c ñaʼtan mi mucʼʌch caj i coltañon ili ora jiñi ticʼojel tac am bʌ ti Biblia?». Ti jiñi yambʌ artículo mi caj laj qʼuel ejemplo tac ujtem bʌ ili ora.

a Jehová jiñʌch i cʼabaʼ Dios (Lucas 4:8).

JIÑI TICʼOJEL TAC AM BɅ TI BIBLIA MUCʼɅCH I COLTAÑONLA ILI ORA

Anquese jiñi Biblia añix cheʼ bʌ 2,000 jab tsaʼ ujti ti tsʼijbuntel, mucʼʌch i bej coltañonla ili ora. Ti lac pejtelel mi lac mulan cheʼ tijicña mi la cajñel yicʼot mi lac tsʼʌctesan pejtelel chuqui muʼ bʌ lac ñaʼtan lac mel (Eclesiastés 1:9). Jiñi ticʼojel tac am bʌ ti Biblia, maʼañic bʌ miʼ jilel i cʼʌjñibal, miʼ coltañonla lac taj jiñi.

Mi la cʌl chuqui i sujm o mi lac mel chuqui wem bʌ

«Come comʌch lon c mel chuqui utsʼat tiʼ pejtelel chuqui mi lon c mel» (Hebreos 13:18).
«Jiñi muʼ bʌ i chaʼlen xujchʼ, mach i chʌn chaʼlen xujchʼ, laʼ i chaʼlen tsʌts bʌ yicʼot wem bʌ eʼtel» (Efesios 4:28).

Wen mi laj cajñel la quicʼot yañoʼ bʌ

«Maʼañic majqui yom miʼ bajñel sʌclan i wenlel, laʼ i sʌclʌben i wenlel yambʌlob» (1 Corintios 10:24).
«Chʌn cuchben laʼ bʌ laʼ sajtemal yicʼot ñusʌben laʼ bʌ laʼ mul tiʼ pejtelel laʼ pusicʼal» (Colosenses 3:13).

Mi lac chʼʌm wem bʌ decisión tac

«Jini mach bʌ cʌntesʌbilic miʼ ñop pejtel chuqui miʼ yʌlob winicob. Jini cʌntesʌbil bʌ miʼ wen tsajin i bijlel» (Proverbios 14:15).
«Jini cʌntesʌbil bʌ miʼ wʌn ñaʼtan chuqui bʌbʌqʼuen miʼ yujtel. Miʼ chajpan i bʌ. Jini tonto bʌ maʼanic miʼ yotsan tiʼ pusicʼal. Muqʼuix i toj» (Proverbios 22:3).